Uburusiya bwiteguye kurwana mu gihe cy’ubukonje

  • KAYITARE JEAN PAUL
  • Ukuboza 11, 2023
  • Hashize amezi 3
Image

Ministeri y’ingabo y’u Bwongereza mu cyegeranyo isohora buri munsi gikubiyemo amakuru y’ubutasi ku ntambara hagati ya Ukraine n’u Burusiya, ejo ku cyumweru yatangaje ko u Burusiya bumaze igihe bwigwizaho ibisasu byo mu bwoko bwa misile biraswa n’indege ziri mu kirere.

Icyo cyegeranyo kivuga ko u Burusiya bubyegeranya mu rwego rwo kugira ngo buzabikoreshe mu ntambara muri iki gihe cy’ubukonje bukabije.

Ibi bisasu byakoreshejwe tariki 7 z’uku kwezi mu bitero byagabwe i Kyiv, umurwa mukuru wa Ukraine.

Ministeri y’ingabo y’u Bwongereza ivuga ko byari bigamije gushegesha amasoko atanga ingufu z’amashanyarazi ariko ibyegeranyo by’ibanze byerekana ko Ukraine yashoboye gushwanyuriza mu kirere byinshi muri byo.

Bigaragara ko ibyahaguye byangije ibintu bike nkuko iki cyegeranyo cya Ministeri y’Ingabo y’u Bwongereza kibitangaza. Gusa kivuga ko hari umusivili umwe byahitanye.

Hagati aho, Perezida Volodymyr Zelenskyy wa Ukraine aragirira uruzinduko rwe rwa mbere muri Amerika y’Epfo. Bitegenyijwe ko yitabira ibirori by’irahira rya Perezida mushya wa Argentine, Javier Milei.

  • KAYITARE JEAN PAUL
  • Ukuboza 11, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE