Uko ishyaka rya UNAR ryashenywe n’Ababiligi

  • Imvaho Nshya
  • Ugushyingo 15, 2023
  • Hashize amezi 3
Image

Iyi nyandiko ni iya Tito Rutaremara yatambukije ku rubuga rwe rwa X rwahoze ari Twitter.

Uko Ababiligi basenye UNAR (Union Nationale Rwandaise, Abashyirahamwe b’u Rwanda.) Ishyaka rya UNAR ryavutse tariki 13 Nzeri 1959; ryari riyobowe na Rucyeba.

UNAR yari igizwe n’Abahutu, Abatutsi n’Abatwa (Yari igizwe n’Abahutu benshi), abatutsi benshi bakomeye bari muri RADER (Rassemblement Démocratique Rwandais) kuki UNAR yanzwe, ikarwanywa n’abakoloni (Kiliziya Gatolika na Leta y’Ababiligi).

Icya mbere n’uko UNAR ryari ishyaka ry’aba Nationaliste kandi rifite amatwara ya kirwanashyaka nkaya ba-Lumumba, Kwame Nkrumah, Nyerere n’abandi.

Icya Kabiri, UNAR yashakaga ubwigenge bw’uwo mwanya, ni yo yasabye ko babona ubwigenge muri 1962.

Icya Gatatu, mu mashuri no kwigisha no mu buvuzi bw’abantu byarimo amacakubiri, cyane cyane mu mashuri aho abandi banyarwanda bo mu yandi madini batari bemerewe kwiga mu mashuri y’abagatolika kandi ni bo bari bashinzwe uburezi bwose bwo mu Rwanda.

UNAR yifuzaga ko amashuri agengwa na Leta (Ni cyo cyatumye yangana n’idini Gatolika).

Ikindi cya kane ni uko Abanyarwanda benshi mu nzego zose bari inyuma ya UNAR, bari bayishyigikiye. Ibi byateraga ubwoba abakoloni na Kiliziya Gatolika.

Gusenyuka kwa UNAR, UNAR yabayeho amezi ageze kuri atatu ikora inama nini 3 gusa, zitera ubwoba abakoloni na Kiliziya Gatolika, kubera ubwinshi bw’abayitabiraga.

Ndibuka ko inama ya mbere ya UNAR yabereye muri Kigali, abanyeshuri bo muri Sainte André twarayitabiriye (Nanjye nari ndimo) abakuru ba UNAR baravuze ariko discours ya Rucyeba ni yo yadushimije twese kuko yavugaga ko abazungu bataraza mu Rwanda rwariyoboraga, aho baziye bararusenya, none turagira ngo bagende twiyobore kandi tuziyobora neza.

Muri abo banyeshuri harimo na Twagiramungu Faustin w’iwabo wa Rucyeba bose baturukaga i Shangugu ubu ni Cyangugu (Rusizi) maze Faustin afata mu mutwe imbwirwaruhame yose ya Rucyeba, nijoro abaturindiraga umutekano bataha, akayidusubiriramo muri dorutwari, Twagiramungu rero tuza kumwita RUNAR (Nubwo kera hanyuma yaje kurongora muri Paremehutu akaza kuba na Perezida wa Paremehutu)

Guhera muri 1959 kugeza1960 irangira, Ababiligi birukanye abayobozi bakuru ba UNAR, abandi babakura ku kazi baranabafunga, abandi barahunga batinya gufungwa.

Aba bayobozi bose ba UNAR barimo Abahutu, Abatutsi n’Abatwa.

Hagati muri 1961-1962 ubutegetsi bw’Ababiligi bwatangiye kwirukana aba UNAR b’Abatutsi gusa, Abahutu bakabaca ibihano (Ufite inka agatanga inka, ufite ihene agatanga ihene, ufite duke agatanga inzoga, utagize icyo agira agakubitwa ibiboko.

Abo bose ariko bagombaga guhanirwa impamvu bagiye muri UNAR ubwo guhera icyo gihe nabwo ni bwo batangiye kwirukana Abatutsi bose n’abatari mu ishyaka rya UNAR babahora ko ari Abatutsi gusa.

Muri za 1962 hamaze kujyaho ishyaka Paremehutu rimaze kubona ubwigenge, rishyiraho politike yo kwica Abatutsi bose n’abana n’abagore.

Urugero nka Gikongoro hishwe hagati ya 10,000 na 20,000. Mu gihe gitaha tuzaganira ku by’Inyenzi ni icyatumye zitsindwa.

TITO RUTAREMARA

  • Imvaho Nshya
  • Ugushyingo 15, 2023
  • Hashize amezi 3
TANGA IGITEKEREZO
Innocent Nahimana says:
Ugushyingo 15, 2023 at 6:26 pm

Umusaza. Muzadufashe mutwandikire ibitabo muri ayo mateka natwe abato tuzabisome tumenye uko hambere byari bimeze tubone imbaraga nyazo zizadufasha guteza imbere ubumwe bwacu n’Igihugu muri rusange nkunda amateka ariko simbona ibitabo bivuga amateka y’uRwanda mukinyarwanda mudufashe kuko ngo utazibiyo ava atamenya iyo ajya murakoze

Andika igitekerezo

AMATEGEKO AGENGA IYANDIKA RY'IGITEKEREZO CYAWE