Umujyi wa Kigali: Jenoside yakorewe Abatutsi ntiyari impanuka

  • NTAWITONDA JEAN CLAUDE
  • Mata 10, 2022
  • Hashize imyaka 2
Image

Muri gahunda zo kwibuka ku nshuro ya 28 Jenoside yakorewe Abatutsi mu 1994 mu Murenge wa Masaka ahazwi nko mu Gahoromani mu Karere ka Kicukiro, ubuyobozi bw’Umujyi wa Kigali bwagaragaje ko Jenoside atari impanuka yabaye.

Urujeni Martine, Umuyobozi w’Umujyi wa Kigali wungirije ushinzwe imibereho myiza, yereka urubyiruko ko ari byiza ko rwajya rwumva amateka kugira ngo rumenye ukuri kuri Jenoside yakorewe Abatutsi.

Agaragaza ko Jenoside yakorewe Abatutsi ari umugambi wateguwe igihe kirekire ko atari impanuka yabaye.

Yagize ati “Ntabwo Jenoside yabaye impanuka, Jenoside yarateguwe kandi itegurwa igihe kirekire.

Ntabwo Jenoside yatewe n’ihanuka ry’indege ya Perezida Habyarimana, ntabwo ariko bimeze ni umugambi wari warateguwe”.

Visi Meya Urujeni, avuga ko urubyiruko rwavutse nyuma ya Jenoside narwo rugirwaho ingaruka z’ihungabana.

Agaragaza ko hari abana amarangamutima yanga akarenga kuko na bo ibyo bumva ngo birenze ubwenge bwabo. Abasaba kwishima bakanezerwa.

Ati “Mujye muba intwari mwumve ukuri ariko kandi murusheho no kwishima, munezerwe kuko ubu mwicaye mu gihugu gitekanye”.

Yasabye urubyiruko kwirinda ibivugirwa kuri Youtube zigamije guhisha ukuri kuri Jenoside yakorewe Abatutsi.

Mu kiganiro cyatanzwe na Karinamaryo Theogene, yagaragaje uko ingengabitekerezo ya Jenoside yashenye ubumwe ikabyara ibyago byinshi, harimo na Jenoside yakorewe Abatutsi mu 1994.

Ashimangira ko ingabo zari iza RPF bitaga RPA zahagaritse Jenoside ariko ntiziheranwe n’agahinda hanyuma abanyarwanda bose bayobowe na FPR bakongera kubaka ubumwe bw’abanyarwanda.

Agira ati “Ikigamijwe ni ukumenya inshingano za buri wese mu kongera kubaka ubumwe bw’abanyarwanda”.

Uwari uhagarariye Ibuka muri gahunda yo kwibuka, yagaragaje ko Jenoside yakorewe Abatutsi yakozwe n’ibyiciro bitandukanye by’abantu.

Avuga ko ahitwa ku Ibambiro mu karere ka Nyanza, hariyo umwana w’imyaka 10 witwa Montfort wakoze Jenoside.

Ati “Yishe utwana dutoya tugenzi twe. Abana bo ku muhanda bazwi nka Mayibobo bishe bagenzi babo, hari umunyururu mu karere ka Nyanza wishwe na bagenzi be bari bafunganye”.

Avuga ko abapfobya Jenoside barimo abana bavutse nyuma yayo, batayibonye. Aha niho ahera asaba urubyiruko kwirinda abapfobya n’abahakana Jenoside yakorewe Abatutsi.

Mu buhamya bwa Uwera Hérena avuga ko mbere ya Jenoside yigaga mu mwaka wa Kabiri mu mashuri yisumbuye, akaba atuye mu Gahoromani kuva mu 1983.

Avuga ko mu Gahoromani hari hatuye abantu bo mu Ruhengeri, i Byumba no ku Gisenyi.

Abana babo bariganaga, bakabwirana udukuru dusekeje ariko ngo igitangaje nuko ari bo baje kubica.

Uwera ahamya ko Jenoside yakorewe Abatutsi mu Gahoromani yakoranywe ubugome ndengakamere.

Ati “Interahamwe zarajagajaze zirimo zibaga inka z’Abatutsi, hano mu Gahoromani barabagaga, bararyaga, imihoro batemeshaga abantu ni yo barimo babagisha inka, byari ibintu bibi”.

Avuga ko harimo interahamwe zikomeye zirimo Kajinya, Murihano, Gashyengo na Kagongori ari na we wishe nyina umubyara.

Ahamya ko Agahoromani kari kagoye, ngo aho abantu wabonaga babaye inyamaswa.

Asoza avuga ko Inkotanyi zaje zikarasana n’interahamwe zigatangira guhunga, bituma na bo basohoka mu musigiti bafata umuhanda wa 19 agereranya nk’inzira y’umusaraba.

Ati “Ku Mulindi hari bariyeri, uko twagendaga ni ko interahamwe zaturobagamo umwe zikamwica, zikica uruhongohongo kugeza ubwo tugeze i Remera tujya mu rugo rutari rurimo abantu kugeza ubwo Inkotanyi zije zidusanga aho hantu zitujyana muri Stade”.

Uwera ahamya ko Abacitse ku icumu bafite ubuzima, bariho bariyubatse kandi barize, ntibarwara ngo baheranwe n’indwara.

  • NTAWITONDA JEAN CLAUDE
  • Mata 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE