Umujyi wa Kigali wahagurukiye guca ubuzunguzayi bw’Abamasayi

  • Imvaho Nshya
  • Nzeri 22, 2023
  • Hashize amezi 8
Image

Ubuyobozi bw’Umujyi wa Kigali bwavuze ko abantu bakunze kugendana ibicuruzwa muri uyu mujyi bazwi nk’Abamasayi na bo bahagarukiwe bagiye gushyirwa mu masoko yabugenewe  nk’abandi bazunguzayi mu rwego rwo guca ubucuruzi bw’akajagari.

Byagarutsweho mu kiganiro n’abanyamakuru n’ubuyobozi bw’Umujyi wa Kigali ku wa Kane taliki ya 21 Nzeri 2023, cyagarutse ku mitangira ya serivisi muri uyu mujyi wa Kigali.

Ni kenshi abantu bakunze kwibaza impamvu umujyi wa Kigali waciye abucuruzi batemewe bazengurukana ibicuruzwa (abazunguzayi) ariko ugasanga abanyamahanga bazwi nk’Abamasayi bazenguruka bacuruza inkweto, amakofi imikandara n’ibindi bikoresho kenshi biba bikoze mu mpu n’imiti gakondo ariko ugasanga inzego z’umutekano zitabakumira.

Umuyobozi w’Umujyi wa Kigali Pudence Rubingisa, yavuze ko aba Bamasayi na bo bahagurukiye kandi  basabwa kujya gukorera mu masoko nk’uko n’abandi bahoze bacuruza mu kajagari bagiyeyo.

Rubingisa ati: “Twafashe ingamba zo kubashyira aho bacururiza kandi n’urenze ku mabwiriza agahanwa, ariko ubu imbaraga turimo kuzishyira mu kubibakangurira. Abamasayi na bo bagombaga gukorera ahabugenewe ntabwo byemewe ko azunguruka muri karitsiye (quartier) n’ibyo acuruza.”

Si Umujyi wa Kigali wamaganye ubu buzunguzayi bw’Abamasayi gusa kuko n’Umuyobozi w’Agateganyo w’Inkeragutabara mu Ntara y’Amajyaruguru, Lt Col Higiro Vianney, aherutse gutangaza ko  ubu bagiye guhagurukira ‘inzererezi’ z’abanyamahanga zizenguruka mu mihanda zitwaye inkweto zitajya zigabanuka, bagacuruza imiti babeshya abaturage ko itanga urubyaro, avuga ko ibyo baciye ku Banyarwanda bitakwemerwa ku bandi.”

Lt Col Higiro Vianney, yavuze ko abanyamahanga binjira mu Rwanda bagomba kuba bafite ibibagenza bizwi, aho kwirirwa bazunguza ibicuruzwa mu muhanda nk’inzererezi nyamara byaraciwe ku benegihugu.

  • Imvaho Nshya
  • Nzeri 22, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE