U Rwanda rwohereje ibicuruzwa bya mbere mu Isoko Rusange ry’Afurika 

  • NTAWITONDA JEAN CLAUDE
  • Ukwakira 2, 2022
  • Hashize imyaka 2
Image


Ku wa Gatanu w’iki cyumweru, u Rwanda rwohereje mu mahanga ibicuruzwa bya mbere mu Gihugu cya Ghana binyuze mu masezerano y’Isoko Rusange ry’Afurika (AfCFTA) ryatangiye kwagura amarembo y’ubutwererane bw’ibihugu by’Afurika.

Iri soko ribonwa nk’irya mbere ryagutse ku Isi kuko ritanga amahirwe y’ubucuruzi ku baturage bakabakaba miliyari 1.3 batuye ku Mugabane w’Afurika. 

Ibicuruzwa bya mbere u Rwanda rwohereje muri Ghana binyuze muri ayo masezerano ni ikawa yatunganyijwe n’Ikigo Igire Coffee, ikaba yaragejejwe mu Mujyi wa Accra n’Isosiyete Nyarwanda ikora ubwikorezi bwo mu kirere, RwandAir.

Itangazo ryashyizwe ahagaragara na Minisiteri y’Ubucuruzi n’Inganda (MINICOM), rigaragaza ko ibyo bicuruzwa ari byo bibaye ibya mbere bifite ikirango cya AfCFTA biturutse mu Rwanda byerekeza mu kindi gihugu cy’Afurika.

MINICOM yagize iti: “Ikirango cya mbere cya AfCFTA ku bicuruzwa by’u Rwanda cyahawe Igire Coffee gishyirwa ku ikawa yerekeje muri Ghana muri gahunda y’Isoko Rusange ry’Afurika. Iyi ni intangiriro y’ubwiyongere bw’ubucuruzi bukorawa hagati y’ibihugu by’Afurika.”

U Rwanda ruri mu bihugu 7 byatoranyirijwe kugira uruhare mu gutangiza icyiciro cya mbere cy’ubu bucuruzi bw’Isoko Rusange ry’Afurika burimo gutegurirwa gukorerwa mu bihugu byose byo ku mugabane. 

Igire Coffee ni ikigo kiyobowe n’abagore gitunganganya ikawa yahinzwe na koperative z’abagore banayitonora bakanayumisha nk’uko bishimanngirwa n’Umuyobozi Mukuru wacyo, Briggette Harrington.

Uyu muyobozi yavuze ko AfCFTA izagira uruhare rukomeye mu kongera ubukungu n’iterambere by’Abanyarwanda kuko ibihugu by’Afurika bizarushaho gusangira udushya no kubyaza umusaruro amahirwe y’Afurika akenshi yakundaga gukoreshwa n’indi migabane. 

Briggette Harrington aganira n’itangazamakuru, yagize ati: “Ntitwakomeza kwishingikiriza ku bihugu byo mu Burengerazuba bw’Isi bitwara umutungo kamere w’Afurika bikayisigira ubukene n’ihungabana. Dukwiye guhindura ako kamenyero.”

Yavuze ku rugendo rwo gushinga Igire Coffe, aho yatangiye akusanya ikawa ihingwa na Koperative z’abagore akayitunganya ndetse akanayohereza muri Ghana. Yanashimangiye ko icyo aharanira ari uko inyungu ziva muri iyo kawa zisaranganywa abagore bayihinga. 

Yagaragaje ko mbere yo gushinga icyo kigo hari ibigo by’ubucuruzi byo hanze y’Afurika byazaga kugura ikawa ku madolari y’Amerika atanu ku kilo, ariko ikagaruka igiciro cyikubye inshuro hafi 10. 

Ati: “Baragendaga bakayitunganya, bakayipfunyika ubundi bakayigarura mu Rwanda igura nibura amadolari y’Amerika 45 ku kilo (45,000 Frw) ndetse n’abagore bayihinze, bakayisarurura, bakayitonora, bakayanika … barakoze imirimo myinshi bagahabwa amafaranga y’intica ntikize. Ibyo ni byo tugomba guhindura.”

Yakomeje agaragaza uburyo nko muri Ghana, usanga kugeza n’ubu igihingwa cya cocoa gihereza inyungu gusa ibihugu byateye imbere bigihinduramo chocolat, kandi n’Afurika yacyitunganyiriza ikacyoherereza abanyamahanga ku giciro gitanga inyungu imbere.  

Intambwe imaze guterwa ni uko muri Afurika hatangiye kuboneka inganda zikora chocolat, ndetse no mu Rwanda hakaba hari uruganda byemejwe ko ruzajya ruzikora bikajyana no gutumiza icyo gihingwa muri Ghana no mu bindi bihugu by’Afurika kibonekamo. 

Muri gahunda y’Isoko Rusange ry’Afurika, abacururi batangiye kubona amahirwe ya mbere yo kugabanyirizwa imisoro no gukurirwaho izindi mbogamizi za gasutamo. 

Biteganyijwe ko iri soko rizabyaza umusaruro ibicuruzwa bitandukanye bikorerwa muri Afurika, ariko by’umwihariko rikazamura urwego rw’ubuhinzi n’ubworozi rugaragaza amahirwe menshi cyane kurusha indi migabane yose. 

  • NTAWITONDA JEAN CLAUDE
  • Ukwakira 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE