Umugaba Mukuru w’Ingabo za Burkina Faso yasuye u Rwanda 

  • Imvaho Nshya
  • Ugushyingo 10, 2023
  • Hashize amezi 4
Image

Umugaba Mukuru w’Ingabo za Burkina Faso Brig Gen Célestin Simpore, n’itsinda ryaje rimuherekeje, baraye batangiye uruzinduko rw’akazi rw’iminsi itatu mu Rwanda. 

Ni uruzinduko rugamije kwigira ku Rwanda rwatangiye ku wa Kane tariki ya 9 rukazasoza ku wa Gatandatu ku ya 11 Ugushyingo 2023, nk’uko byemezwa n’Ubuyobozi bw’Ingabo z’u Rwanda (RDF). 

Ku gicamunsi cyo ku wa Kane, Brig. Gen. Simpore n’abasirikare bamugaragiye basuye Urwibutso rwa Jenoside rwa Kigali, bunamira inzirakarengane zazize Jenoside yakorewe Abatutsi mu 1994.

Banasuye kandi Ingoro Ndangamurage y’Urugamba rwo guhagarika Jenoside yakorewe Abatutsi iherereye ku nyubako y’Inteko Ishinga Amategeko, basobanurirwa inshamake y’urugamba rwo kubohora u Rwanda.

Kuri uyu wa Gatanu, iryo tsinda rirasura icyicaro gikuru cy’Ingabo z’u Rwanda maze rihure na Minisitiri w’Ingabo Marizamunda Juvenal ndetse n’Umugaba Mukuru w’Ingabo z’u Rwanda Lt. Gen. Mubarak Muganga. 

Biteganyijwe ko ibiganiro bagirana n’abo bayobozi biza kwibanda ku kurushaho kwimakaza ubutwererane buzira amakemwa mu bya gisirikare hagati y’Ingabo za Burkina Faso n’Ingabo z’u Rwanda. 

Byitezwe kandi ko iryo tsinda rinasura ibikorwa remezo bitandukanye bya gisirikare mu Rwanda maze abarigize basobanurirwe imikorere yabyo. 

Mu byo basura harimo na gahunda zashyiriweho kunoza imibereho y’abasirikare nk’Ikigo cy’Imari Zigama CSS, Ikigo cy’Ubwishingizi bw’Ubuzima MMI ndetse n’Isoko ryihariye ku bakora mu nzego z’umutekano (Armed Forces Shop).

Muri iyi minsi itatu y’uruzinduko kandi ntizasoza batanasuye Ishuri Rikuru rya Gisirikare rya Gako, nka rimwe mu mashuri ya gisirikare atanga ubumenyi buhamye kandi bugezweho mu kubaka igisirikare cy’umwuga. 

NTAWITONDA JEAN CLAUDE 

  • Imvaho Nshya
  • Ugushyingo 10, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE