UEFA Europa League: Liverpool na AS Roma zatsinzwe

  • Imvaho Nshya
  • Ugushyingo 10, 2023
  • Hashize amezi 4
Image

Liverpool yatsinzwe na Toulouse ibitego 3-2, AS Roma itsindwa na Slavia Praha ibitego 2-0 naho Brighton & Hove Albion itsinda Ajax Amsterdam ibitego 2-0, mu mikino y’umunsi wa kane w’amatsinda ya UEFA Europa League yabaye ku mugoroba wo ku wa Kane tariki 9 Ugushyingo 2023.

Toulouse yo mu Bufaransa ikinamo Umunyarwanda Warren Kamanzi, yari yakiriye Liverpool kuri Stade de Toulouse iyitsinda ibitego 3-2 byatsinzwe na Aron Donnum ku munota wa 36, Thijs Dallinga 58’na Frank Magri 76.

Ni mu gihe Liverpool yatsindiwe na Diogo Jota na Cristian Casseres jr witsinze. Muri iri tsinda LASK yo muri Autriche yanyagiye Union St.Gilloise ibitego 3-0.

Nubwo yatsinzwe, Liverpool ikomeje kuyobora iri tsinda rya gatanu n’amanota icyenda, ikurikiwe na Toulouse ifite amanota arindwi ndetse na Union St. Gilloise ifite ane.

Undi mukino wari utegerejwe n’abantu benshi, ni uwo mu itsinda rya kabiri Ajax Amsterdam yari yakiriyemo Brighton & Hove Albion yo mu Bwongereza.

Iyi kipe yari mu rugo yatsinzwe ibitego 2-0 bya Ansu Fati na Simon Adingra ikomeza kujya habi kuko kugeza ubu ari yo ya nyuma mu itsinda n’amanota abiri.

Muri iri tsinda, AEK Athens yo mu Bugereki yatsindiwe mu rugo ibitego 2-0 na Marseille byatsizwe na Chancel Mbemba na Ismaïla Sarr.

Mu itsinda rya mbere, West Ham United yo mu Bwongereza yatsinze igitego 1-0 Olympiacos yo mu Bugereki cyatsinzwe na Lucas paqueta ku munota wa 73, naho Freiburg yo mu Budage inyagira TSC Backa Topola ibitego 5-0.

Kugeza ku munsi wa kane, iri tsinda rya mbere riyobowe na West Ham ifite amanota icyenda, inganya na Freiburg ya kabiri, Olympiacos ikagira ane ku mwanya wa gatatu.

Mu itsinda G, AS Roma yari yasuye Slavia Prague yo muri Repubulika ya Czech itsindirwayo ibitego 2-0 iyikura ku mwanya wa mbere. Ni mu gihe Servette yo mu Busuwisi na yo yatsinze FC Sheriff ibitego 2-0.

Iri tsinda riyobowe na Slavia Prague n’amanota icyenda, inganya na AS Roma ya kabiri, Servette iri ku mwanya wa gatatu ifite amanota ane.

Mu itsinda F Villarreal yatsinze Maccabi Haifa ibitego 2-1, Rennes yatsinze Panathinaikos ibitego 3-1.

Mu itsinda D Atalanta itsinda Strum Gaz igitego 1-0, naho Sporting yo muri Portugal itsinda Rakow ibitego 2-1. Imikino y’umunsi gatanu mu matsinda uzakinwa tariki 30 Ugushyingo 2023.

SHEMA IVAN

  • Imvaho Nshya
  • Ugushyingo 10, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE