Uko umugore yateye imbere mu myaka 30 ishize u Rwanda rwibohoye

  • ZIGAMA THEONESTE
  • Mata 3, 2024
  • Hashize ibyumweru 2
Image

Imyaka 30 irashize u Rwanda rwibohoye, muri byinshi byishimirwa byagezweho harimo kuba abagore barahawe uburenganzira, busesuye muri byose biganisha ku iterambere ry’igihugu ndetse bagira n’uburenganzira bungana n’ubw’abagabo.

Uko kwimakaza uburinganire ni urugendo rwatangijwe na Guverinoma y’u Rwanda kuva mu 1994, nyuma y’aho Jenoside yakorewe Abatutsi yari imaze guhagarikwa.

Mu gihugu abagore bari barakandamijwe ku buryo nta burenganzira bagiraga ku mitungo, bakabuzwa kwiga ndetse ntibemererwaga gufunguza konti muri Banki ntibanahabwe n’akazi mu nzego zimwe na zimwe.Ibyo biri muri byinshi byahinduwe mu myaka 30 ishize.

Uko gukandamiza abagore bagahezwa muri sosiyete kandi byari byaratijwe umurindi na Politiki mbi yariho muri Jenoside na mbere yayo aho uwari Minisitiri w’Umuryango no Kurengera Abagore, Nyiramasuhuko Pauline, yagize uruhare muri Jenoside ndetse ubwe yatanze itegeko ry’uko Abatutsikazi bafatwa ku ngufu bakanicwa.

Kuri ubu umugore yatejwe imbere ndetse ashyirirwaho n’amategeko amurengera.

Minisitiri w’Uburinganire n’Iterambere ry’Umuryango (MIGEPROF), Dr Uwamariya Valentine yatangarije itangazamakuru ko kugeza ubu uburinganire bumaze kugera ku gipimo gishimishije ushingiye ku rugendo rw’imyaka 30 ishize.

Yagize ati: “Twatangiye uru rugendo guhera mu 1994 nyuma ya Jenoside yakorewe Abatutsi. Hashyizweho Politiki yo guteza imbere Abanyarwanda bose ariko hibandwa ku banyantege nke harimo n’abagore kuko byari bimaze kugaragara ko hari bamwe mu babohoye igihugu b’abagore, bigaragaza ko na bo bafite ubushobozi bwo gutanga umusanzu wabo mu kubaka igihugu, bityo hafatwa icyemezo ko umugore na we ahabwa umwanya muri gahunga z’iterambere mu gihugu cyacu.”

Yakomeje avuga ko mu mashuri, yaba abanza n’ayisumbuye abahungu n’abakobwa bangana.

Mu rwego rw’ubuzima hari umubare munini w’abagore bapfaga babyara ndetse n’abana bapfaga bavuka, none ubu uwo mubare waragabanyutse mu buryo bugaragara.

Dr Uwamariya ati: “Twahaye rugari abagore na bo bajya mu Nteko Ishinga Amategeko ndetse no muri Guverinoma, ariko si ho gusa bari no mu bucuruzi, umubare w’abagore umaze kuzamuka. Dufite abagore bayobora banki zikomeye z’ubucuruzi n’amakoperative menshi bayobora, bagana ubuhinzi bwohereza umusaruro hanze y’igihugu, nk’ukomoka ku gihingwa cya kawa.Mu rwego rw’ubuzima hari abagore bakoramo unahereye ku bajyanama b’ubuzima. Nk’igihugu twishimiye uru rugendo rw’imyaka 30.”

Minisitiri w’Uburinganire n’Iterambere ry’Umuryangoavuga Leta ikomeje gushyira imbaraga mu kuziba ibyuho bigihari.

Ati: “Ntabwo twavuga ko turi kure cyane mu kuziba ibyuho bigaragara mu kwimakaza uburinganire, ariko nanone, turacyafite urugendo rurerure rwo kuziba ahakigaragara ibyo byuho by’aho uburinganire butaragera.”

Hashyizweho politiki n’amategeko bihamye, guhera mu 2003 hatowe Itegeko Nshinga ryemerera abagore kujya mu nzego zifata ibyemezo.

Yagize ati: “Mu myanya ya politiki abagore barahagarariwe, mu bagize Inteko ishinga Amategako Umutwe w’Abadepite bari ku gipimo cya 61,3%. Muri Guverinoma bari kuri 42,4%. Mu rwego rw’ubutabera abagore bari kuri 51% by’abacamanza bakoramo.”

Yongeyeho ati: “Mu nzego ziyobora Uturere turacyafitemo icyuho. Abagore bayobora Uturere ni 30%, Abayobozi b’Uturere Bungirije bashinzwe Ubukungu b’abagore bari kuri 15%, mu gihe abari mu Nama Njyanama y’Akarere ari 46,1%, abagore bari ku mwanya w’Umuyobozi w’Akarere Wungirije Ushinzwe Imibereho myiza y’Abaturage bari ku ijanisha rya 78%.

Ku rwego rwa Guverineri w’Intara n’Umuyobozi w’Umujyi wa Kigali abagore bari ku gipimo cya 20%. Mu nzego z’abikorera, abagore bayobora Koperative mu Rwanda ni 38% ndetse abagore bayobora isoko ry’umusaruro ukomoka ku buhinzi bari kuri 51,4%.”

Minisitiri Dr Uwamariya yagaragaje icyerekezo cy’umugore mu myaka 30 iri imbere.

Ati: “Umugore mu mwaka wa 2050, ubwo ni imyaka 30 uhereye ubu, ni umugore uzaba atanga umusanzu we mu iterambere birenge kubaka umurango we, anateze imbere igihugu. Igihugu gikeneye kumubona yubaka imihanda, yubaka ibibuga by’indege n’ibindi.”

Imibare yashyizwe ahagaragara n’Umuryango wita ku bukungu ku Isi (World Economic Forum) mu mwaka ushize, yagaragaje ko u Rwanda ruri ku mwanya wa kabiri ku mugabane w’Afurika mu kwikamaza ihame ry’uburinganire bw’abagabo n’abagore.

  • ZIGAMA THEONESTE
  • Mata 3, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE