Umujyi wa Kigali wagaragarije abazunguzayi inyungu ziri mu kureka ubuzunguzayi

  • NYIRANEZA JUDITH
  • Mutarama 9, 2024
  • Hashize amezi 2
Image

Umujyi wa Kigali ku bufatanye n’Ikigo gishinzwe Iterambere ry’Inzego z’ibanze LODA bashishikarije abakora ubuzunguzayi kubureka, ahubwo bagashyira imbaraga mu mahirwe Leta ibagenera bakiteza imbere.

Umujyi wa Kigali n’Ikigo LODA babishyurira ibibanza mu masoko mato mu gihe cy’umwaka wose.kandi Leta yashyizeho amabwiriza ya VUP yo kubaha inguzanyo ziciriritse ku nyungu ya 2% mu gihe cy’umwaka 1, ndetse urangije kwishyura akaba yahabwa inguzanyo yisumbuye.

Umuyobozi wungirije ushinzwe ubukungu n’imibereho myiza mu Mujyi wa Kigali Urujeni Martine yagize ati: “Muri iyi gahunda icyari kigamijwe ni ukugira ngo abari bamaze igihe bari mu buzunguzayi babureke, baze bagume hamwe, hanyuma n’ababagurira babasange ahangaha. Mudufashe kubafasha”.

Umuyobozi wa LODA Nyinawagaga Claudine yavuze ko Leta yateye intambwe yo kubegera.

Ati: “Bariya babyeyi, ruriya rubyiruko, bafite ubushake bwo gukora, ntabwo basabiriza, ariko mu gukora hari aho bafite intege nke twabafasha bakubaka ubushobozi bwabo, za ntege nke tukazihinduramo imbaraga.

Yongeyeho ati: “Aho mufite intege nke, icya mbere ni ugukora, mudafite igishoro, dushobora kubabonera inguzanyo. […] ikibazo cy’igishoro kizakemurwa n’inguzayo za VUP ziri kuri 2% by’inyungu mu mwaka. Nta ngwate tugusaba, kandi turaguhugura kugira ngo tukwerekere uko ifaranga waribyaza irindi.

Yavuze kandi ko berekera abo bagore icyo bakora bakiteza imbere babashishikariza kwizigamira..

Ati: “Dore uko wakwiteza imbere, dore uko wakora icungamutungo ryiza, mujye mu mashyirahamwe yo kubitsa no kugurizanya (ku ubishaka) mwiihutishe iterambere ryanyu”.

Umwe mu bakora ubuzunguzayi yavuze ko nyuma yo gusobanurirwa inyungu zo kuva mu buzunguzayi, bagakorera mu isoko bizaha umutekano imikorere yabo ndetse n’ibicuruzwa byabo.

Yagize ati: “Gucururiza mu isoko bizadufasha kugira umutekano ubwacu ndetse n’ibicuruzwa byacu. Ikindi kuba twabona inguzanyo ku nyungu nto bizadufasha kongera igishoro”.

Umujyi wa Kigali n’Ikigo gishinzwe Iterambere ry’Inzego z’ibanze LODA bakomeje kubaka ubushobozi bw’abakoreraga ubucuruzi ahatemewe.

Ku gicamunsi cyo kuri uyu wa Kabiri hatashywe amasoko mato 2 asanga andi 6 muri Nyarugenge akoreramo abagera ku 1,691.

Kugeza ubu mu Mujyi wa Kigali harabarurwa amasoko mato 30 akorerwamo n’abacuruzi 4,158.

  • NYIRANEZA JUDITH
  • Mutarama 9, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE