U Rwanda, urwa 2 mu bihugu by’Afurika byongereye ingendo z’indege

  • Imvaho Nshya
  • Ugushyingo 6, 2023
  • Hashize amezi 7
Image

U Rwanda rwaje ku mwanya wa kabiri muri Afurika mu bihugu byagize ubwiyongere bw’ingendo z’indege ugereranyije n’uko byari byifashe mu mwaka wa 2019, mbere y’uko Isi yibasirwa n’icyorezo cya COVID-19.

Ubushakashatsi bwakozwe n’Ikigo Mpuzamahanga ForwardKeys gikora ubushakashatsi ku bukerarugendo, cyagaragaje ko u Rwanda ruri mu byerekezo by’Afurika bikomeje kugaragaza ubwiyongere bufatika mu ngendo z’indege, rukaba rwaraje inyuma ya Cameroon.

Iyo mibare y’umwaka wa 2023 wose yatangarijwe mu Nama y’Ihuriro ry’Abakora Ubukerarugendo ku Isi (WTTC) yateraniye i Kigali mu cyumweru gishize, ikaba yarakusanyijwe hagendewe ku mibare y’amatike yakatishijwe yerekeza mu byerekezo bitandukanye by’Afurika.  

Iyo mibare yerekana ko Cameroon yinjiye mu gihembwe cya kane cy’uyu mwaka ifite ubwiyongere bw’abakora ingendo zindege buri ku kigero cya 27%, u Rwanda ku kigero cya 15% rukaba runganya na Tanzania, hagakurikiraho Namibia yaje ku mwanya wa kane n’ubwiyongere bwa 10%.

Ibyo ni na byo bihugu bine byiyongereyeho imibare iri hejuru ya 9%, ariko hakurikiraho Ivory Cost yagize ubwiyongere bwa 8%, Repubulika Iharanira Demokarasi ya Congo (RDC), Cape Verde 4%, na Nigeria 1%.

Olivier Ponti, Umuyobozi ushinzwe ibarurishamibare muri ForwardKeys, yagize ati: “Ibyerekezo byinshi byitezweho ubwiyongere mu bw’ingendo mu gihembwe cya nyuma cy’uyu mwaka, ariko haracyari byinshi bigikeneye kwiyubaka. Amabwiriza yashyiriweho kunoza urwego rw’indege akomeje kuyobora iterambere mu Turere tw’Afurika yo hagati n’iy’Iburengerazuba. Iri terambere ryitezweho gukomeza kugeza mu bihe bya Noheli.”

Perezida akaba n’Umuyobozi Mukuru wa WTTC Julia Simpson, na we yongeyeho ati: “Iyi mibare mishya yaturutse muri ForwardKeys igaragaza uburyo abantu basonzeye gutembera mu byerekezo bitandukanye by’Afurika. Ubushakashatsi nk’ubu bwerekana amasoko mashya mu byerekezo byinshi by’Afurika kandi igihe kirageze ngo dufatirane ayo mahirwe.”

U Rwanda nk’icyerekezo kigezweho cy’ubucuruzi n’ubukerarugendo

Mu gihe havugwa ibijyanye n’ubucuruzi bushingiye ku bukerarugendo mu byerekezo by’Afurika, ni ingenzi cyane gushimangira ko urwo rwego rukirimo kwiyubaka no kwikura mu ngorane rwasizwemo n’icyorezo cya COVID-19.

Gusa hari ibyerekezo bikomeje kwigaragaza neza cyane kurusha ibindi, u Rwanda rukaba ruri muri ibyo byerekezo.

ForwardKeys ivuga ko mu gihembwe cya kane Senegal ari yo igaragaza icyizere cyo kongera ingendo zishingiye ku bucuruzi ziziyongera ku kigero cya 22%, mu gihe u Rwanda ziziyongera ku kigero cya 21% naho Cameroon zikiyongera ku kigero cya 25%.

Icyo kigo kivuga ko gahunda yo kwakira no gutegura inama n’ibikorwa mpuzamahanga (MICE) ikomeje kungura u Rwanda mu buryo bugaragara, kandi izo ngendo zikaba ari ikimenyetso cy’uko ibikorwa by’iterambere ry’ubukungu n’ishoramari bikomeje kwiyongera.

Abasura u Rwanda bagenda mu myanya y’abanyacyubahiro bakomeje kwiyongera

Bivugwa ko u Budage, Ubwami bw’u Bwongereza (UK) na Leta Zunze Ubumwe z’Amerika (USA) ari byo bihugu biza imbere mu kugira abantu benshi bagenderera u Rwanda bazinduwe n’ubucuruzi n’ishoramari.

Imibare igaragaza ko abacuruzi baturuka mu Budage biyongereye ku kigero cya 30%, mu gihe abava muri UK biyongereye ku kigero cya 13% na ho abaturuka muri USA biyongereye ku kigero cya 11%.

Nanone kandi, abakatishije amatike y’abanyacyubahiro basura u Rwanda mu mpera z’uyu mwaka biyongereye ku kigero cya 37% ugereranyije n’abatega mu myanya isanzwe (economy) biyongereye ku kigero cya 13%.

Ibi bigaragaza ko hari abantu benshi b’abanyacyubahiro bazasura u Rwanda mu mpera z’uyu mwaka kandi bakazaruhukira ahantu hagezweho kandi higonderwa n’abifite.

U Rwanda rushimirwa kuba intangarugero mu kugaragaza uburyo koroshya ingendo bigira uruhare rukomeye mu kunoza ingendo mpuzamahanga.

Kugeza ubu hejuru ya 70% by’abagenzi baza mu Rwanda baba baturutse ku Kibuga cy’Indege Mpuzamahanga cya Bole i Addis Ababa, Ikibuga cya Brussels, icya Amsterdam Schiphol ndetse n’icya Jomo Kanyatta giherereye i Nairobi muri Kenya.  

Bivugwa kandi ko hari amahirwe yo kongera ingendo z’ubucuruzi zituruka muri Leta Zunze Ubumwe z’Amerika no mu Budage.

NTAWITONDA JEAN CLAUDE

  • Imvaho Nshya
  • Ugushyingo 6, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE