Ubumwe bw’Abanyarwanda ni Ihame shingiro mu kubaka Igihugu – Dr Bizimana

  • Imvaho Nshya
  • Ukwakira 29, 2023
  • Hashize amezi 4
Image

Minisitiri w’Ubumwe bw’Abanyarwanda n’Inshingano Mboneragihugu MINUBUMWE Dr Bizimana Jean Damascene, yagaragaje uburyo amahitamo y’Ubumwe bw’Abanyarwanda ari yo hame shingiro mu kongera kubaka Igihugu, kuko nyuma y’urugamba rwo kubohora Igihugu, Guverinoma y’Ubumwe bw’Abanyarwanda ikijyaho yari ifite inshingano ikomeye yo gusana Igihugu cyari cyarangiritse mu buryo bwose.

Ni ubutumwa bukubiye ijambo rya Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène yagejeje ku bitabiriye Ihuriro ngarukamwaka rya 16 rya Unity Club Intwararumuri, riteraniye i Kigali kuri iki Cyumweru tariki ya 29 Ukwakira 2023.

Yagize ati: “Amahitamo y’Ubumwe bw’Abanyarwanda ni yo yabaye ihame-shingiro Abanyarwanda biyemeje kugenderaho mu kongera kubaka Igihugu nk’uko tubisanga mu Itegeko-Nshinga rya Repubulika y’u Rwanda mu ngingo yaryo ya 9, umurongo wa 2 uvuga ko: “Leta y’u Rwanda yiyemeje kurandurana n’imizi amacakubiri ashingiye ku bwoko, akarere n’ibindi no gushyira imbere ubumwe bw’Abanyarwanda”.

Minisitiri yakomeje asobanura uburyo Leta yakoresheje kugira ngo hongere kubakwa ubumwe bw’Abanyarwanda.

Ati: ‘Kugira ngo twimakaze iryo hame ryo ‘Kuba Umwe’ Guverinoma y’u Rwanda yashyizeho gahunda ya ‘Ndi Umunyarwanda’; igamije gutoza Abanyarwanda kwiyumvamo Ubunyarwanda mbere y’ibindi, kubana nta rwikekwe no gushyira inyungu rusange n’iz’Igihugu imbere y’inyungu bwite, binyuze mu rubuga rw’ibiganiro bagirana mu bwisanzure”.

Ndi Umunyarwanda isaba uruhare rwa buri wese

Minisitiri Dr Bizimana yavuze ko kugira ngo gahunda ya Ndi Umunyarwanda igerweho, ingeri zose z’Abanyarwanda babigiramo uruhare. Hategurwa inama n’urubyiruko binyuze muri gahunda z’Itorero n’andi makoraniro, inzego za Leta, abikorera n’abagize sosiyete sivile na bo bagira ibiganiro byimakaza Ndi Umunyarwanda.

Yakomeje agaragaza ko ibyavuye mu bushakashatsi (Rwanda Reconciliation Barometer) bwakozwe mu 2020 na Komisiyo y’Ubumwe n’Ubwiyunge, byerekanye ko 98.5% by’ababajijwe bemeje ko Ndi Umunyarwanda igira uruhare mu kubaka Ubumwe bw’Abanyarwanda, 88% bo bemeza ko bagira uruhare mu biganiro bya Ndi Umunyarwanda.  Ubwo bushakashatsi na none bwemeje ko igipimo mpuzandengo cy’ubwiyunge kigenda kizamuka kuko mu 2015 cyari kuri 92.5%, naho muri 2020 kigera kuri 94.7%. Bivuze ko muri iyo myaka itanu igipimo cy’ubumwe n’ubwiyunge cyazamutseho 2,2%.

Uburezi kuri bose

Mu burezi hashimwa ko Leta y’Ubumwe bw’Abanyarwanda yahaye abana bose amahirwe angana yo kwiga ibyiciro byose by’amashuri ashoboka, igatanga inguzanyo yo kwiga mu Rwanda no mu mahanga, hitawe gusa ku bushobozi bwabo. Bitandukanye n’ibyakorwaga muri Repubulika ya Mbere n’iya Kabiri, aho benshi mu bana b’u Rwanda bavukijwe amahirwe yo kwiga bitewe n’ubwoko babarizwagamo n’akarere baturukagamo.

Mituweli, ntawukirembera mu rugo

Mu rwego rw’ubuzima hashimwa ko gahunda y’ubwisungane mu kwivuza igera kuri buri wese igaha amahirwe angana no ku batishoboye ubundi bakabaye babura ubushobozi bwo kwivuza, kuko ikiguzi cya serivisi z’ubuvuzi kiri hejuru muri rusange. Leta ishyiramo amafaranga menshi kugira ngo Abanyarwanda bose bashobore kwivuza, nta kuvangura.  

Inzitizi zikibzngamiye ubumwe n’ubudaheranwa bw’Abanyarwanda

Dr Bizimana yavuze ko nubwo hari intambwe igaragara yatewe ariko hakiri inzitizi zikibangamiye urugendo rw’ubumwe n’ubudaheranwa bw’Abanyarwanda, aho nko mu mashuri, hari inzitizi zishamikiye ku myigishirize y’amateka cyane cyane ku birebana na Jenoside yakorewe Abatutsi mu 1994, abarimu bamwe na bamwe badafite imyumvire imwe ku mateka, ababyeyi batabwiza abana ukuri kw’amateka bitewe n’impamvu zitandukanye

Indi nzitizi ni ingengabitekerezo ya Jenoside, hakurikijwe imibare itangwa n’Urukiko rw’Ikirenga, buri mwaka hacibwa imanza nyinshi z’abantu bakurikiranwaho ingengabitekerezo ya Jenoside n’ibindi byaha biyishamikiyeho, ndetse n’ibyaha by’ivangura n’amacakubiri.

Kuva muri 2015 kugeza 2022, haciwe imanza 5,039. Dufashe gusa umwaka wa 2021/2022, haciwe imanza 316, muri zo 256 zingana na 81%, abari bakurikiranwe bahamwe n’icyaha cy’ingengabitekerezo ya Jenoside, ivangura n’amacakubiri.

Mu rwego rw’Ubutabera, hagaragajwemo inzitizi zishoborankubangamira ubumwe n’ubudaheranwa bw’Abanyarwanda zirimo ruswa, akarengane ndetse n’imyanzuro y’imanza itarashyizwe mu bikorwa cyane cyane imanza zaciwe n’Inkiko Gacaca zikirimo izitararangizwa n’izifite inzitizi zigaragaza ko zidashobora kurangizwa ariko ntizifatweho icyemezo.

Mu cyiciro cy’amadini n’amatorero, bamwe mu bayobozi ntibita ku buryo buhagije ku kwimakaza umuco w’ubumwe n’ubudaheranwa mu bayoboke  babo, bakaba basabwa kwisubiraho kuko gahunda z’Igihugu zireba buri wese.

Bamwe mu banyamakuru usanga badakora ubucukumbuzi buhagije ku nkuru bagiye gutangaza, basabwa kwitonda no gutekereza icyo bakwiye gutangaza kuko itangazamakuru ari umuyoboro ukomeye ushobora kunyuzwamo ibyubaka cyangwa ibisenya ubumwe bw’Abanyarwanda.

Minisitiri Dr Bizimana yibukije ko kuba umwe bisaba gushyira imbere Ubunyarwanda kurusha ibindi bihuje Abanyarwanda.

Ati: ‘Kuba umwe bidusaba gushyira Ubunyarwanda hejuru y’ibindi byose. Ntawe ukwiriye rero kujya mu itsinda iryo ari ryo ryose rikumira mugenzi we kubera ubwoko cyangwa umuryango aturukamo. Tugomba kumva ko twese dusenyera umugozi umwe, ko intego yacu ari ukubaka u Rwanda dushyize hamwe kandi tudaheranwa n’amateka mabi twanyuzemo”.

Yasoje asaba buri wese, mu rwego arimo kugira uruhare mu kwimakaza Ubumwe n’Ubudaheranwa bw’Abanyarwanda kuko bidakozwe, byazakomeza kuba inzitizi kuri gahunda ya Ndi Umunyarwanda kandi ari yo gitekerezo ngenga cy’ukubaho kw’Abanyarwanda.

NYIRANEZA JUDITH

  • Imvaho Nshya
  • Ukwakira 29, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE