Uko Umukinnyi wa filime Bahavu Jeanette abona urugo rwiza

  • MUTETERAZINA SHIFAH
  • Gashyantare 2, 2024
  • Hashize ibyumweru 3
Image

Umukinnyi wa sinema nyarwanda Usanase Bahavu Jeanette, ni umwe mu byamamare nyarwanda wahisemo gusangiza ubuzima bwe bwite n’ubw’urugo rwe abakunzi be, abinyujije cyane cyane ku mbuga nkoranyambaga ze zitandukanye by’umwihariko YouTube channel asangiye n’umugabo we Fleury.

Bahavu ni umukinnyi akaba n’umwanditsi wa filime zitandukanye, akaba yaramenyekanye cyane mu yitwa Impanga series akinamo nk’umukinnyi w’imena (Principle Actor).

Agaruka ku bijyanye n’urugo rwiza, mu kiganiro yagiranye na Rose tv show, yavuze ko kuri we asanga urugo rwiza ari urugo umuntu yibonamo kandi n’uwo bashakanye bikaba uko, ku buryo iyo umwe muri bo agiye akumbura kurugarukamo.

Ati: “Urugo rwiza ni ururimo abantu babiri bemera ko babaye umwe, ntibashake kuba babiri bavuye kurahira mu rusengero, urugo rwiza si urubamo abantu batajya bashwana, ahubwo ni urubamo abashwana bakihutira gukemura ibibazo bafite, ku buryo n’uhavuye muri bo akumbura kuhagaruka.”

Yongeraho ati: “Buriya kubaka biragora, kandi ntabwo n’umuyaga wagusenyera ngo ute ikibanza wubakagamo wiruke, ahubwo turongera tukagura amabati n’ibindi bikoresho, tugakomeza kubaka, ni yo mpamvu no kubaka urugo ukomeza gusanasana kugeza igihe binkundiye, kuko urugo rwawe uba uri kubaka si inguzanyo uba uri kubaka, ahubwo Imana iba yaraguhaye uwo mwubakana burundu, uba ugomba gutanga buri kimwe kugira ngo urugumane nawe umugumane.”

Abajijwe uko umugore mwiza agomba kumera, Bahavu yagize ati: “Umugore mwiza ni uwubaha Imana, kuko ntiwakubaha Imana ngo ntiwubahe umutware yaguhaye, ni ushobora kurwanira ishyaka urugo rwe, igihe cyose ntabone ko icyuho mu rugo cyatewe n’amakosa y’umugabo ngo ahore avuga ngo iyo ukora utya ntibiba byagenze gutya, mbere y’uko uvuga utyo, jya wibaza ku cyo wowe wakoze ngo ukumire ayo makosa.”

Akomeza agira ati: “Umugore mwiza ni ugira ibanga ry’urugo rwe, ibyarwo bikamenywa nawe n’uwo bubakanye n’Imana yarumuhaye, agasengera urugo rwe kandi kenshi.”

Agaruka ku bijyanye no guhuza kuba icyamamare n’ubuzima bw’urugo, Bahavu yavuze ko kuri we nta cyamurutira umuryango.

Ati: “Kubihuza biroroha cyane cyane iyo wamaze kumenya igifite agaciro kurusha ikindi, ni ukuvuga ngo umuryango wanjye ufite agaciro kurusha akazi nkora, kuba icyamamare byari byiza kandi narabikundaga, ariko nkabona ko bivuye mu buzima bwange nakomeza nkaba Jeanette, kandi ngashaka ikindi nkora, ariko umuryango wanjye nywutakaje nahinduka undi wundi.”

Uyu mukinnyi ukunzwe n’abatari bake, avuga ko atari byiza ko wasenya urugo rwawe kubera ubwamamare, keretse uwo mwashakanye waramushatse umukurikiyeho kwamamara.

Yanagarutse ku kibazo abantu bakomeje kwibaza niba, arimo gutegura kuba umuvugabutumwa bitewe naho bamubonye yigisha mu rusengero.

Yagize ati: “Ndi Usanase Bahavu Jeanette, Ndayirukiye, mama Amora, nkaba nkora umurimo w’Imana mbinyujije mu kwandika no gukina filime gusa.”

Bahavu ni Umwanditsi akaba umukinnyi wa filime, wabyigiye mu ghugu cya Koreya y’Epfo, akaba yaranatangiye kubyigisha abafite impano yo gukina.

  • MUTETERAZINA SHIFAH
  • Gashyantare 2, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE