Ubufatanye bw’u Rwanda na Yorodaniya mu kurwanya iterabwoba

  • NTAWITONDA JEAN CLAUDE
  • Mutarama 8, 2024
  • Hashize amezi 5
Image

Leta y’u Rwanda n’Ubwami bwa Hashemite bwa Yorodaniya bikomeje urugendo rwo kwagura ubutwererane mu nzego zitandukanye zifitiye akamaro abaturage b’ibihugu byombi n’Isi yose muri rusange.

By’umwihariko, ibihugu byombi bifitanye ubutwererane mu kurwanya iterabwoba binyuze mu itumanaho ritaziguye cyangwa binyuze muri gahunda ya Aquaba (Aquaba Process) yatangijwe n’Umwami wa Yorodaniya Abdullah II Ibn Al-Hussein mu mwaka wa 2015.

Iyo gahunda ikubiyemo inama mpuzamahanga zigamije kurushaho kongerera imbaraga ubutwererane mu bya gisirikare n’umutekano, guhuza ibikorwa no guhererekanya ubunararinonye mu bafatanyabikorwa mpuzamahanga ku birebana no guhashya iterabwoba.

Buri nama ikorwa itegurwa hibandwa kuri buri Karere, ikoroshya ibiganiro bikorwa hagati y’impuguke zinyuranye. Inama ya Aquaba yo mu mwaka wa 2022 yigaga ku Mutekano w’Akarere k’Afurika y’Iburasirazuba yabaye mu kwezi kwa Werurwe 2022.

Mu ruzinduko rw’akazi rw’iminsi itatu mu Rwanda, Umwami Abdullah II na Perezida wa Repubulika y’u Rwanda Paul Kagame, bemeranyijwe ku kurushaho kwimakaza ubutwererane muri urwo rwego rwo guhashya iterabwoba, urwa politiki, urw’ubukungu, ubuzima  ndetse n’urwa gisirikare.

Mu biganiro byabereye mu muhezo ku Cyumweru, abayobozi bombi bagaragaje ubushake bwo gukomeza kwimakaza umubano hagati y’Ubwami bwa Yorodaniya n’u Rwanda, bashimangira agaciro ko kubaka umubano ushingiye ku nyungu ibihugu byombi bihuriyeho.

Nyuma y’inama yabereye mu muhezo Perezida Kagame yashimye uruhare ntagereranywa rwa Yorodaniya mu Burasirazuba bwo Hagati mu rugendo rwo kwimakaza amahoro n’umutekano.

Abayobozi bombi bashimangiye akamaro ko gusigasira ihuzabikorwa n’ibiganiro ku bibazo bitandukanye biraje ishinga ibihugu byombi, by’umwihariko kurwanya iterabwoba mu buryo buhereye ruhande ndetse no kongera imbaraga mu kwimakaza amahoro n’umutekano ku Isi.

Umwami Abdullah II yashimye ubutwererane bw’ubwami bwe n’u Rwanda binyuze muri gahunda ya Aqaba Process, arushimimira kuba runaheruka no kwakira inama z’iyo gahunda mu mpera z’umwaka ushize.

Perezida Kagame na we yashimiye imbaraga Ubwami bwa Yorodaniya bukomeje gushyira mu rugamba mpuzamahanga rwo kurwanya iterabwoba binyuze muri Aqaba Process.

Ibiganiro byahuje Perezida Kagame n’Umwami Abdullah II byanagarutse ku ngingo zigezweho mu Burasirazuba bwo hagati, by’umwihariko ibibazo by’umutekano muke i Gaza watewe n’intambara ihuje ingabo za Leta ya Isiraheli n’umutwe uyobowe na Hamas.

Umwami Abdullah II yashimangiye ko hakenewe gugaharika intambara, kurinda abasivili no guharanira ko ibikorwa by’ubutabazi biboneka ku buryo buhagije muri Gaza.

Yaboneyeho gushimira u Rwanda ku ruhare rwagize mu gutanga ubufasha ku babukeneye, by’umwihariko ku ndege bohereje yari yuzuye imfashanyo zigenewe abaturage ba Gaza.

Umwami kandi yagaragaje impungenge z’uko gukomeza gushoza intambara kuri Gaza bitazagira ingaruka ku baturage bo muri Palestine gusa ahubwo zizagera no ku Isi yose, aboneraho gusaba amahanga kotsa igitutu abahanganye muri iyo ntambara bakayihagarika byihuse.

Yaboneyeho kugaragaza ko Uburasirazuba bwo Hagati butazigera bugira amahoro mu gihe hakigaragara ikibazo cya Palestine na Isiraheli.

  • NTAWITONDA JEAN CLAUDE
  • Mutarama 8, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE