Ubumenyi bw’Inteko izirikana bwitezweho kuzakoreshwa n’ibiragano by’ahazaza (Amafoto)

  • KAYITARE JEAN PAUL
  • Ukuboza 9, 2023
  • Hashize amezi 6
Image

Minisiteri y’Ubumwe bw’Abanyarwanda n’Inshingano mboneragihugu (MINUBUMWE) yatangaje ko abagize Inteko Izirikana bafatwa amajwi n’amashusho kugira ngo ubumenyi bwabo buzakoreshwe n’ibiragano by’ahazaza.

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yabigarutseho ku mugoroba wo kuri uyu wa Gatanu tariki 08 Ukuboza 2023, ubwo hizihizwa isabukuru y’imyaka 20 Inteko Izirikana imaze ishinzwe.

Ibirori byitabiriwe n’Umunyamabanga Mukuru w’Urwego rw’Ubugenzacyaha, Col (Rtd) Jeannot Ruhunga, Intebe y’Inteko y’Umuco (Umuyobozi Mukuru), Amb Robert Masozera , Rutangarwamaboko, Abahanzi batandukanye barimo Masamba Intore, Muyango, Nyiranyamibwa n’abandi.

Yatangiye mu 1997 nyuma gato ya Jenoside yakorewe Abatutsi, ibona ubuzima gatozi mu 2003. Ku ikubitiro yatangiranye n’abanyamuryango 12.

Muri abo bayitangiye, batatu ni bo bakiriho.

Insanganyamatsiko igira iti “Tuzirikane umurage ndangamuco w’u Rwanda duteza imbere ibikorwa biwusigasira”.

MINUBUMWE yifuza ko ubuhamya bw’abanyamuryango b’inteko izirikana buba isoko y’ibitabo.

Birashoboka y’uko bariya batabarutse amateka n’ubumenyi byabo bitanditswe bakaba barajyanye nabyo.

Minisitiri Dr Bizimana agira ati “Abasigaye rero mureke dufatanye tubigire vuba amateka yanyu yandikwe, ubumenyi bwanyu bufatwe amajwi, tububike bityo bizafashe ibiragano bizaza”.

Yavuze ko Inteko Izirikana yatangiye Jenoside ikimara guhagarikwa kugira ngo umuco wari warangijwe ubungabungwe kuko ngo Jenoside ari ukwangiza umuco ku buryo bukomeye.

Ati “Kugira ngo igihugu cyongere gukomera, cyongere kubaho ni ukucyubakira ku muco no kugarura indangamuco zo kongera kuzigisha, mwarakoze cyane”.

MINUBUMWE ishimira abagize Inteko izirikana kuba bagize umwanya wo kwibuka bagenzi babo batabarutse, bafatanyije gutangira iki kivi.

Minisitiri Dr Bizimana yagaragaje ko kuri iyi sabukuru y’Inteko Izirikana, ari umwanya wo gushishikariza urubyiruko kugira ngo na rwo rusange Inteko izirikana bakomezanye urugendo.

Avuga ko ibi biri mu nshingano za Leta kugira ngo indangagaciro zatangijwe, bakomeza kuzigisha urubyiruko narwo rukomeze kuzisigasira.

Yijeje ko no mu itorero Minisiteri izafasha kugira ngo ibikorwa by’inteko bigeremo kandi birusheho kumenyekana.

Hamuritswe imyambarire yo mu Rwanda rwo hambere

Muri ibi birori hamuritswe imyambaro n’imyambarire byo mu Rwanda rwo hambere ndetse n’uko umuco ujyanye n’imyambarire wagiye utera imbere.

Clotilde Umubyeyi, avuga ko imyenda yageze mu Rwanda mu kinyejana cya 17 izanywe n’abarabu baturutse muri Tanzaniya.

Avuga ko ibyarangaga Umuco Nyarwanda hazagamo uko bambagaraga, ubuzima bw’abanyarwanda bwibandaga ku gaciro n’indangagaciro.

Nyamara abanyarwanda bambaraga imyenda ikannye mu ruhu rw’inka, impongo, inzobe, ingwe n’ibindi.

Abakoraga cyangwa bagatunganya impu babitaga Abakannyi naho ababohaga impuzu bakabita Abakomyi b’impuzu.

Ntakirutimana Paul asobanura ko abakobwa bambagara umwambaro witwa inshabure.

Umubyeyi yavuze ko hari isano y’umuco n’iterambere.

Agira ati “Muri iki gihe hadutse imyambaro itavugwaho rumwe bati ibi si iby’i Rwanda abandi ngo ni ibigezweho.

Muri ibyo byombi ni ukugira ubushishozi no guhitamo ibijyanye n’igihe kandi bidahigitse iby’i Rwanda”.

Murekeyisoni Sylvie, Umuyobozi w’Inteko Izirikana, avuga ko Inteko Izirikana igizwe n’inararibonye zitandukanye.

Ati “Muri byinshi twiyemeje guhitamo kwita ku bintu bitatu by’ingenzi bisigasira umuryango w’Abanyarwanda; Umuco, Ururimi n’Amateka”.

AMAFOTO: LUCIEN

  • KAYITARE JEAN PAUL
  • Ukuboza 9, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE