UK: Itegeko ryohereza abimukira mu Rwanda rigiye gusubizwa mu Nteko

  • NTAWITONDA JEAN CLAUDE
  • Mutarama 10, 2024
  • Hashize amezi 5
Image

Umushinga w’Itegeko rishyigikira gahunda ya Guverinoma y’u Bwongereza yo kohereza abimukira mu Rwanda, rigiye gusubizwa mu Nteko Ishinga Amategeko mu cyumweru gitaha kugira ngo rirusheho kunozwa.

Minisitiri w’Intebe w’u Bwongereza Rishi Sunak yemeye ko uwo mushinga usubira mu Nteko Ishinga Amategeko nyuma y’uko uzamuye impaka umaze kwemezwa rizamuye impaka mu Badepite na bamwe mu bagize Guverinoma mu kwezi gushize.

Tariki 12 Ukuboza 2023 ni bwo abagize Inteko Ishinga Amategeko y’u Bwongereza bagejejweho umushinga w’Itegeko witezweho gufasha iki gihugu gukuraho inzitizi zose zishobora gutuma gahunda yo kohereza abimukira mu Rwanda izamo kirogoya.

Abagera kuri 313 mu Badepite b’u Bwongereza batoye bashyigikira uyu mushinga na gahunda yo kohereza abimukira mu Rwanda, mu gihe abatoye ko batawushyigikiye bari 269.

Minisitiri w’Intebe w’u Bwongereza Rishi Sunak yakomeje guhangana n’impungenge abataratoye uwo mushinga bagaragaje, berekana ko uwo mushinga ukirimo ibyuho bizatuma n’ubundi wongera gutambamirwa n’inkiko.  

Guverinoma yegukanye intsinzi ku nshuro ya mbere mu gihe hari abatari babyiteze kuko mu biganiro byabanje guhuza abadepite hari abagera kuri 30 babarizwa mu ishyaka riri ku butegetsi bari bifashe banga kujora cyangwa kwemeza iby’uwo mushinga.

Gusa hari bamwe mu badepite bavuze ko iryo tegeko bazemera kuritora igihe rizaba ryarushijweho gukazwa kugira ngo ritazongera guhura n’imbogamizi zo mu nkiko.

Ku wa Kabiri tariki ya 16 n’iya 17 Mutarama 2024, ni bwo ABadepite bazongera guhura bakarebera hamwe icyahinduka mu itegeko ryabanje nk’uko byemejwe na Perezida w’Inteko Ishinga Amategeko.

Guverinoma ikomeje gushyira imbaraga mu kunoza urugendo rwo kwakira abimukira mu buryo bwubahirije amategeko, hagamijwe gukumira ibihumbi amagana by’abambuka amazi y’ahitwa Channel mu bwato buto bushyira ubuzima bwabo mu kaga.

Ababambutsa babakura mu gihugu cy’abaturanyi cy’u Bufaransa ahitwa Calais bakabageza ku nkombe iherereye mu Majyepgo y’u Bwongereza.

Minisitiri w’Intebe Sunak yiyemeje guhagarika ubwo bwato, inzira rukumbi ihari ikaba ari iyo kohereza by’agateganyo mu Rwanda kugira ngo ubusabe bw’abakeneye guhabwa ubuhungiro cyangwa impamvu zatuma bemererwa gutura mu Bwongereza bibazne bisuzumanwe ubwitonzi.

Mu Kwezi k’Ugushyingo 2023, Urukiko rw’Ikirenga rw’u Bwongereza rwanzuye ko kohereza abimukira mu Rwanda bishobora kunyuranya n’amasezerano ndetse n’amahame yo kubahiriza uburenganzira bwa muntu yok u rwego rw’igihugu na mpuzamahanga.

Umushinga mushya w’itegeko uha ubushobozi babagize Guverinoma y’u Bwongereza kwirengagiza imwe mu myanzuro y’Urukiko rw’u Burayi ruharanira Uburenganzira bwa Muntu (ECHR) rukorera i Strasbourg, ariko ntirutesha agaciro amasezerano y’u Burayi agenga impunzi n’abimukira muri rusange.

Zimwe mu mpungenge zatumye Robert Jenrick wari Minisitiri ushinzwe kwita ku Bimukira mu Bwongereza yegura, zirimo kuba Guverinoma ishinjwa kuba yarirengagije amategeko mpuzamahanga amwe n’amwe yatumye ijyanywa mu nkiko bikadindiza uyu mushinga ubonwa nk’amahirwe ya nyuma yo gukemura ikibazo cy’abimukira mbere y’uko habaho amatora muri uyu mwaka.

Kuri ubu iryo tegeko rigiye gusubira mu Nteko Ishinga Amategeko, biteganyijwe ko izo mpungenge zose zizasuzumanwa ubwitonzi mu gukumira ko Leta yakongera kujyanwa mu nkiko kubera iyo gahunda.

  • NTAWITONDA JEAN CLAUDE
  • Mutarama 10, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE