Uko Niwe yinjiye mu burezi bumwinjiriza asaga miliyari 12 Frw

  • KAYITARE JEAN PAUL
  • Mutarama 25, 2024
  • Hashize amezi 4
Image

Mu Nama y’Igihugu y’Umushyikirano yarangiye ku wa Gatatu tariki 24 Mutarama 2024, hagiye hatanzwe ubuhamya bw’abiteje imbere biturutse ku miyoborere myiza ya Perezida wa Repubulika Paul Kagame nk’uko babigarukagaho.

Niwe Chaste, ni umwe mu bagaragaje uko yinjiye mu burezi bumwinjiriza amafaranga y’u Rwanda asaga miliyari 12 ku mwaka.

Arangije amashuri yagarutse mu Rwanda yumva ko ibintu byinshi bihurira ku burezi, ko abantu ari bwo bukungu fatizo bw’Igihugu.

Ibyo byatumye ashaka kujya kuba mwarimu ariko atekereza ku burezi buteza imbere umuntu.

Buri mwaka bafasha abanyeshuri basaga 100 ba bahanga bajya kwiga hanze cyane cyane no mu Rwanda.

Ati: “Buri mwaka tubona miliyoni zisaga 10 z’amadolari y’Amerika ku banyeshuri ba Banyarwanda ndetse n’Abanyafurika.

Navuga ko kujya mu burezi byaturutse kuri iyo nzara yo kumva ni ukubera iki dukennye, ni gute ubwo bukire fatizo twabukoraho, ni gute twakongera ubumenyi.

Akenshi twigaga tuvuga tuti nige mbone igipapuro ngende nsabe akazi, ubwo ni bwo bwari uburezi.”

Niwe ni Umuyobozi Mukuru w’Ikigo Bridge to Rwanda, avuga ko yafashe icyemezo cyo kujya mu burezi akiri muto.

Mu buhamya bwe yavuze ko ari umwe mu banyeshuri bigiye mu ishuri ribanza ryiza, aho batsindaga ari babiri mu kigo.

Kugira abana babiri biga mu mashuri yisumbuye, ahamya ko byabaga ari igitangaza, bavugaga ko uwo muryango wabyaye neza.

Mu rugendo rwe rw’amashuri, Niwe avuga ko yabaye muri babiri bashoboye kwiga amashuri yisumbuye.

Agira ati: “Byahindutse cyane mbonye amahirwe yo kujya kwiga hanze muri Bridge to Rwanda ari na yo nyobora ubungubu, njya kwiga muri kaminuza ikomeye cyane.”

Uretse no kuba atararotaga kuyigamo nta nubwo yari azi ko ibaho.

Bridge To Rwanda ni ikigo gitegura abana batsinze neza kubona amahirwe mpuzamahanga. Ntabwo bitaga aho umuntu aturuka niba yarigiye mu ishuri ribanza ryiza, upfa kuba waratsindaga.

Agiye kwiga hanze yiyumvishije ko agomba kwiga ibijyanye n’ubukungu.

Icyo gihe yashakaga kumenya impamvu ibihugu bimwe bikennye ibindi bikize, kuki Afurika yasigaye inyuma mu mateka, muri make yashakaga kumva impamvu ibihugu byageze ahongaho.

Ati: “Hari igihe tubifata nk’aho gukena ari yo kamere yacu, ko ari wo mugabane muri make, ariko si byo.

Hari sisiteme, hari ubukungu, amateka abiri inyuma rero nayize bimpa inzozi n’inzara yo kumva ko ibintu bishoboka.”

Yasabye ko Abanyarwanda bakwiye kugira icyerekezo gishya cy’uburezi butuma umuntu yikura mu bukene, yikura mu bitekerezo bimuhutaza cyangwa bituma atagera aho ashaka kugera.

Avuga ko Abanyarwanda badakwiye kubona utuntu duto duto ahubwo bakwiye gutekereza amahirwe mpuzamahanga afunguye kandi ko uko ari na we yisanze mu burezi.

  • KAYITARE JEAN PAUL
  • Mutarama 25, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE