Uducurama twaherukaga kuboneka mu myaka 40 ishize twavumbuwe mu Rwanda

  • NTAWITONDA JEAN CLAUDE
  • Werurwe 11, 2022
  • Hashize imyaka 2
Image

Ubwoko bw’uducurama bwashyizwe mu cyiciro cy’inyamaswa zibasiwe cyane aho byanakekwaga ko bwazimye burundu, bwabonetse mu Rwanda nyuma y’imyaka 40 butakiboneka ahandi hose ku Isi.

Biratangaje ko utwo ducurama bita “Hill’s Horseshoe Bat” twageze aho tugatahurwa ari turibi muri Pariki y’Igihugu ya Nyungwe mu gihe abahanga mu kubungabunga urusobe rw’ibinyabuzima bahwihwisaga ko nta handi twaba tukiboneka ku Isi.

Ikigo Mpuzamahanga gishinzwe kurengera uducurama (Bat Conservation International/BCI), ni cyo cyatangaje ko cyabonye uducurama tubiri bita Horshoe Bats mu buvumo bwa Nyungwe mu 2019, ariko cyemeza ko byafashe imyaka itatu yo kugenzura no kwemeza neza niba ari buriya bwoko koko.

Ubwoko bw’utu ducurama burangwa n’isura yihariye, byakomeje gukekwa ko bwazimye, ariko umwaka ushize byatangajwe ko ari ubwoko bwugarijwe no kuzimira. Muri iyo myaka yose ishize uko ari 40 nta makuru y’umubare w’utwo ducurama wigeze utangazwa ku buryo mu mwaka wa 2021, Ihuriro Mpuzamahanga ryita ku Bidukikije no kurengera urusobe rw’ibinyabuzima (IUCN) ryatangaje ko ubwo bwoko bw’uducurama bugeramiwe no kuzima burundu.

Umuyobozi w’Ikigo Mpuzamahanga gishinzwe kurengera uducurama (BCI) Jon Flanders, ku wa Kabiri w’iki cyumweru yavuze ko kongera kubona ubwoko bwari bwarazimiye byari iby’agahebuzo kandi bitangaje.

Yagize ati: “Biratangaje kumva ko tubaye abantu ba mbere babonye aka gacurama mu gihe kirekire gishize.”

Guhera mu mwaka wa 2013 ni bwo Umuryango BCI watangiye gufatanya n’Urwego rushinzwe Iterambere mu Rwanda (RDB) hamwe n’Ihuriro Nyarwanda rishinzwe kubungabunga ubuzima bw’ishyamba, mu gukora ubushakashatsi mu ishyamba rya Pariki y’Igihugu ya Nyungwe.

Mu mwaka wa 2019, nyuma y’iminsi 10 hakorwa ubugenzuzi mu buvumo bwose buri muri iryo shyamba, ni bwo abashakashatsi babonye ako gacurama. Umwe muri abo bashakashatsi witwa Winifred Frick yagizr ati: “Twahise tumenya ko agacurama dufashe kadasanzwe kandi kihariye. Ibigize isura yako bikabije kuba agatangaza kugeza n’aho bisekeje.”

Ibi biremwa bikunda kugenda ijoro byamenyekanye cyane nk’ibikoko bigira amenyo maremare atyaye cyangwa inyamaswa zikurura ibyorezo, no mu bihe bya COVID-19 utwo turemwa tukaba twarambitswe iyo sura nyuma y’aho abahanga bavuze ko iki cyorezo gishobora kuba cyaraturutse mu nyamaswa.

Uhereye ku ducurama duto cyane dupima garama ebyiri twitwa “bumblebee bat” ukageza ku tunini two muri Philippine bita “flying fox” dufite amababa areshya na metero 1.5, twose tubarirwa mu nyamaswa z’inyamabere ziri mu moko atanu ku Isi.

Mu gihe habarurwa ubwoko 1,321 bw’uducurama ku Isi, 40% muri two turi ku rutonde rutukura rugaragaza inyamaswa zigeramiwe no kuzima burundu, byose ngo bikaba biterwa n’ibikorwa bya muntu birimo no kwangiza amashyamba.

Ubuyobozi bwa BCI buhamya ko uducurama twatahuwe mu Rwanda dutanze amahirwe yo gutangira urugendo rwo kubungabunga ubwoko bwaherukaga kugaragara mu myaka 40 ishize, bukarindwa kuba bwakongera kubura burundu.

Umuyobozi wa BCI Flanders, yagize ati: “Ubu akazi kacu ka nyako ni ugushaka uko tubungabunga ubu bwoko mu gihe kizaza.”

Abashinzwe inyamaswa muri Pariki y’Igihugu ya Nyungwe ubu bashyizeho uburyo bwo gushakisha no gukurikirana utu ducurama tuguruka nijoro muri iri shyamba ry’inzitane.

  • NTAWITONDA JEAN CLAUDE
  • Werurwe 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE