Umuganga SACCO igiye kujya iha inguzanyo abanyamuryango

  • NTAWITONDA JEAN CLAUDE
  • Werurwe 24, 2022
  • Hashize imyaka 2
Image

Ikigega cy’imari “Umuganga SACCO” cyashyize igorora abanyamuryango bayo aho bagiye kujya bahabwa inguzanyo zitandukanye mu rwego rwo guteza imbere abanyamuryango bayo.

Byagarutsweho mu Nteko rusange isanzwe yabaye kuri uyu wa Kane taliki 24 Werurwe 2022, aho yibanze ku kwiga uko imari yari ihagaze umwaka ushize.

Hemejwe ishusho y’umutungo aho ikigo cyungutse amafaranga angana na miliyoni 245, ni inyungu y’umwaka wa 2021.

Ni amafaranga abanyamuryango bemeje ko aherwaho agashyirwa mu nyungu ziguma mu kigega kugira ngo cyongere umutungo bwite.

Uwambayingabire Claudine, Umuyobozi Mukuru w’Ikigo cy’imari iciriritse cy’abakozi b’inzego z’ubuzima kitwa ‘Umuganga SACCO’, asobanura ko muri iyi nteko hagaragajwe politiki y’inguzanyo aho abanyamuryango bagiye kujya bahabwa inguzanyo muri koperative.

Hatangajwe ko hazatangwa inguzanyo zishingiye ku mishahara, iz’imishinga, ingoboka, amacumbi cyangwa ibibanza, inguzanyo z’imodoka n’inguzanyo zo kwiga.

Uwambayingabire Claudine, umuyobozi wa Muganga SACCO (Foto Kayitare J.Paul)

Uwambayingabire yagize ati: “Inguzanyo zo kwiga ni zo abanyamuryango bacu bakeneye cyane kuko abakozi bo mu nzego z’ubuzima bahora batyaza ubumenyi.

Abenshi bajyaga bagorwa n’ubushobozi, ubu twabageneye inguzanyo y’ishuri (Scholar Loan) izajya yunguka 6% kandi tukaborohereza ku buryo abanyamuryango bacu bose batangira kwiga”.

Imishahara y’abakozi bo mu rwego rw’ubuzima izajya inyuzwa mu Umuganga SACCO mu gihe ibyangombwa bitangwa na Banki Nkuru y’u Rwanda bizaba bibonetse.

Ubuyobozi bwa Koperative Umuganga SACCO buvuga ko mu kimina abaganga bo mu bigo by’ubuzima byigenga batari bemerewe.

Sitati nshya ivuga ko umuntu wese ukora mu rwego rw’ubuzima mu Rwanda yemerewe kuba umunyamuryango apfa kuba afite aho ahuriye n’uru rwego.

Kugeza ubu ikigo gifite amafaranga y’abaganga kitazi kubera imbogamizi z’uko abategura imishahara mu Turere badatanga urutonde rw’abanyamuryango bayatanze.

Mu gihe imishahara yatangira kunyuzwa mu Umuganga SACCO, ubuyobozi buvuga ko iki kibazo kizahita gikemuka.

Uwambayingabire ati: “Dufite imishahara ibyo bintu tukabyikorera byakemura byinshi. Dutanze inguzanyo ntitubone ubwishyu kubera ko tutagera ku mushahara we, niba ushinzwe imishahara ku Karere adafite ubushake icyo gihe inguzanyo ntabwo yishyurwa”.

Karangwa Fidèle, Umukozi wa Minisiteri y’Ubuzima, avuga ko afitiye icyizere Umuganga SACCO agatanga ubuhamya bw’uko yasabye inguzanyo ya miliyoni 3 akazishyura akongera agasaba izindi miliyoni 6 na zo akazishyura.

Ati “Kubera ubwizigame mfite, ubu nshobora kuguza miliyoni 14 kuko imisanzu yanjye irenze miliyoni 6”.

Yishimira ko umushahara we ugiye kuzajya unyuzwa mu Umuganga SACCO.

Ati: “Mpanyujije umushahara wanjye nta kibazo kuko aho nawunyuzaga mbere nta nyungu nabigiragamo ariko naramuka anyujijwe muri SACCO nzaba nzi ko nta kibazo”.

Dr Mukantwaza Violette, umunyamuryango wa Umuganga SACCO, avuga ko mbere bakiri mu kimina no kuba uyu munsi barimo kujya muri SACCO bifite inyungu nyinshi.

Ati: “Ibimina nta mategeko aba abigenga nta nzego biba bifite ibyo bintu biba bishobora guteza igihombo ariko iyo ari koperative bifite amategeko ayigenga, ifite inzego zubakitse, ni urwego ruzwi na Banki Nkuru y’u Rwanda.

Ibyago byo kuba twahombera mu kimina ntibikiriho ubu dufite icyizere gihagije tugiye gutera imbere”.

Abanyamuryango batoye abahagarariye Umuganga SACCO, bahita banarahirira imbere y’abanyamuryango.

Mu 2018 ikigega cyungutse miliyoni zisaga 20, mu gihe ubuyobozi butangaza ko kimaze kunguka miliyoni zisaga 500 kuva gitangiye Inguzanyo zahawe abanyamuryango zarazamutse. Mu 2021 hatanzwe inguzanyo ingana na miliyari zisaga ebyiri.

Kugeza ubu Ikigo cy’Igihugu gishinzwe amakoperative (RCA) cyamaze guha ubuzima gatozi Umuganga SACCO.

Umwaka urangiye Umuganga SACCO ifite ubwizigame bungana n’amafaranga y’u Rwanda 4,500,000,000.

Umuganga SACCO irabarura abanyamuryango basaga ibihumbi 8.

Abaganga bashyizwe igorora aho bazajya bahabwa inguzanyo yo kwiga yunguka 6% (Foto Kayitare J.Paul)
  • NTAWITONDA JEAN CLAUDE
  • Werurwe 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE