Uganda yihariye ibihembo mu mikino ya EALA

  • SHEMA IVAN
  • Ukuboza 19, 2023
  • Hashize amezi 5
Image

Inteko Inshinga Amategoko ya Uganda ni yo yihariye ibihembo mu mikino y’abagize Inteko Zishinga Amategeko zo mu bihugu bigize Umuryango w’Afurika y’Iburasirazuba (EAC) izwi nka ‘’EALA Games’’yaberaga mu Rwanda.

Iyi mikino yari imaze iminsi 11yasojwe ku wa Mbere tariki 18 Ukuboza 2023 mu birori biryoheye ijisho  byabereye muri Kigali Conference and Exhibition Village hazwi nka Camp Kigali.

Imikino ya EALA iteganywa n’Ingingo ya 49 mu zishyiraho uru rwego, yari ibaye ku nshuro ya 13 kuva mu 2001. Ikaba ubwa gatatu ibereye mu Rwanda.

Imikino yakinwe muri iri rushanwa irimo umupira w’amaguru, basketball, volleyball, netball, Darts ikinwa n’abafite ubumuga, Walk of Race, Tag of Wall n’imikino Ngororamubiri. 

Perezida wa sena y’u Rwanda Dr François Xavier Kalinda yavuze ko iyi mikino itari ifite inyungu gusa mu kujya mu kibuga bagakina, ahubwo hari n’uruhare yagize mu kubaka ubumwe bw’abayitabiriye.

Ati: “Ntabwo iyi mikino yashyizweho kugira ngo dushake umusaruro mu kibuga gusa, ahubwo ni ukuganira nyuma y’imikino tukumva ibintu kimwe ku bifitiye inyungu Akarere duherereyemo.”

“Iyi mikino kandi ni ikimenyetso cy’intego Umuryango w’Afurika y’Iburasirazuba wihaye wo kubaka no gushaka ibisubizo by’amahoro ku bihugu biwugize.”

Ibihembo byatanzwe

Uganda ni yo yitwaye neza kurusha andi makipe yose mu mikino itandukanye. Muri ruhago, yegukanye Igikombe itsinze imikino yose (5) n’ikinyuranyo cy’ibitego 20.

Indi mikino yagizemo abakinnyi bahize abandi ni muri Volleyball y’Abagore, Basketball y’Abagabo, Golf y’Abagore, gusiganwa 400 mu bagore no mu bagabo no gusiganwa ku maguru 100 mu bagabo.

Abanya Uganda bitwaye neza ku giti cyabo harimo Akello Christine wakinnye Walking Race, Acon Julius wasiganwe metero 1500 mu bagabo na Ssekitoleeko Robert watsinze metero 400 naho mu bagore cyegukanywe n’Umunyarwandakazi, Mukabalisa Germaine, ahabwa umudali wa zahabu nk’abandi bose babaye aba mbere mu byiciro bitandukanye.

Imidali ibiri ya Zahabu yabonetse ku ruhande rw’u Rwanda ni uwa Mukabalisa Germaine mu gusiganwa ku maguru n’uwa Rwaka Pierre Claver muri Darts bakina bicaye.

Muri Golf, u Rwanda rwabaye urwa kabiri mu bagore n’urwa gatatu mu bagabo; mu gusiganwa ku maguru ruba urwa kabiri muri metero 400 mu bagore mu gihe kandi rwabaye urwa kabiri muri Volleyball y’abagabo.

Uko ibihugu byakurikiranye mu bihembo

Uganda yatwaye imidali 28, Tanzania yatwaye imidali 16, Kenya yatwaye imidali 14, Sudani yepfo yatwaye imidali 12, Rwanda yatwaye imidali 6, EALA yatwaye imidali 2, Burundi yatwaye umudali 1.

Muri rusange iyi mikino yitabiriwe n’ibihugu bitanu birimo U Burundi, Kenya, Tanzania, Uganda, Sudani y’Epfo n’u Rwanda rwakiriye.

Imikino itaha ku nshuro ya 14 izabera mu gihugu cya Kenya.

  • SHEMA IVAN
  • Ukuboza 19, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE