U Rwanda rwohereje toni 22.4 z’avoka mu Buholandi

  • NTAWITONDA JEAN CLAUDE
  • Ugushyingo 28, 2023
  • Hashize amezi 3
Image

Ku wa Mbere wari umunsi udasanzwe mu mateka ku Kigo Mpuzamahanga SOUK Farms, gikorera mu Rwanda ubuhinzi bw’imbuto, imboga n’indabo byoherezwa mu mahanga, nyuma yo kohereza avoka 124,000 zingana na toni 22.4 mu gihugu cy’u Buholandi.

Ubuyobozi bwa SOUK Farms bwagaragaje ko businze igitego cyo kubaka ibiraro bihuza imigabane binyuze mu buhinzi n’ubucurizi bw’Avoka, buti: “Kugeza amahoro avoka nyarwanda ku mugabane w’u Burayi ni inzozi zahindutse impamo.”

Izo avoka zakiriwe n’Ikigo Best Fresh Group co mu Buholandi kizobereye mu bucuruzi bw’imbuto, imboga n’indabo bituruka mu bice bitandukanye ku Isi kikabikwirakwiza ko masoko yo mu bihugu bitandukanye byo ku Mugabane w’i Burayi.

Ambasaderi w’u Rwanda mu Buholandi Olivier Jean Patrick Nduhungirehe wari aho zakiriwe ku Cyambu cya Rotterdam, yagaragaje ko yanejejwe no kwakira izo avoka SOUK Farms yohereje ku wa Gatandatu tariki ya 25 Ugushyingo 2023, zikaba zaraherekejwe n’Ambasaderi w’u Buholandi mu Rwanda, Joan JJ Wiegman.

Nyuma yo gutangaza iby’iyo nkuru, ubuyobozi bwa SOUK Farms mwagize buti: “Mwakoze cyane Amb. Nduhungirehe ku bufasha ibiro byanyu byaduhaye ndetse no kuba mutangaje iyo nkuru nziza.”

SOUK Farms ikomeje kubaka izina mu kohereza umusaruro w’ubuhinzi bw’imbuto cyane cyane iza avoka, ifite gahunda yo kurushaho kwagura isoko no kongera umusaruro uturuka mu Rwanda woherezwa mu mahanga.

Amb. Nduhungirehe yishimiye kwakira umusaruro wa mbere w’Avoka mu Buholandi

Ubuyobozi bwa SOUK Farms buvuga ko bwiteguye kubaka inzego n’uruhererekane rw’ubucuruzi  bikomeye byungura abahinzi n’imiryango baturukamo mu buryo bufatika.

SOUK Farms ni ikigo cy’ubucuruzi cyashinzwe mu mwaka wa 2019, kugeza ubu kikaba cyaragaragaje ubuhinzi nk’isoko y’ubukire mu Rwanda, aho cyanubatse ibikorwa byacyo by’ubuhinzi bigezweho bikomeje kubera abandi icyitegererezo.

Uretse ibyo kandi, ni ikigo kimaze kumenyerwa ku mikoranire myiza n’abahinzi nyarwanda b’umwuga bohereza mu mahanga umusaruro wujuje ubuziranenge uturutse mu bice bitandukanye by’Igihugu, ari na ko gitanga umusanzu mu guhaza isoko ry’imbere mu gihugu.

Icyo kigo cyimakaje gukoresha ikoranabuhanga rigezweho mu buhinzi no gutunganya umusaruro, ndetse gifite umwihariko wo guhuza udushya no kwiyemeza kudatezuka mu gushyigikira kubaka ubudahangarwa bw’abahinzi nyarwanda ku ngaruka z’imihindagurikire y’ibihe.

Ubuyobozi bw’icyo kigo bushimangira ko gikomeje kugira uruhare rukomeye mu iterambere n’imibereho y’abaturage mu Rwanda, kandi ko umusaruro w’ibyo bakora mu ruhererekane rw’ubucuruzi rw’ibikomoka ku buhinzi wigaragaza.

Kugeza ubu SOUK Farms ikorana n’abahinzi barenga 1200 bakorera mu bice bitandukanye by’u Rwanda, kandi iyo mikoranire igaragarira mu buryo bose bahinduye ubuzima kuko ayo binjiza yiyongereye ku kigero cya 300%.

Nanone kandi 71% by’abakozi ba SOUK Farms ni abagore, bikaba bijyanye na Politiki y’Igihugu y’Ubuhinzi yimakaza uburinganire n’ubwuzuzanye hagati y’abagore n’abagabo mu nzego zose z’uruhererekane rw’ubuhinzi.

  • NTAWITONDA JEAN CLAUDE
  • Ugushyingo 28, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE