U Rwanda rwihanganishije u Buyapani nyuma y’umutingito wahitanye abarenga 160

  • NTAWITONDA JEAN CLAUDE
  • Mutarama 9, 2024
  • Hashize ukwezi 1
Image

Guverinoma y’u Rwanda yoherereje ubutumwa bw’akababaro Leta y’u Buyapani nyuma y’umutingito ufite ubukana bwa ka 7.6 wibasiye Umwigimabakirwa wa Noto mu Ntara ya Ishikawa, ugahitana abantu 161 bamaze kumenyekana abandi basaga 100 bakaburirwa irengero.

Uwo mutingito wabaye ku itariki ya 1 Mutarama 2024, umunsi Isi yose yizihizaga Ubunani, bivuze ko muri icyo gihugu batangiye umwaka mushya mu miborogo n’agahinda kenshi.

Ku wa 4 Mutarama ni bwo Guverinoma y’u Rwanda, ibinyujije muri Minisiteri y’Ububanyi n’Amahanga n’Ubutwererane (MINAFFET) yohereje ubutumwa bwo gufata mu mugongo Guverinoma y’u Buyapani, imiryango y’ababuze ababo ndetse n’abaturage muri rusange.

Ubwo butumwa buragira buti: “N’umubabaro mwinshi Guverinoma y’u Rwanda yamenye iby’umutingito ukomeye watwaye ubuzima bw’abantu benshi ukanakomeretsa abatagira ingano ku wa 1 Mutarama 2024 mu Burengerazuba bw’u Buyapani.

Guverinoma y’u Rwanda yifatanyije namwe mu kababaro inihanganisha imiryango y’ababuze ababo, hamwe na Guverinoma y’u Buyapani muri ibi bihe bigoye.”

Kugeza ubu, u Buyapani buravyahanganye n’ingaruka z’uyu mutingito umaze iminsi ikabakaba 10 ubaye. Bivugwa ko abantu barenga 20,000 bari mu gihirahiro cyo kutagira umuriro w’amashanyarazi.

Abasirikare, abakozi b’urwego rushinzwe kurwanya inkongi no gukumira ibiza na Polisi, bakomeje gushakisha mu matongo y’ibyangiritse kugira ngo barebe ko haboneka uwarokotse mu nyubako zaridutse, cyangwa abandi baba bahitanywe n’ibyo biza.

Inzego z’ubuyobozi zavuze ko habayeho no gutenguka k’ubutaka mu bice bisaga 1000 by’iyo Ntara, byiyongeraho n’amasimbi yabaye menshi akaba yongereye ubukonje bukabije abasigaye iheruheru nnzu zo kuyikingamo.

Bivugwa ko ingo zirenga 18,000 mu Ntara ya Ishikawa ari zo zabaruwe ko zitagira amashanyarazi, mu gihe izindi zirenga 66,000 zitagiraga amazi guhera ku Cyumweru.

Abantu barenga 28,000 bahungiye mu ntubako za Leta, uretse ko na bo bafite ikibazo cy’amazi meza, bakaba nta mashanyarazi kandi ari yo abafasha kubona ubushyuhe mu nzu, mu gihe bari kurara kuri sima.

Abaturage bari mu kangaratete bishimiye ko hari inkunga yatangiye kuboneka yp kuboneka aho bagaburirwa ibyo kurya bishyushye, bakaba bashobora no kubona amazi ashyushye yo gukaraba bataherukaga kubona.  

Guverineri wa Ishikawa Hiroshi Hase, yagize ati: “Imfu ziterwa n’ibiza zigomba gukumirwa uko byagenda kose. Ndashaka kunoza ahantu hose hari inzu zidakwiye zo guturamo.”

Kugeza ubu abamaze kwemezwa ko bishwe n’ibyo biza barimo 70 bo mu gace ka Wajima, 70 b’ahitwa  Suzu ana 21 bo muri  Anamizu mu mwigimbakirwa wa Noto.

Abantu 100 ni bo bataraboneka mu gihe abandi 565 bakomeretse, na ho inzu 1,390 zarasenyutse burundu cyangwa zirangirika bikomeye.

Nyuma y’umutingito hanabayeho umwuzure wa Tsunami nay o yangije ibintu byinshi, ndetse hari n’indi mitingito yagiye iba buri munsi ariko bidahuje ubukana.

  • NTAWITONDA JEAN CLAUDE
  • Mutarama 9, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE