Umuhanzi Chriss Eazy yasusurukije abarimo na Minisitiri Dr Utumatwishima

  • KAMALIZA AGNES
  • Mutarama 5, 2024
  • Hashize amezi 5
Image

Umuhanzi Chriss Eazy yasusurukije abayobozi batandukanye barimo Minisitiri w’urubyiruko n’iterambere ry’ubuhanzi Dr Utumatwishima Abdallah ndetse n’urubyiruko rwo mu Mujyi wa Kigali.

Umuhanzi Nsengiyumva Rukundo Christian uzwi ku izina ry’ubuhanzi rya Chriss Eazy yanyuze imitima ya benshi mu rubyiruko rwari mu gikorwa cy’Umujyi wa Kigali cyitwa Isangano ry’Urubyiruko cyabereye muri IPRC Kicukiro ku mugoroba wo kuri uyu wa Gatanu tariki ya 5 Mutarama 2024.

Uyu muhanzi washimishije imbaga y’abari bateraniye aho, agihamagarwa ku rubyiniro yinjiriye mu ndirimbo ye yakunzwe yitwa ‘Basi sorry’, nyuma yayo afata ijambo agira ati: “Mbanje gushimira ubuyobozi bwacu n’urubyiruko rwose ruri hano”.

Yakurikijeho iyitwa, Izina ndetse n’Inana yatumye benshi bahaguruka.

Uyu muhanzi nyuma yayo yongeye gufata ijambo maze agira ati: “Ndashimira nanone Ubuyobozi bwacu bwiza budahwema kudushyigikira natwe ntabwo tuzigera tubatererana.”

Nyuma yaho benshi batereye amajwi hejuru bavuga bati: “Nana”,ari nako umushyushyarugamba witwa Manzi yafashe ijambo amusaba ko yaririmba iyo ndirimbo, na we ntiyazuyaza ahita ayishyiraho.

Mu rusaku rwinshi rw’ibyishimo by’abari bateraniye aho ndetse na Minisitiri w’Urubyiruko n’Iterambere ry’Ubuhanzi Dr Utumatwishima bacinya umudiho kugeza bitinze.

Uyu muhanzi ni nayo ndirimbo yasorejeho ahita ava ku rubyiniro nubwo benshi bari bagishaka ko abasusurutsa.

Isangano n’Urubyiruko rw’Umujyi wa Kigali rifite intego yo kubaka umusingi w’ubukangurambaga bukorwa n’ubuyobozi binyuze mu kunganira inzego z’urubyiruko, bakareba ahari ibibazo birudindiza mu iterambere ry’ubukungu n’imibereho myiza kugira ngo bishakirwe ibisubizo.

  • KAMALIZA AGNES
  • Mutarama 5, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE