Ubwiherero bwiza bugira uruhare mu kugabanya indwara ziterwa n’isuku nke

  • KAYITARE JEAN PAUL
  • Ugushyingo 22, 2023
  • Hashize amezi 6
Image

Bagabo George, Umuyobozi w’Impuzamiryango itari iya Leta ikora ku bijyanye n’isuku n’isukura, Washnet – Rwanda, yatangaje ko abantu bakwiye kugira isuku kugira ngo barwanye indwara ziterwa n’isuku nke.

Byagarutsweho kuri uyu wa Gatatu tariki 22 Ugushyingo 2023, ubwo hizihizwaga umunsi mpuzamahanga w’ubwiherero.

Ubusanzwe uyu munsi wizihizwa tariki 19 Ugushyingo buri mwaka.

Bagabo avuga ko iki ari cyo gihe cyo gufata ingamba zo kugira isuku n’isukura aho umuntu agenda hose.

Kugeza ubu Ikibazo gihari gikomeye, ngo ni icy’umwanda.

Ati: “Ikibazo ni isuku nke aho ushobora gusanga mu ngo z’abantu nta bwiherero bagira n’aho babufite bamara kubuvaho ntibakarabe intoki”.

Ubuyobozi bwa Washnet – Rwanda bugaragaza ko hari aho usanga hakiri ikibazo cy’isuku by’umwihariko ahahurira abantu benshi.

Buvuga ko ku isoko, aho banki zikorera, muri gare no muri santeri zihuriramo abantu benshi usanga nta bwiherero buba buhari.

Bagabo asaba ibigo bya Leta birimo n’amavuriro kugira ubwiherero ndetse n’ibikoresho bihagije muri ubwo bwiherero.

Ashima ko hari ibyo Leta yakoze nko gushyira imbaraga mu gushyiraho ibikorwa remezo birimo n’amazi muri gahunda zo gushimangira isuku n’isukura.

Murenzi Paul, Umuyobozi w’Umuryango ARDE/KUBAHO wibanda cyane ku isuku n’isukura muri gahunda zawo, yavuze ko umunsi mpuzamahanga w’ubwiherero ari ikintu baha agaciro.

Asobanura ko batangiye bigisha abaturage kugira isuku.

Akomeza agira ati “Dukora ubukangurambaga mu byaro tukigisha abaturage kugira isuku.

Dushishikariza Leta ndetse n’imiryango itari iya Leta kwigisha abaturage isuku n’isukura hakiyongeraho no gukoresha ubwiherero neza”.

Intego yabo ni ukugera ku bantu benshi kugira ngo bashobore kubigisha isuku.

Sindayigaya Aphrodis utuye mu Murenge wa Mugina mu Karere ka Kamonyi mu Ntara y’Amajyepfo, yabwiye Imvaho Nshya ko aho batuye nta bwiherero rusange buhagije buhari.

Yagize ati: “Aho dutuye muri Santeri, nta bwiherero rusange buhari ariko hari ubwiherero bumwe twubakiwe na ARDE/KUBAHO”.

Yishimira ko ubwiherero bubakiwe n’uyu muryango bufite ibikoresho byose bituma bakomeza kwimakaza isuku nk’impapuro z’isuku, amazi yo gukaraba n’isabune n’ibindi.

Minisiteri y’Ubuzima (MINISANTE) iherutse gutangaza ko mu bushakashatsi yakoze mu 2020 ifatanyije n’Ikigo cy’Igihugu cy’Ibarurishamibare, bwerekanye ko ingo 61% ari zo zifite ubwiherero bwujuje ibisabwa, mu gihe 3% bwagaragaje ko zitabufite namba.

Yavuze ko abantu bakarabye intoki bakoresheje amazi meza n’isabune byabarinda indwara ku kigero cya 40%, naho abakoresha ubwiherero neza bikabarinda ku kigero cya 30%.

  • KAYITARE JEAN PAUL
  • Ugushyingo 22, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE