Umujyi wa Kigali: Abakirisitu barasabwa kudasengera ahatemewe

  • Imvaho Nshya
  • Ugushyingo 6, 2023
  • Hashize amezi 7
Image

Bishop Nzeyimana Innocent, Umuyobozi w’Ubumwe bw’Imiryango ishingiye ku myemerere mu Mujyi wa Kigali, agira inama abajya gusengera ahatemewe mu gihe urusengero rwabo rwasabwe kuba rufunze.

Yabigarutseho nyuma y’aho ku munsi w’ejo ku Cyumweru hari bamwe mu bakirisitu bagiye gusengera mu mashyamba y’ahitwa Kiriza mu Murenge wa Bumbogo mu Karere ka Gasabo.

Yabwiye RBA ati: “Kubera ko ku misozi ushobora kuhahurira n’ibibazo bitandukanye bitari byiza, turakangurira abakirisitu, abayoboke b’insengero zitandukanye ko bajya basengera ahantu hemewe”.

Akomeza avuga ko bajya basengera aho amategeko abemerera gusengera kugira ngo badahura n’ingorane kuri iyo misozi.

Ku rundi ruhande ngo aho insengero zaba zitarafungurwa, icyo gihe abakirisitu barihangana bakaba basengera mu nsengero zifunguye.

Mutiganda Jean De La Croix, usengera mu Itorero Umuriro wa Pentekote ryafunzwe, yahamirije RBA ko bahisemo gusengera mu ngo.

Yagize ati: “Abakirisitu bagira amatsinda babamo nanjye hano ni iwacu tubonanira mu bihande urumva itorero ryacu rifite ibihande birenze 50.

Mu gihe urusengero rutari gukora ubundi duhurira mu ngo zacu kandi twanabikoze”.

Hari insengero ziherutse gufungwa kubera kutuzuza bimwe mu byo zisabwa, abagize izo nsengero bituma bajya gusengera ahandi hantu hatemewe.

Ku musozi wa Kiriza mu Murenge wa Bumbogo mu Karere ka Gasabo, bamwe mu basengeraga mu Itorero Umuriro wa Pentekoti mu Rwanda riherereye Kimironko ryafunzwe, barimutse bajya gusengera mu ishyamba rihari.

Mutiganda Jean De La Croix usengera mu Itorero Umuriro wa Pentekoti ahamya ko basengera mu ngo

Abandi bayobotse ibyumba by’amasengesho ndetse n’ahandi hatemewe gusengerwa.

Bavuga ko gufunga insengero byabaye gukemura ikibazo kimwe havuka ibindi.

Bimwe mu byo insengero zigomba kuba zuzuje kugira ngo zemererwe gusengerwamo, harimo kuba zigomba kuba zifite ibikoresho byakwifashishwa mu guhangana n’inkongi y’umuriro, imirindankuba, ibibafasha gukumira urusaku n’ibindi.

Zigomba kuba kandi ziri ahateganyijwe n’igishushanyo mbonera cy’Umujyi wa Kigali.

Bishop Nzeyimana avuga ko ibijyanye n’ibikoresho byo kuzimya umuriro, ibirinda urusaku ari ngombwa ko bigomba gushakwa n’itorero.

Agaragaza impungenge z’uko ubuyobozi busaba amatorero kuba afite icyangombwa cyanditse ku itorero, kandi ngo akenshi insengero ziba zikodesha.

KAYITARE JEAN PAUL

  • Imvaho Nshya
  • Ugushyingo 6, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE