Ubuhamya bw’umusore w’i Huye wamaze amezi  ane yivuza kubatwa n’inzoga

  • ZIGAMA THEONESTE
  • Ukuboza 18, 2023
  • Hashize amezi 5
Image

Nshimiyimana Alain w’imyaka 26 y’amavuko wo mu Karere ka Huye mu Ntara y’Amajyepfo, avuga ko yakuze yiyumvamo ko kugira ngo abe umugabo ari ukunywa inzoga ariko byaje guhinduka ubwo yaje kumara amezi ane yivuza kubatwa na zo.

Nshimiyimana ni Umuyobozi wa Save Lives Foundation, Umuryango washibutse ku buryo yabaswe n’ubusinzi. Agaragaza ko yakuze abona iwabo banywa inzoga nk’ibisanzwe nyuma na we biza kumwokama.

Ati: “Nakuze mbona mu rugo bakoresha inzoga mbona ari ibisanzwe, nk’uko mu muco Nyarwanda bavuga ko umugabo ari uwanyoye inzoga, yagira icyo ageraho, abantu benshi ugasanga ni ko tubitekereza.”

Nshimiyimana avuga ko yatangiye amashuri yisumbuye ahura n’abanyeshuri bagenzi be baturutse mu Turere dutandukanye, akajya agenda mu kigare yiyumvisha ko kunywa ibiyobyabwenge ari ikintu kigezweho.

Avuga ko akirangiza kwiga amashuri yarushijeho kunywa inzoga kubera ko yari atangiye kwigenga, atangira gukoresha inzoga nyinshi bikabije.

Avuga ko yatangiye gutekereza kwiyahura inshuro nyinshi kubera kugira ipfunwe z’ibyo inzoga zamukoresheje mu bihe bitandukanye.

Ati: “Iyo umaze kuba umuzigo kubera inzoga, ntabwo utera imbere. Ahubwo bari basigaye bahamagara ababyeyi ngo ngwino wishyure, bahamagarwa na Polisi iti umuhungu wawe twamufunze… Byambayeho  cyane ntabwo ari rimwe ntabwo ari kabiri.”

Nshimiyimana avuga ko yafunzwe inshuro zirenga enye kubera ubusinzi. Ati: “Natangiye kubona ko ndemereye umuryango bagatangira gutongana, ntangira kwiba, nti ikibazo nagikemura gute, nkatangira gutekereza ngo uwakwikura mu buzima. Imana ishimwe ntabwo byakunze.”

Avuga ko yageze n’aho yiba ibikoresho hafi ya byose iwabo, batangira, kumutakariza icyizere kandi ni na ko kubatwa n’inzoga byakomezaga kwiyongera.

Ababyeyi be batangiye kubona ko amaze kuba ikibazo, baramuganiriza binaniranye batangira gushaka uko yajyanwa mu bigo Ngororamuco.

Ati: “Nari ntangiye kujya mu kabiri ngahamagara ngo nibaze bishyure. Ntabwo ari njyewe wahamagaraga ba nyir’akabari bati umuhungu wanyu yanyoye nimuze mwishyure.”

Nshimiyimana avuga ko byageze igihe agasigara nta kintu afite no kubona inzoga bimugoye. Yagiye mu Kigo Ngororamuco maze yisabira se umubyara kujya kwivuza  inzoga nyuma yo kumara iminsi yigunze mu cyumba cya wenyine.

 Ati: “Njya kwa muganga marayo amezi arenga ane n’iminsi 15 mba mu kigo nivuza, nyuma y’aho namaze amezi umunani niyondora”.

Inzobere mu buvuzi bwo mu mutwe Mudahogora Chantal , abwira urubyiruko ko kunywa inzoga zikabije ari bibi kandi bishobora gutera ibyago byo kuba ingumba bityo bakwiye kuzirinda.

Ati: “Nagira ngo mvuge ko inzoga zitera kutabyara ku bagabo, bivuze ngo iyo umwijima wangiritse ntabwo ubasha kurema Vitamini A kandi ni yo itanga intanga ngabo (spermes). Icyo gihe intanga ngabo zihita zicika intege ntizibe zashyikira igi ry’umugore n’abagabo bumve ko zishibora kubagiraho ingaruka zikomeye”.

Akomeza avuga ko abibeshya ko inzoga zimara ishavu aba ari ukwibeshya kuko zikubwira ko washize ishavu ariko zamara kugushiramo rya shavu rikagaruka.

Iyo nzobere kandi inagaragaza ko inzoga ari ikibazo kuko zifata ku gice cy’ubwonko bigatuma abantu zabase batakaza ubushobozi bumwe bw’umubiri.

Ati: “Abo twakira ukabona umuntu yatangiye kudidimanga kubera ko twa dutsi (neurone) two mu bwonko dutwara umwanya munini kugira twohereze ubutumwa. Muri abo bantu bamwe muri bo ntibarya ugasanga umaze amasaha 12 utariye kubera ko amakuru ava mu bwonko agera mu gifu akubwira ko ushonje ntabwo aba arimo gukora”.

Akomeza avuga ko imiryango imwe itita ku bana ugasanga bahuye n’agahinda gakabije bigatuma bishora muri izo nzoga, bityo agasaba ko bakwirinda aka gahinda binyuze mu kwirinda amakimbirane mu ngo no kwita ku bana babo kugira ngo batishora mu nzoga bakiri bato.

  • ZIGAMA THEONESTE
  • Ukuboza 18, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE