U Rwanda rwinjiye mu Muryango Mpuzamahanga wita ku Nkingo (IVI)

  • NTAWITONDA JEAN CLAUDE
  • Kamena 6, 2022
  • Hashize imyaka 2
Image

Leta y’u Rwanda yishimiye kwakirwa mu Muryango Mpuzamahanga wita ku Nkingo (IVI/ International Vaccine Institute) rukaba rwiteze kungukiramo byinshi mu gihe rwiteguye kubona uruganda rukora inkingo n’indi miti.  

IVI ni Umuryango Mpuzamahanga washinzwe mu mwaka wa 1997 binyuze muri gahunda y’Ishami ry’Umuryango w’Abibumbye ryita ku Iterambere (UNDP). 

Uwo Muryango ufite icyicaro gikuru i Soul muri Korea y’Epfo. Kugeza ubu IVI ihuriyemo ibigo 39 hakiyongeraho n’Ishami ry’Umuryango w’Abibumbye ryita ku Buzima (OMS). Ibihugu byatangije uwo muryango ni Koreya y’Epfo, Suwede, u Buhinde na Finland. 

Ubuyobozi bwawo bwatangaje ko bwishimiye kwakira u Rwanda mu rugendo rwo guharanira kugera ku ntego zirimo kuvumbura, gukora no gutanga inkingo zujuje ubuziranenge kandi zihendutse mu kugera ku buzima rusange ku Isi yose. 

Ambasaderi wa Repubulika y’u Rwanda muri Koreya y’Epfo Yasmin D. Amri Sued, ni we wazamuye ibendera ry’u Rwanda ku cyicaro gikuru cya AVI i Seoul. 

Uyu Muryango wakoze ibirori byo kwakira u Rwanda muri IVI byanitabiriwe n’abandi bayobozi barimo na ba Ambasaderi babiri n’ibihugu bya Koreya y’Epfo na Suwede.

Amb. Lee Jong-Koo, uhagarariye Ishami ry’Ubuzima Mpuzamahanga muri Minisiteri y’Ububanyi n’Amahanga ya Koreya y’Epfo, Amb. Daniel Wolvén wa Suwede muri Korea bifatanyije n’Umuyobozi Mukuru wa IVI Dr. Jerome Kim mu guha u Rwanda ikaze. 

Dr. Jerome Kim yagaragaje inyungu zitandukanye zitezwe mu bufatanye bushya uyu muryango ugiye kubaka n’abafatanyabikorwa batandukanye bo mu rwego rw’ubuzima rw’u Rwanda. 

Minisitiri w’Ubuzima Dr. Ngamije Daniel, yifashishije ikoranabuhanga na we yatanze ubutumwa bushimira IVI yemeye gukorana n’u Rwanda. 

Yagize ati: “Gusaba kwinjira muri IVI byashingiye ku cyerekezo dusangiye n’uwo muryango: kuvumbura, gutunganya, no gutanga inkingo zizewe, zujuje ubuziranenge, kandi zihendutse mu guharanira kugera ku buzima rusange ku rwego mpuzamahanga.”

Abandi bafashe umwanya bashima harimo Ambasaderi ushinzwe Ubuzima Mpuzamahanga muri Minisiteri y’Ububanyi n’Amahanga ya Suwede Anders Nordström

Umuyobozi w’Inama y’Ubutegetsi ya IVI George Bickerstaff, ni we wakiriye abitabiriye ashimira na Guverinoma y’u Rwanda yagaragaje ubushake bwo kwiyunga kuri uyu muryango umaze kuba ubukombe. 

Bickerstaff yagizd ati: “Dutewe ishema no gusangira intego z’ubuzima na Guverinoma y’u Rwanda. Icyo IVI ihanzeho amaso ni ibyorezo bishingiye ku bukene n’ubusumbane, nk’uko bigaragara mu Masezerano ya Kigali. Duhamya tudashidikanya ko kurandura izo ndwara zirimo izitaritaweho uko bikwiye bizafasha kugera ku Ntego z’Iterambere Rirambye (SDGs).”

U Rwanda rwinjiye mu muryango rusanzemo ibindi bihugu 38 hamwe na OMS. Kuri ubu u Rwanda nk’umunyamuryango mushya rufite umwanya w’uruhagarariye, akaba ari Dr. Leon Mutesa usanzwe ari Umuyobozi w’Ikigo cy’Ubushakashatsi ku Tunyangingo Ndangasano muri Kaminuza y’u Rwanda. 

Dr. Mutesa yatangiye manda ye ku ya 28 Gicurasi 2022.

  • NTAWITONDA JEAN CLAUDE
  • Kamena 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE