Ubukungu bw’u Rwanda bwazamutseho 8.2% muri 2023

  • ZIGAMA THEONESTE
  • Werurwe 12, 2024
  • Hashize ukwezi 1
Image

Ikigo cy’Igihugu cy’Ibarurishamibare mu Rwanda (NISR) cyatangaje ko umusaruro mbumbe w’u Rwanda (GDP) mu mwaka ushize wa 2023, wazamutse ku kigero cya 8.2% bingana na miliyari 16,355 z’amafaranga y’u Rwanda.

Ni imibare yashyizwe ahagaragara kuri uyu Mbere tariki ya 11 Werurwe 2024, aho byagaragaye urwego rwa serivisi rwazamutseho 11% ndetse rukaba rufite uruhare ku musaruro mbumbe w’igihugu rwa 44%.

Mu gihembwe cya mbere ubukungu bwazamutse ku kigero cya 9.2%, mu gihembwe cya kabiri buzamuka ku kigero cya 6.3%, mu gihembwe cya gatatu buzamuka mu kigero cya 7.5% na bo mu cya kane buzamuka ku kigero cya 10%.

Uku kuzamuka mu mibare k’urwego servisi gushingira ku kunoza guhanahana amakuru n’itumanaho binoze biri ku ijanisha rya 39%, gutwara abantu n’ibintu mu ngendo zo mu kirere kuri 29%, muri za Hoteli na Resitora biri kuri 18%.

Murangwa Yusuf, Umuyobozi Mukuru wa NISR mu kiganiro n’itangazamakuru, yagize ati: “Twazamuye urwego rw’ibikorwa haba mu guhamagarana no mu gukoresha interineti bikaba ari byo byatumye  guhanahana amakuru n’itumanaho byarazamutse cyane, nyamara mu myaka ishize, ubukungu bwazamurwaga cyane n’ishotamari.”

Urwego rw’inganda rwazamutseho 10% mu gihe urw’ubuhinzi rwazamutseho 2%. Urwego rw’inganda rwagize uruhare ku musaruro mbumbe w’Igihugu rwa 22% mu gihe ubuhinzi ari 27%.

Muri iyi mibare mishya ya NISR, igiragaza ko ibikorerwa mu nganda byazamutseho 11% mu gihe ubwubatsi ari 12%.

Mu bikorerwa mu nganda harimo kungerera agaciro ibiribwa byazamutseho 14 %, gukora imyenda byazamutse 20%, ikorwa ry’imiti, ibicuruzwa bya Pulasitiki n’ibindi byazamutseho 21% ndetse n’ibikorwa mu biti, impapuro no mu macapiro byazamutseho 19%.

Urwego rw’ubuhinzi rwazamutse ku kigero cya 7% mu biribwa bihunikwa n’ibijyanwa ku masoko, nyamara umusaruro w’ibyoherezwa hanze y’Igihugu wamamutseho 4%, biturutse ku musururo utarabaye mwiza w’icyayi n’ikawa.

Muri rusange inzego zigaragaje neza cyane kurusha izinsi ni urw’amakuru n’itumanaho rwiyongereye ku kigero cya 35%, iganda zikora imyenda n’ibikomoka ku mpu ziyongereye ku kigero cya 20% ndetse n’amahoteli na resitora byiyongereye ku kigero cya 18%

Minisitiri w’Imari n’Igenamigambi Dr. Ndagijimana Uzziel, yabwiye itangazamakuru ko umusururo w’ubuhinzi wagabanyutse  bitewe n’imihindagurikire y’ibihe.

Uwo muyobozi yavuze ko Guverinoma y’u Rwanda yihaye intego yo gushora imari ifatika mu buhinzi mu buhinzi mu rwego rwo kongera umusaruro w’icyayi, hatangizwa no gutera injyemwe zacyo nshya, mu rwego kugira ngo kigire agaciro ku masoko mpuzamahanga.

GDP ni igipimo cya ngombwa mu kurebera uko ubukungu bw’u Rwanda buhagaze, ikaba ari na yo ireberwamo uko ibikorwa bikorwa mu gihugu hose no ku mipaka yacyo mu gihe runaka cyateganyijwe, bikunze kubarwa mu gihe cy’umwaka cyangwa mu bihembwe bine biwugize (buri gihembwe kigizwe n’amazi atatu).

Ubukungu bw’u Rwanda bwazamutse muri 2023, byarenze intego Guverinoma yari yihaye, kuko yari yihaye kubuzamura kuri 6.2%, bukaba bwageze ku 8.2%.

Icyakora Minisitiri Ndagijimana avuga ko kuba umusuro w’ubuhinzi utarabaye mwiza byagize ingaruka ku gaciro k’ifaranga ry’u Rwanda.

Ati: “Mu mwaka ushize, amapfa n’imyuzure byatumye umusaruro w’ibiribwa ugabanyuka bituma ibiribwa bitumizwa mu mahanga bikomeza kwiyongera. Byatumye idolari rikomeza gutumbagira ku buryo byagize ingaruka ku gutakaza agaciro k’ifaranga ry’u Rwanda.”

Umuyobozi Mukuru wa NISR Youssuf Murangwa
  • ZIGAMA THEONESTE
  • Werurwe 12, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE