Umuhanzi Ava Peace wo muri Uganda yamaganye amakuru amaze iminsi akwirakwira avuga ko yaba yaranze gukorana indirimbo na Sheebah Karungi kubera ko yinjiye mu itsinda ry’ubujyanama rya Team No Sleep (TNS), ryahoze rikorana na Sheebah, agamije kumusimbura.
Yagiye mu kiganiro yagiranye n’imwe muri televiziyo zo muri Uganda ku wa 9 Kamena 2026, ubwo yabazwaga ku makuru avuga ko adashishikajwe no gukorana indirimbo na Sheebah Karungi.
Yagize ati: “Ntabwo ari byo. Sinakwanga gukorana indirimbo na Sheebah Karungi. Ni ikintu nakwemera nta gutekereza kabiri. Byaba ari ibintu byiza cyane ndamutse mbonye amahirwe yo gukorana na we.”
Ava Peace yavuze kandi ko ibimuvugwaho byo kuba yarinjiye muri TNS agamije gusimbura Sheebah Karungi nta shingiro bifite.
Yagize ati: “Ibyo si byo. Ntabwo ndi umusimbura wa Sheebah. Ntibikwiye ko ngereranywa na we kuko buri umwe muri twe akora umuziki we mu buryo bwe.”
Amakuru y’itandukana rya Sheebah Karungi na Team No Sleep (TNS) ya Jeff Kiwa yatangiye gukwirakwira ku mbuga nkoranyambaga ku wa 9 Ukuboza 2021. Icyo gihe byatangajwe ko Sheebah agiye gukomeza urugendo rwe rwa muzika nk’umuhanzi wigenga nyuma y’imyaka 10 yari amaze akorana n’iri tsinda.
Mu Ugushyingo 2023, Ava Peace na we yatangiye gukorana na Team No Sleep (TNS) ya Jeff Kiwa nyuma yo gutandukana n’ubuyobozi bwa Mudra. Kuva icyo gihe, Jeff Kiwa yatangiye kumufasha mu guteza imbere umuziki we.
Ibi ni byo byatumye bamwe mu bakurikiranira hafi imyidagaduro muri Uganda bavuga ko gukorana hagati ya Ava Peace na Sheebah Karungi bishobora kutoroha, bakeka ko Ava Peace yaba yaragiye muri TNS asimbura Sheebah. Gusa uyu muhanzikazi yavuze ko ibyo ari ibitekerezo bidafite ishingiro, ashimangira ko yiteguye gukorana na Sheebah igihe cyose haboneka umushinga ubahuza.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE