Umujyi wa Kigali wagaragaje ko Abanyarwanda bari mu gihugu cy’umudendezo

  • NTAWITONDA JEAN CLAUDE
  • Gicurasi 26, 2022
  • Hashize imyaka 2
Image

Ubuyobozi bw’Umujyi wa Kigali bwagaragaje ko Abanyarwanda bari mu gihugu gifite umudendezo ari na yo mpamvu ngo bakora ibikorwa bigamije gushimira abahishe Abatutsi bahigwaga mu 1994.

Urujeni Martine, Umuyobozi w’Umujyi wa Kigali wungirije ushinzwe imibereho myiza, yabigarutseho ku wa Gatatu taliki 25 Gicurasi 2022, mu gikorwa cyo gutaha ku mugaragaro inzu yubakiwe umurinzi w’Igihango mu Kagari ka Rusheshe, mu Murenge wa Masaka, Akarere ka Kicukiro ndetse no gusoza Itorero ry’urugerero muri uyu Murenge.

Mu kiganiro kigufi yahaye itangazamakuru, yagize ati: “Twararuhutse, twageze mu gihugu gifite umudendezo, gifite amahoro, gifite umutekano ni na yo mpamvu tubasha kujya mu bikorwa nk’ibingibi, tugomba rero kubisigasira”.

Asaba abatuye Umujyi wa Kigali gukomeza kubaka ubumwe birinda icyabatanya kandi bakabirinda urubyiruko.

Ati: “Tukirinde urubyiruko rwacu kuko iyo abana bakora ibikorwa nk’ibingibi ni uko baba bafite ubushake bwo kubaka igihugu cyabo no gukomeza gusigasira ubumwe bw’Abanyarwanda”.

Asaba urubyiruko kwirinda icyabatandukanya ariko ngo n’ababyeyi bakwiye kugira uruhare mu kubibarinda kugira ngo Jenoside itazongere kubaho ukundi.

Umutesi Solange, Umuyobozi Nshingwabikorwa w’akarere ka Kicukiro, avuga ko umurinzi w’Igihango Mukancogoza Esperance, ari umwe mu bagize uruhare mu guhisha Abatutsi mu gihe cya Jenoside yakorewe Abatutsi mu 1994.

Nyuma yo gukurikirana ibikorwa bya Mukancogoza mu gihe cya Jenoside yakorewe Abatutsi, byatumye agirwa umurinzi w’igihango, akaba anabishimirwa.

Asobanura ko guhuza igikorwa cyo gutaha inzu yubakiwe Mukancogoza no gusoza urugerero rw’abasaga 80 biri mu rwego rwo kugira ngo urubyiruko rwigire ku barinzi b’igihango.

Ati: “Kuba twarabihuje n’urugerero ni ukugira ngo n’urubyiruko rwigire ku barinzi b’igihango.

Inzu yubakiwe Mukancogoza ifite ibyangombwa nkenerwa byose (Foto Kayitare J.Paul)

Ibikorwa by’indashikirwa bakoze bakemera kwitandukanya n’abicaga, ahubwo bo bagahitamo guhisha Abatutsi, urubyiruko rukwiye kwigira kuri ubwo butwari ari na byo Igihugu uyu munsi kibifuriza”.

Ashimira urubyiruko rwasoje urugerero kuba rwaratanze amaboko ku nzu yubakiwe umurinzi w’igihango, akanashimira abafatanyabikorwa b’Akarere batanze ubushobozi kuri icyo gikorwa.

Mukancogoza Esperance umukecuru w’imyaka 52, ni umurinzi w’igihango, avuga ko Jenoside yakorewe Abatutsi yabaye afite imyaka 22.

Atangaza ko icyatumye ashobora guhisha Abatutsi kandi yari amaze umwaka umwe ashatse ahitwa mu kagari ka Ayabaraya, abikomora ku burere yahawe n’ababyeyi be.

Muri Jenoside yashoboye guhisha Abatutsi 10 kandi bose bararokoka. Ahamya ko yabashakiye ibibatunga mu gihe cy’ibyumweru bitatu kugeza ubwo Inkotanyi zageraga mu gace ka Masaka ziturutse Karenge na Murehe mu karere ka Rwamagana.

Yishimira ko yubakiwe inzu, agasaba urubyiruko kurangwa n’ibikorwa by’ubugira neza, kandi rukarangwa na Ndi Umunyarwanda.

Nshimiyimana Erneste na mubyara we Umulisa Alice, bashima Mukancogoza wabahishe n’imiryango yabo baturutse ku Muyumbu muri Rwamagana, bakaba banashimira Inkotanyi zahagaritse Jenoside yakorewe Abatutsi, bakongera kubaho.

Ndikubwimana Jean D’Amour, wavuze mu ijambo ry’abarangije urugerero, yavuze ko iyo urugerero rutabaho batari kuzagira ibyishimo nk’intore kuko ngo urugerero barwigiyemo byinshi.

Ati: “Ku rugerero twatojwe gukunda igihugu no kukitangira igihe bibaye ngombwa. Twubakiye abaturage uturima tw’igikoni, ubwiherero ndetse n’inzu y’umukecuru warokoye Abatutsi muri Jenoside yakorewe Abatutsi mu 1994”.

Kugeza ubu, ubuyobozi bw’Akarere ka Kicukiro burabarura ubwiherero busaga 600 bwubatswe n’urubyiruko rwari ku rugerero.

Rwagize uruhare mu kugarura mu ishuri abana 354. Urubyiruko rwakoze ubukangurambaga mu baturage basaga ibihumbi 12. Rwanigishije abakuze 115 batazi gusoma no kwandika.

Abaturanyi ba Mukancogoza bamuremeye (Foto Kayitare J.Paul)
Mukancogoza Esperance yanorojwe inka (Foto Kayitare J.Paul)
Hatashywe inzu yubakiwe umurinzi w’igihango mu murenge wa Masaka (Foto Kayitare J.Paul)
Inzego z’umutekano zitabiriye ibikorwa byo gutaha inzu yubakiwe Mukancogoza (Foto Kayitare J.Paul)
Mukancogoza Esperance yishimiye ko yubakiwe inzu asaba urubyiruko kurangwa na Ndi Umunyarwanda (Foto Kayitare J.Paul)
Urujeni Martine, Umuyobozi w’Umujyi wa Kigali wungirije ushinzwe imibereho myiza (Foto Kayitare J.Paul)
  • NTAWITONDA JEAN CLAUDE
  • Gicurasi 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE