UEFA Champions League: PSG yabonye intsinzi, Bayern Munich itsindirwa mu Butaliyani

  • SHEMA IVAN
  • Gashyantare 15, 2024
  • Hashize amezi 2
Image

Paris Saint-Germain yatsinze Real Sociedad ibitego 2-0, naho Lazio de Rome itsinda Bayern Munich igitego 1-0 mu mikino ibanza ya ⅛ cya UEFA Champions League.

Iyi mikino yabaye mu ijoro ryo ku wa Gatatu, tariki 14 Gashyantare 2024.

Umukino wa Paris Saint-Germain na Real Sociedad watangiye utuje cyane, amakipe yombi umupira ukinira hagati cyane.

PSG yanyuzagamo igasatira binyuze kuri Kylian Mbappé ariko yagera imbere guhererekanya na bagenzi nka Bradley Barcola na Ousmane Dembélé ntibikunde neza.

Mu minota 30, Real Sociedad yatangiye kwinjira mu mukino ihererekanya neza ariko kumenera mu bwugarizi bwa PSG bikaba ikibazo.

Iyi kipe yatangiye kugerageza uburyo bwo guterera amashoti akomeye hanze y’urubuga rw’amahina. Ku munota wa 44, Kapiteni Mikel Merino yateye ishoti rikomeye, umupira ukubita umutambiko w’izamu uvamo.

Iyi kipe yatangiye kugerageza uburyo bwo guterera amashoti akomeye hanze y’urubuga rw’amahina. Ku munota wa 44, Kapiteni Mikel Merino yateye ishoti rikomeye, umupira ukubita umutambiko w’izamu uvamo.

Igice cya Mbere cyarangiye amakipe yombi anganya ubusa ku busa.

Mu gice cya kabiri PSG yatangiranye imbaraga nyinshi itangira gusatira bikomeye.

Ousmane Dembélé yateye koruneri nziza, Marquinhos akina n’umutwe umupira usanga Mbappé atsinda igitego cya mbere ku munota wa 58.

Iyi kipe y’i Paris yarushakaga Real Sociedad, yakomeje guhusha ibitego byinshi binyuze kuri Mbappé.

Ku munota wa 63, uyu Mufaransa yateye ishoti rikomeye, Umunyezamu Álex Remiro arikuramo rikubita umutambiko w’izamu rijya hanze.

Dembélé yacenze abakinnyi ba Real Sociedad hagati mu kibuga, atanga umupira kwa Fabian Luis utawutindanye, awucomekera Barcola azamuka yihuta ku ruhande rw’ibumoso ndetse atsinda igitego cya kabiri ku munota wa 70.

Muri iki gice, iyi kipe yo muri Espagne yarushijwe bikomeye ku rwego wabonaga yabuze ibisubizo nubwo yakoraga impinduka zitandukanye.

Umukino warangiye Paris Saint-Germain yatsinze Real Sociedad ibitego 2-0 itera intambwe igana muri ¼.

Mu wundi mukino Lazio de Roma yari mu rugo mu gihugu cy’u Butaliyani, yatsinze Bayern Munich igitego 1-0 cyatsinzwe na Rutahizamu Ciro Immobile kuri penaliti, nyuma y’ikosa myugariro Dayot Upamecano yakoze ryatumye anahabwa ikarita y’umutuku ku munota wa 67.

Bwa mbere kuva 2019, Bayern München yasoje umukino idateye mu izamu.

Imikino yo kwishyura iteganyijwe tariki 5 Werurwe 2024. Ni mu gihe indi ibanza ya ⅛ iri mu cyumweru gitaha tariki 20 na 21 Gashyantare 2024.

  • SHEMA IVAN
  • Gashyantare 15, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE