Ubutwari no gukunda Igihugu birangwa no kukitangira – Guverineri Gasana

  • NTAWITONDA JEAN CLAUDE
  • Gashyantare 1, 2022
  • Hashize imyaka 2
Image

Guverineri w’Intara y’Iburasirazuba, CG Gasana K. Emmanuel, yasabye urubyiruko rw’abakorerabushake ruhagarariye abandi mu Turere twose tw’Igihugu kurangwa n’ubutwari no gukunda Igihugu.

Ibi yabigarutseho kuri uyu wa Kabiri tariki ya 01 Gashyantare 2022 mu karere ka Nyagatare, ubwo yagezaga ikiganiro ku rubyiruko rwitabiriye urugendo rugamije kwiga amateka y’urugamba rwo kubohora Igihugu.

Ni igikorwa cyahuriranye n’Umunsi w’Intwari z’Igihugu kizihiriza tariki ya 01 Gashyantare buri mwaka.

Guverineri Gasana yasobanuye ko ubutwari ari indangagaciro iranga abanyarwanda kuva kera kandi ngo ubutwari buturuka ku burere.

Avuga ko gukunda igihugu no kukitangira ari byo byatumye u Rwanda rubaho.

Akomeza agira ati: “Ubutwari no gukunda igihugu birangwa no kukitangira, izi ni indangagaciro zafashije mu kwagura u Rwanda.

Ibyo dusabwa ni byinshi, turasabwa ubutwari bwo kurinda ibyagezweho no kwirinda ingeso mbi ahubwo tugaresha amaboko yacu”.

Ubutwari ni ubw’Abanyarwanda

Ubutwari bw’abanyarwanda ni imwe mu ndangagaciro zaranze abanyarwanda kuva kera.

Umuyobozi w’Intara y’Iburasirazuba, CG Gasana, avuga ko ubutwari bufatwa nko kwiyemeza no gukora icyo ugamije byaba ngombwa ukaba wabizira.

Ati: “Ibyo twakwigira ku bakurambere bacu ni ukunoza umurimo, kugira ikerekezo no kugira igihugu kizarangwa no kwigira”.

Yagarutse ku rugamba rwo kubohora igihugu ashimangira ko rutashyigikiwe n’amahanga ahubwo ko ibihugu byahisemo gufasha Leta.

Ati: “Icyavuyemo nuko dufite igihugu kiza, gitekanye ndetse gifasha n’amahanga gutekana”.

Ashimangira kandi ko ubutwari bw’inkotanyi bwaranzwe n’ubushishozi bwa Perezida Paul Kagame wanayoboye urugamba rwo kubohora Igihugu.

Avuga ko mu rugamba rwo kubohora igihugu hibukwa n’abandi benshi baharaniye ubutwari bwo gutabara igihugu.

Ati: “Ibanga rikomeye ryaranze inkotanyi ni ikimwe gusa, ni ukwihangana nibura undi munota.

Ntabwo byari byoroshye kuko aho uwayoboye urugamba yadusanze ahantu habi cyane, yasanze byarangiye ntawavugaga ibintu byiza.

Yavuze ijambo rimwe ati umwanzi ntabwo akomeye ntafite imbaraga, ni mwebwe gutekereza kugira ngo duhindure imyumvire”.

Kuri uyu munsi w’Intwari, Insanganyamatsiko igira iti ‘Ubutwari mu Banyarwanda, agaciro kacu’.

Umunsi w’Intwari wizihizwa buri mwaka tariki ya 1 Gashyantare kuva mu 1999 kuko mbere yaho mu 1994 kugeza mu 1998 wizihizwaga tariki ya 1 Ukwakira ugahuzwa n’umunsi wo gukunda Igihugu.

  • NTAWITONDA JEAN CLAUDE
  • Gashyantare 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE