Ubutaka Butagatifu bwa Nyaruguru ntibukwiye abana bagwingiye-Bamporiki

  • Sedar Sagamba
  • Gashyantare 17, 2022
  • Hashize imyaka 2
Image

Uyu munsi ku wa 17 Gashyantare 2022, Umunyamabanga wa Leta muri Minisiteri y’Urubyiruko n’Umuco Hon. Bamporiki Edouard yagiranye ikiganiro n’abagize Komite Mpuzabikorwa y’Akarere  ka Nyaruguru ku mikorere n’imikoranire igamije gukemura ibibazo by’abaturage, abasaba  gufatanya gukemura ibikigaragara  mu  karere  birimo igwingira ry’abana.

Yagize ati: “Kuba mukuru ni inshingano, ni yo mpamvu nk’abakuru kandi nk’abayobozi mukwiye guharanira ko abaturage muyoboye babaho neza. Ubutaka Butagatifu bwa Nyaruguru ntibukwiye kuba bufite abana bagwingiye, abana bata ishuri cyangwa ibindi bibazo bihari”.

Hon. Bamporiki yababwiye ko kugira ngo ibyo byifuzwa bigerweho basabwa gutahiriza umugozi umwe, bakagirirana icyizere kandi bagaharanira kunoza ibyo bakora.

Ati: “Umuyobozi ukwiye, ni umuyobozi udatererana abo ayobora, ni udakorera ku jisho; ni nkore neza bandereho. Umuyobozi ukwiye ni utega amatwi kandi akumva abo ayobora. Kumva ni umukoro ukomeye utuma tunoza umurimo tugomba gukora”.

Yakomeje agira ati: “Umuturage w’Akarere ka Nyaruguru akwiye kuza mbere y’ibindi byose, mukwiye kumwumva, mukamuha agaciro kandi mukamwitaho uko bikwiye. Umuyobozi wese aho ava akagera akwiye kumva ko atasinzira adakemuye ikibazo cy’umuturage”.

Hon Bamporiki yanabaganirije ku  bijyanye no gukomeza guharanira ko u Rwanda rutera imbere rukaguka, anababwira ko bafite umukoro wo kurukundisha abato no kurukorera.

Ati: “U Rwanda ni ahantu (nk’Igihugu) kandi ni ukuntu (nk’intekerezo), iyo uvuze u Rwanda biguha umurimo wo kwanda no kwaguka kwarwo; igihe cyose dukwiye kubwira abana bacu n’abo tuyobora ko nta kiruta u Rwanda kuko ari rwo gakondo yacu”.

Muri iyi nama yitabiriwe  kandi n’Abadepite mu Nteko Ishinga Amategeko, abagize Komite Mpuzabikorwa y’Akarere ka Nyaruguru  basabye ubuvugizi bugamije kwihutisha iterambere  rya Kibeho ifatwa nka zahabu ya Nyaruguru, u Rwanda na Afurika yose.

Biteganyijwe ko muri uru ruzinduko rw’akazi rw’iminsi ibiri Umunyamabanga wa Leta muri Minisiteri y’Urubyiruko n’Umuco Hon. Bamporiki Edouard agirira mu  Karere ka Nyaruguru azanasura  imishinga minini y’Akarere irimo gushyirwa mu bikorwa n’ ibikorwa by’urubyiruko rukora imihanda mu Murenge wa Nyabimata.

Azatanga kandi ikiganiro ku ngamba zo kunoza imikorere y’Itorero ry’Umudugudu mu nama izahuza abakuru b’imidugudu 332 ya kariya karere.  Binyuze muri   gahunda y’Ukwezi k’Umuco mu mashuri,  azanaganira n’ abanyeshuri bo  mu Rwunge rw’Amashuri rwa Nyinawajambo i Kibeho.

Ukwezi k’Umuco mu mashuri ni gahunda yateguwe na Minisiteri y’Uburezi ku bufatanye na Minisiteri y’Urubyiruko n’Umuco irimo kubera mu mashuri yose mu gihugu; ay’inshuke, abanza n’ayisumbuye.

  • Sedar Sagamba
  • Gashyantare 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE