Uko uwari Umwofosiye muri FAR yaguriraga nyina inkweto akazanga

  • NTAWITONDA JEAN CLAUDE
  • Mutarama 16, 2024
  • Hashize amezi 2
Image

Col. (Rtd) Nizeyimana Wenceslas wabaye Umwofisiye mu ngabo za Leta y’u Rwanda ya mbere ya Jenoside yakorewe Abatutsi (FAR), yagaragaje uburyo imyumvire y’Abanyarwanda yahindutse cyane mu myaka 30 ishize.

Ahereye ku rugero rw’umubyeyi we, yavuze uburyo nka nk’Umwofisiye yageragezaga kumugurira inketo akazanga kubera imyumvire yari afite ifitanye isano n’imiyoborere itarashyiraga imbere imibereho myiza y’Abanyarwanda.

Yahishuye ko ubwo yari Umwofisiye mu ngabo za FAR, yashoboye kugurira inkweto nyina umubyara akanga kuzambara ariko uyu munsi kwambara inkweto bikaba byarahindutse umuco wimakaza isuku.

Yakomoje ku isuku igaragara mu Rwanda hakiyongeraho kuba Umunyarwanda wese yarasabwe kwambara inkweto ubu bikaba byarabaye umuco, akavuga ko byose bikomoka ku miyoborere myiza.

Kimwe n’abandi basirikare bari bamaze gutsindwa, Col (Rtd) Nizeyimana yahungiye mu mashyamba ya Congo (RDC) agaruka mu Rwanda hashize imyaka 12.

Uyu munsi Nizeyimana atuye mu Mudugudu wa Base mu Kagari ka Rwamahwa mu Murenge wa Base mu Karere ka Rulindo mu Ntara y’Amajyaruguru. 

Mu kiganiro yahaye RBA, yavuze uko akiri mu mashyamba ya RDC yatunguwe no kumva ko Abanyarwanda bose basigaye bambara inkweto.

Yagize ati “Ibyo twabyumvise mu makuru narinkiri mu ishyamba, ndavuga nti ntabwo bishoboka kuko na Mama wanjye namwinginze kenshi kwambara inkweto aranga kandi nari Umusirikare Mukuru (Officier). Inkweto nziza zaguraga amafaranga 500 na 600, Mama arabyanga ngo bamuroga, ngo bamugirira ishyari ibintu nk’ibyo.

Ariko ubuyobozi bwiza bwabishyizeho, umuturage wes,e ntabwo bikiri ngombwa ko umubwira ngo kuki utambara inkweto, kutambara inkweto ahubwo ni ikibazo.”

Akomeza agira: “Iyo umuntu umubonye atambaye inkweto uravuga ngo ni umurwayi wo mu mutwe n’abo barwayi bambara inkweto, ubu ku buryo isuku yabaye umuco. Nk’uko utagenda utambaye, utambaye inkweto ugenda wumva umeze nk’umuntu utambaye.”

Mu buhamya bwe avuga ko mu myaka 30 ishize imyumvire y’Abanyarwanda yateye imbere kandi ko na nyakatsi barwanyaga bari mu mashyamba, ntaho wayibona mu Rwanda.

Akomeza agira ati: “Icya Kabiri baravuze ngo bace nyakatsi na byo twarabirwanyije, mu ngengabitekerezo twatangaga muri FDLR, tuti barimo guhatira abantu ngo bave muri nyakatsi nta bushobozi bafite, ko ubushobozi babubonye babukuye hehe?

Buri wese yarisakasatse udashoboye Leta iramufasha ubona ko mu Rwanda rwacu hose nta Munyarwanda usumba undi.”

Col. (Rtd) Nizeyimana ni umwe mu bashinze umutwe wa FDLR ukomeje kwibasira abaturage b’inzirakarengane b’abanyekongo ndetse yagize uruhare runini mu ishingwa ry’umutwe wa RUD-Urunana.

Nyuma yaho amashyamba ya Congo yaje gusharira maze mu mwaka wa 2011 ahitamo neza, ataha mu Rwanda.

Ashishikariza abo yasize mu mashyamba gutahuka kuko guhungabanya umutekano w’u Rwanda kuri bo ari inzozi.

Nizeyimana yashoboye gukora yiteza imbere. Ibikorwa bye n’umuryango we bamaze kugeraho, bimaze gutanga akazi ku bantu basaga 200 barimo n’abakora mu kigo gicunga umutekano yashinze.

Uwizeyimana Vestine umugore wa Nizeyimana watahutse mbere y’umugabo we, ashimira Perezida wa Repubulika Paul Kagame wakiriye abasirikare bo ku bwa Habyarimana akabashyira mu buzima busanzwe na bo bakaba biyumva nk’abanyarwanda.

Uyu munsi Col. (Rtd) Nizeyimana asigaye ari rwiyemezamirimo ukomeye mu buhinzi n’ubworozi.

Komisiyo yo gusezerera mu ngabo abahoze ari abasirikare (RDRC) ivuga ko ishingiye ku byagezweho n’aba bose bimaze gutanga umusaruro.

Mu 12,700 bamaze gusezererwa, harimo abagabo 12,195 abagore bari abasirikare 124, abana b’abakobwa 47 ndetse n’abana b’abahungu 36. Abagera kuri 77 bakaba ari bo bakiri i Mutobo.

  • NTAWITONDA JEAN CLAUDE
  • Mutarama 16, 2024
  • Hashize amezi 2
TANGA IGITEKEREZO
lg says:
Mutarama 16, 2024 at 1:46 pm

Abagore bubahwe cyane iyo uwo mubyeyi adataha mbere birashoboka ko Afande aba akiruka mumashyamba ya Congo aliko iyo ufite umugore muzima ufite ibitekerezo umugabo akamwumva nukuri uwo muryango ubona umugisha ibaze kwirirwa wiruka imisozi ngurarwanya igihugu reba guhomba umugabo nkuyu utanga akazi kubantu 200 !! igihugu gikeneye abantu bafite ubwenge nibitekerezo nkibi bizamura imiryango bizamura igihugu uli umuntu wumugabo tekereza ko hali abandi banze gutaha Leta barwanya yishyurira abana babo byose bourse haba muli kaminuza hano no hanze yigihugu !!harya buriya ngo bashaka Leta ikora ite!! ingaruka za moko twabonye icyo byakoze tubivemo tubirekere Cndd na Ndayishimye

Andika igitekerezo

AMATEGEKO AGENGA IYANDIKA RY'IGITEKEREZO CYAWE