U Rwanda rwemeje amasezerano mpuzamahanga akumira ihohoterwa mu kazi

  • Imvaho Nshya
  • Ugushyingo 2, 2023
  • Hashize amezi 7
Image

Repubulika y’u Rwanda yatanze inyandiko zemeza amasezerano ya mbere y’Umuryango Mpuzamahanga wita ku Murimo (ILO) ashyiraho amabwiriza agamije gukumira ihohoterwa n’itotezwa ryose rikorerwa mu kazi.

Minisitiri w’Abakozi ba Leta n’Umurimo Prof Bayisenge yashyikirije ubuyobozi bwa ILO izo nyandiko zemeza aho u Rwanda ruhagaze kuri ayo masezerano yiswe “No. 190” ku wa Gatatu tariki ya 1 Ugushyingo 2023, i Geneva mu Busuwisi. 

Minisitiri Prof Bayisenge yagize ati: “Ni iby’igiciro kuri njye kuba ndi hano nzanye izi nyandiko zemeza amasezerano yo gukumira ihohoterwa n’itotezwa mu murimo 2019 (No. 190) mu izina rya Guverinoma y’u Rwanda. Kwemeza aya masezerano ni igihamya cy’ukwiyemeza k’u Rwanda mu guhashya ihohoterwa iryo ari ryo ryose haba mu kazi no hanze yako.

Ni muri urwo rwego u Rwanda rwashyizeho politiki ihamye, amategeko n’amabwiriza agenga ibigo. Uburenganzira bwa buri wese bugomba kubahirizwa kandi bukarindwa ndetse bugashyirwa mu ngiro mu Isi izira ihohoterwa n’itotezwa. Tuzakomeza gukorana bya hafi n’abakozi n’abakoresha, hamwe n’abafatanyabikorwa batandukanye mu guharanira kubigeraho.”

Umuyobozi Mukuru wa ILO Gilbert F. Houngbo, amaze kwakira inyandiko z’u Rwanda, yashimye ukwiyemeza k’u Rwanda mu kwemeza ayo masezerano aboneraho no kwemeza ko u Rwanda ari igihugu kigaragaza umwihariko mu kurinda no kubahiriza uburenganzira bwa muntu, ubutabera kuri bose ndetse rukaba ruri ku rwego rushimishije mu kwimakaza Isi y’umurimo izira ihohoterwa iryo ari ryo ryose. 

U Rwanda rubaye igihugu cya 36 ku Isi n’icya 9 muri Afurika cyemeje ayo masezerano afatwa nk’intangiriro yo guhashya ihohoterwa iryo ari ryo ryose rikorerwa umukozi ku murimo.

Hamwe n’inama zikubiye mu mwanzuro No. 206, ayo masezerano atanga uburyo bw’imikorere n’ingamba zifatwa hagamijwe gutegura ahakorerwa hatekanye hashingiye ku kwihesha agaciro no kubahana.

Ayo masezerano yitezweho kuba ingirakamaro mu kugera ku ntego zashyizweho n’Umuryango ILO aganisha ku Masezerano Mpuzamahanga ku Hazaza h’Umurimo yemejwe mu mwaka wa 2019, aho ibihugu bigomba kwiyemeza kubaka Isi y’umurimo izira ihohoterwa n’itotezwa iryo ari ryo ryose.

Nanone kandi Umuryango ILO uraharanira guhamagarira abatuye Isi guharanira iterambere no kwikura mu ngaruka za COVID-19 hareba ku gaciro ka muntu, ukudaheza, kubaka ibiramba kandi bishimangira ukwigira kw’abakozi n’abakoresha.

Umuyobozi wa ILO kandi aboneraho guhamagarira abatuye Isi kurushaho kwimakaza ubutabera mu miryango no mu mirimo itandukanye abantu bahuriramo buri munsi.

Avuga ko ayo masezerano ashimangira ko buri wese aho ava akagera afite uburenganzira mu Isi y’umurimo izira ihohoterwa no guhozwa ku nkeke mu buryo ubwo ari bwo bwose.

Kimwe mu byo agarukaho ni ihohoterwa rishingiye ku gitsina risobanurwa nk’imyitwarire iyo ari yo yose itemewe iganisha ku gusambanya, gufata ku ngufu cyangwa ihohotera nshenguramutima n’irihungabanya ubukungu bw’urikorewe wanze kurikorerwa.

Icyo gisobanuro kigaragaramo ukurinda buri wese mu murimo, yaba uri kwimenyereza umwuga n’abantu bose bafite inshingano haba abakozi basanzwe cyangwa abayobozi. Ni igisobanuro kandi kinareba abakora mu nzego za Leta zose ndetse n’iz’abikorera, haba mu mirimo yanditse n’itangitse, ikorerwa mu mijyi ndetse n’iyo mu cyaro.

Aya masezerano asaba ibihugu kuyemeza yabanje kuganiriza abahagarariye abakozi n’abakoresha, kugira ngo bagene uburyo budaheza kandi bwubahiriza uburinganire mu kwirinda ihohoterwa n’itotezwa iryo ari ryo ryose mu murimo binyuze mu mahugurwa, ubujyanama, gufata ingamba zihamya ahakorerwa umurimo n’ubukangurambaga.

Ni amasezerano anareba ku bwuzuzanye bw’inzego za Guverinoma, abakoresha n’abakozi n’imiryango bakorera, harebwa ku miterere itandukanye y’inshingano zabo. 

Aya masezerano n’umwanzuro uyaherekeza bishimangira agaciro n’imbaraga z’ibiganiro bihuza abagize umuryango ari na byo byabaye umusingi w’ishyirwa mu bikorwa ku rwego rw’Igihugu.

Kugeza uyu munsi, u Rwanda rumaze kwemeza amasezerano 35 y’Umuryango ILO, 31 muri yo akaba ashyirwa mu bikorwa.

NTAWITONDA JEAN CLAUDE

  • Imvaho Nshya
  • Ugushyingo 2, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE