Umuhanzi Alikiba yifatanyije n’u Rwanda kwibuka Jenoside yakorewe Abatutsi

Umuhanzi ukomoka muri Tanzania akaba n’umwe mu banyabigwi mu Karere ka Afurika y’Iburasirazuba Ali Kiba, yifatanyije n’Abanyarwanda mu bikorwa byo kwibuka ku nshuro ya 32 Jenoside yakorewe Abatutsi mu 1994, agaragaza ko Jenoside ikwiye kurwanywa ahantu hose ntizasubire ukundi.

Yifashishije imbuga nkoranyambaga uyu muhanzi ufite abakunzi batari bake mu Rwanda uherutse no kuhataramira, kuri uyu wa Gatandatu tariki ya 11 Mata 2026, yasangije abamukurikira ifoto y’umugore ushushanya uwarokotse Jenoside yakorewe Abatutsi mu 1994, imbere ye hari urumuri rw’icyizere, abahumuriza ko Jenoside itazasubira ukundi.

Yanditse ati: “Ntibizasubire ukundi, twibuke Jenoside yakorewe Abatutsi mu 1994. Twibuke twiyubaka.”

Ali Kiba ni umwe mu bahanzi bagirana umubano mwiza n’u Rwanda ndetse bakundwa n’Abanyarwanda kuko mu mpera za 2025 yaje kubataramira, mu gitaramo cyari cyateguwe n’Umujyi wa Kigali cyari cyiswe ‘Kigali ishyushye’.

Ali Kiba ahumrije u Rwanda n’abarokotse Jenoside yakorewe Abatutsi mu 1994, mu gihe hashize iminsi itanu hatangijwe ibikorwa byo kwibuka ku nshuro ya 32 Jenoside yakorewe Abatutsi mu 1994, aho insanganyamatsiko igira iti: “Twibuke Twiyubaka”