U Rwanda rwiyemeje gutanga miliyari 3.8 Frw muri gahunda ya Timbuktoo

  • NTAWITONDA JEAN CLAUDE
  • Mutarama 16, 2024
  • Hashize amezi 4
Image

Perezida wa Repubulika Paul Kagame yatangaje ko u Rwanda rutewe ishema no kwakira icyicaro cya gahunda ya Timbuktoo igenewe guteza imbere ba rwiyemezamirimo mu kubyaza umusaruro imbaraga z’urubyiruko ku mugabane w’Afurika.

Perezida Kagame yaboneyeho kwemeza ko u Rwanda rwiyemeje gutanga miliyoni 3 z’amadolari y’Amerika, ni ukuvuga miliyari zisaga 3.8 z’amafaranga y’u Rwanda, muri iki Ikigega Nyafurika cyo guhanga ibishya.

Iyo gahunda yashyizweho n’Ishami ry’Umuryango w’Abibumye ryita ku Iterambere mu Rwanda (UNDP) nk’ikigega gikusanya miliyari imwe y’amadolari y’Amerika, ni ukuvuga amafaranga y’u Rwanda asaga tiriyali 1.2, agashorwa mu gutera inkunga ibigo bya ba rwiyemezamirimo b’urubyiruko bahanga udushya.

Ni gahunda igamije guhanga no gushyigikira ibigo bishya birenga 1000, guhindura imibereho y’abaturage barenga miliyoni 10 ndetse no kwinshiza nibura miliyari 10 z’amadolari y’Amerika ku mugabane wose mu myaka 10 iri imbere.

Yashyiriweho gushakira ibisubizo ingorane ziri mu ruhererekane rwo guhanga udushya, uhereye ku rwego rw’ubushakashatsi rukijegajega , kuba hataboneka abashoramari, gahunda z’ubucuruzi zijegajega n’amasoko mato kandi arimo ibyuho.

Gahunda ya Timbuktoo yiteguye kubyaza umusaruro intumbero y’u Rwanda yo kuba icyerekezo mpuzamahanga cya serivisi z’imari muri Afurika, ifasha ba rwiyemezamirimo kubaka ubucuruzi bwabo bugakomera.

Ubwo yagezaga ijambo ku bitabiriye umuhango wo gufungura ku mugaragaro iyo gahunda i Davos mu Busuwisi ahari kubera Inama nama ngarukamwaka y’Ihuriro ry’Ubukungu ku Isi (WEF), ibaye ku nshuro ya 54, Perezida Kagame yavuze ko u Rwanda rishimiye kwakira icyicaro gikuru,

Yagize ati: “Intumbero ya Timbuktoo ijyanye n’uruhererekane rwo guhanga ibishya mu Rwanda. U Rwanda rufunguriwe buri wese kuba yaza akagerageza ibisubizo atanga.

Ni iby’agaciro kwakira icyicaro gikuru cya Timboktoo kandi twishimiye cyane kubona icyicaro cy’Ikigega Nyafurika cyo guhanga ibishya gikorera mu Ihuriro Mpuzamahanga rya Serivisi z’Imari rya Kigali (KIFC).”

Uretse icyicaro gikuru i Kigali, iyo gahunda izaba ifite amashami mu bindi bice birindwi by’Afurika, harimo i Cairo mu Misiri, Cape Town muri Afurika y’Epfo, Accra muri Ghana, Casablanca muri Morocco, Dakar muri Senegal, Lagos muri Nigeria na Nairobi muri Kenya.

Perezida Kagame yavuze ko binyuze mu ntego ya gahunda ya Timbuktoo yo kugera kuri miliyari imwe z’amadolari, hazahangwa amahirwe mashya ku rubyiruko rw’Afurika kugira ngo rukoreshe neza impano n’ubushobozi bwo guhanga ushya.

Ati: “Ibyo bivuze kuziba icyuho cy’ubushomeri n’ubumenyi buke, atari ku mugabane wacu gusa ahubwo bigakorwa ku Isi yose. Ubusumbane bwo gushora imari mu kubaka ubushobozi bw’abantu ni kimwe mu mpamvu zitera ubwimukira, dukwiye guhora tubizirikana.”

Yibukije ko Isi irimo guhinduka vuba cyane bityo buri wese akwiye kwiga kujyana n’izo mpinduka, abonerako guhamya ko gutangiza gahunda ya Timbuktoo bishyira Afurika mu nzira nziza yo kugendana na za mpinduka zihuta.

Yashimiye UNDP yatangije iyo gahunda ikaba iri no ku ruhembe rw’imbere mu guharanira ishyirwa mu bikorwa ryayo, ahamya ko Afurika iofite imbaraga z’abakozi bashobora gukemura ingorane nyinshi zikomeye Isi ihanganye na zo.

Yavuze ko ntawukeiye kwemera ko ikindi gisekuru cy’urubyiruko rw’Afurika cyarinda gisaza kitabonye amahirwe yo kubyaza umusaruro ubushobozi bwuzuye no guhangana ku rwego mpuzamahanga.

  • NTAWITONDA JEAN CLAUDE
  • Mutarama 16, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE