Ubuhamya ku bumwe n’ubwiyunge bw’abayoboye nyuma ya Jenoside yakorewe Abatutsi

  • Imvaho Nshya
  • Ugushyingo 11, 2023
  • Hashize amezi 6
Image

Bamwe mu bari Abayobozi ba za Perefegitura ndetse n’Amakomine bavuga ko urugendo rwo kubanisha Abanyarwanda mu mahoro, nyuma ya Jenoside yakorewe Abatutsi mu 1994, rutari rworoshye, cyane ko benshi bari bafite ibikomere by’amateka bishaririye abandi bakinangiye imitima batemera ibyaha bakoze.

Abari mu buyobozi bw’icyo gihe bavuga ko byari ibihe bigoye, cyane ko igihugu cyari cyarasenyutse, ibikomere ari byinshi hari imfubyi, abapfakazi, inzara ndetse n’inyota ku buryo kugarura abantu mu buzima byasabye imbaraga zikomeye.

Kabera Eraste yahoze ari Perefe wa Perefegitura ya Butare, ubu akaba ari mu Ntara y’Amajyepfo mu Karere ka Huye, yanabaye Guverineri wa mbere w’Intara y’Amajyepfo, avuga ko urugendo rwo kuyobora abaturage nyuma ya Jenoside rwari rugoye kuko igihugu cyari kikishakisha aho bari bafite inshingano zikomeye zo kugarura ubumwe.

Ati: “Ubuyobozi bwari bufite akazi katoroshye bwo kongera guhuza Abanyarwanda kuko inshingano y’ibanze twari dufite bwari ubwiyunge bw’Abanyarwanda, ntabwo byari byoroshye kuko hari ibikomere, ndetse hari n’abakoze Jenoside babaga hanze bashakaga kongera gutera igihugu.

Ibyo byose byatumaga tutaryama ngo dusinzire kuko byadusabaga guhora mu baturage, tubatega amatwi, tubafasha kugira ngo inshingano y’ibanze ubuyobozi bw’igihugu bwari bwaduhaye yo kongera kubanisha Abanyarwanda tubashe kuyigeraho”.

Yongeyeho ko muri icyo gihe abakoze Jenoside bo batanabyemeraga ndetse naho Inkiko Gacaca zaziye abantu bigishwa ko niba barahemutse bagomba kwirega bagasaba  n’imbabazi benshi batabyumvaga.

Musoneye Jerome wabaye Konseye mu cyahoze ari Segiteri Kabuye, Komine Rutongo muri Perefegitura ya Murambi mu Kwakira 1994, avuga ko muri icyo gihe abantu bari bakishishanya ndetse abandi baranze kuva mu bihuru bavuga ko Inkotanyi ziri kubashakisha, aho abayobozi bahoraga bakora inama basaba ababazi kubabwira kuva mu bihuru kuko mu gihugu ari amahoro.

Ati: “Icyo gihe abantu barishishanyaga bavuga ngo abarokotse Jenoside baratwica, na bo bakavuga ngo aba bantu barongera batwice ariko buhoro buhoro abantu baje kongera kubana”.

Akomeza avuga ko icyatumye ubumwe bwongera kugaruka bakoresheje uburyo bwo guhuza abantu binyuze mu mupira w’amaguru aho bahuzaga Segiteri imwe igakina n’iyindi.

Ati: “Kugira ngo ubumwe n’ubwiyunge busagambe habayeho imikino y’imipira, ubwo Segiteri Kabuye yakinnye n’ikipe ya Masoro yo muri Komine Rutongo ubu ni mu Karere ka Rulindo, icyo gihe Segiteri Kabuye yabaye iya kabiri baduhemba amasaka, maze mbwira ba Resiponsabure nti:” mubwire abaturage bashakishe ibitoki mwenge n’ibigage maze mukore ubusabane muri buri Serire.”

Akomeza avuga ko binyuze mu mupira abaturage bakoze ubusabane barasangira, ari abakoze Jenoside ndetse n’abayirokotse.

Anavuga ko nyuma, aho Inkiko Gacaca zitangiriye ubumwe bwongeye kuzamba aho abakoze ibyaha bavugaga ko babafungishije bazira ubusa.

Ati: “Byongeye gusubira irudubi aho Inkiko Gacaca zaziye, byabaye ngombwa ko abakoze Jenoside babashinja ndetse n’abo bafatanyije, ubumwe buba barazambye, abafunzwe bati dufungishijwe na bo ubwo inzangano ziva aho ngaho”.

Kabera Eraste icyo gihe yari Perefe wa Perefegitura ya Butare, kuri ubu ni mu Karere ka Huye

Akomeza avuga ko binyuze mu nyigisho bahabwaga buhoro buhoro, abantu bagiye bemera ibyaha barirega, barafungwa ndetsebasaba imbabazi.

Aba bayobozi bavuga ko muri icyo gihe babonaga ubumwe n’ubwiyunge bw’Abanyarwanda buzagorana, ariko barishimira ko bugeze ku kigero cyiza aho usanga abantu babanye amahoro n’ababiciye.

Barashima uruhare rwa Leta y’ u Rwanda, IBUKA ndetse n’indi miryango ikomeje kugira uruhare mu kunga Abanyarwanda.

Banagaragaje n’imbogamizi zigihari kuko hari bamwe mu bakoze Jenoside batavuga aho imibiri yabo bishe iri kugira ngo ishyingurwe mu cyubahiro ari naho bahera basaba ko bayerekana.

Ati: “Ikibazo kikiri ingorabahizi abarokotse Jenoside bagifite ni uko bamwe mu bafunze cyangwa abemeye icyaha batavuga aho imibiri bishe iri kugira ngo ishyingurwe mu cyubahiro”.

Basaba Abanyarwanda gukomeza kubana mu mahoro birinda amacakuburi n’icyabatandukanya icyo ari cyo cyose, kandi bakarushaho gukomeza guhangana n’ingengabitekerezo ya Jenoside ndetse n’icyabasubiza inyuma mu kubaka ubumwe.

KAMALIZA AGNES

  • Imvaho Nshya
  • Ugushyingo 11, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE