U Rwanda rwijeje kuba hafi Guinea nyuma y’iturika ry’ububiko bwa Lisansi

  • NTAWITONDA JEAN CLAUDE
  • Mutarama 26, 2024
  • Hashize amezi 4
Image

Perezida wa Repubulika y’u Rwanda Paul Kagame, yijeje Guverinoma ya Guinea-Conakry inkunga yose ishoboka muri ibi bihe ihanganye n’ingaruka z’iturika ry’ububiko bw’ibikomoka kuri Peteroli ryabaye mu kwezi gushize.

Tariki ya 18 Ukuboza 2023, ni bwo ububiko bw’ibanze bwa Leta bw’ibikomoka kuri Peteroli mu Mujyi wa Conakry bwaturitse mu Karere ka Kaloum, buhitana abantu 23 abandi basaga 241 barakomereka.

Umuriro byateje mu Mujyi wamaze amasaha 24 inzego zibishinze zitarabasha kuwuzimya.

Mu ruzinduko rw’iminsi itatu Perezida wa Guinea Conakry Lt. Col. Mamadi Doumbouya arimo mu Rwanda, Perezida Kagame yongeye kumwihanganisha anamwizeza ko u Rwanda ruzakomeza kubaba hafi.

Yagize ati: “Dutewe ishema no kukwakira wowe n’itsinda mwazanye mu Rwanda. Ndifuza gushimangira ko Guverinoma n’abaturage b’u Rwanda twifatanyije namwe muri iki gihe muhanganye n’ingaruka z’impanuka ikomeye yabereye ku bubiko bw’ibikomoka kuri Peteroli muri Kaloum, mu kwezi gushize. Tuzabaha inkunga mu bishoboka byose.”

Iturika ry’ububiko bwateje ibura ry’ibikomoka kuri Peteroli mu gihugu, ibiciro by’ibikomoka kuri Peteroli bihita bitumbagira.

Nyuma y’iminsi itatu gusa abantu bari batangiye kujya mu mihanda bigaragambya, basaba ko ikibazo cy’ibikomoka kuri Peteroli cyakemurwa byihuse kuko lisansi yari yabuze mu gihugu hose.  

Icyo gihe abigaragambyaga bavugaga ko hari sitasiyo za Lisansi zari zahagaritse ibikorwa kubera ko zitari zikibona ibyo zicuruza, mu gihe hari n’izasigaye zicuruza iyo zari zisanganywe ndetse na mazutu gusa.

Perezida Lt. Gen. Doumbouya uyoboye Igihugu guhera mu mwaka wa 2021 ubwo yahirikaga ubutegetsi, yihanganishije abaturage ndetse anatangaza icyunamo cy’iminsi itatu mu gihugu hose.  

Kugeza uyu munsi Guinea iracyahanganye n’ingaruka z’iryo turika, kubera ko inzu nyinshi zari zegereye ubwo bubiko zarasenyutse, amadirishya aramenagurika bituma n’abaturage benshi bava mu bice biyegereye.

Imibare yatangajwe na Guverinoma y’icyo gihugu, yatangaje ko ingo 738 ari zo zagezweho n’ingaruka z’iryo turika, ibihugu by’abaturanyi birimo Senegal na Mali, byohereje amatsinda yo gufasha icyo gihugu gukora iperereza ku mpamvu yateye iryo turika ridasanzwe.

  • NTAWITONDA JEAN CLAUDE
  • Mutarama 26, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE