U Rwanda rwasinyiye miliyari 50 Frw yo kwagura uruganda rw’amazi rwa Karenge

  • Imvaho Nshya
  • Ugushyingo 10, 2023
  • Hashize amezi 6
Image

Leta y’u Rwanda yashyize umukono ku masezerano y’uburyo bubiri ayihesha inguzanyo ya miliyoni 41.2 z’amadolari y’Amerika, ni ukuvuga miliyari zisaga 50 z’amafaranga y’u Rwanda azifashishwa mu kongera ubushobozi bw’Uruganda rw’amazi rwa Karenge ruherereye mu Karere ka Rwamagana.

Harimo inguzanyo ya miliyoni 21.2 z’amadolari y’Amerika, ni ukuvuga miliyari zikabakaba 26 z’amafaranga y’u Rwanda yatanzwe n’Ikigega Mpuzamahanga cy’Iterambere (OPEC Fund),  ndetse na miliyoni 20 z’amadolari y’Amerika (miliyari zisaga 24 z’amafaranga y’u Rwanda) zatanzwe n’Ikigega cy’Iterambere cya Saudi Arabia

Amasezerano yemeza iyo nguzanyo yashyizweho umukono ku wa Kane tariki ya 9 Ugushyingo, ubwo hatangizwaga Inama ihuza Afurika na Saudi Arabia iteraniye i Riyadh.

Minisiteri y’Imari n’Igenamigambi mu Rwanda (MINECOFIN) ivuga ko iyo nguzanyo  yitezweho gukemura ibibazo byo kubura amazi meza mu nkengero z’Umujyi wa Kigali by’umwihariko mu Karere ka Rwamagana, kandi ari yo ntandaro yo kunoza ubuzima rusange, guharanira iiterambere rirambye ry’ibidukikije cyane cyane ubuzima bw’abaturage bukazarushaho kunoga.

Iyo nkunga ije yiyongera ku yindi ya miliyoni 52 z’amadolari y’Amerika zemewe na Leta ya Hongiriya, zose zikazafasha  kwagura uruganda rwa Karenge rukava ku bushobozi bwo gutunganya metero kibe 15,000 ku munsi rukagera ku gutunganya metero kibe 48,000 ku munsi.

Iyo nguzanyo ije yunganira ikomatanyije ya miliyoni 143.3 z’amadolari y’Amerika yatanzwe ku bufatanye bwa OPEC Fund n’Ikigega cy’Iterambere cya Abu Dhabi, Ikigo cy’Iterambere cya Saudi Arabia n’Ikigega cy’Iterambere cya Saudi Arabia, Banki y’Iterambere ry’Ubukungu y’Abarabu (BADEA) na Baki yimakaza Ibyoherezwa mu Mahanga ya Hongiriya.

Amasezerano yashyizweho umukono ku wa Kane n’Umuyobozi Mukuru wa OPEC Abdulhamid Alkhalifa n’Umunyamabanga wa Leta muri Minisiteri y’Imari n’Igenamigambi (MINECOFIN) ushinzwe Ishoramari rya Leta no gukusanya umutungo, ubwo hatangizwaga Inama ihuza Afurika na Saudi Arabia iteraniye i Riyadh.

Abdulhamid Alkhalifa yavuze ko batewe ishema no kugira uruhare mu gushyigikira u Rwanda mu bikorwa byo kurushaho kunoza imicungire y’umutungo kamere w’amazi no gukwiza amazi meza mu baturage.

Yakomeje agira ati: “Amazi ni umutungo usigasira ubuzima kandi ukagira uruhare rukomeye mu iterambere ry’ubukungu. Kuyabungabunga ni ingenzi cyane mu gukumira ingaruka z’imihindagurikire y’ibihe, kwimakaza ubuzima bwiza no guhanga amahirwe mashya y’ubukungu ku baturage b’u Rwanda.”

Biteganyijwe ko umushinga wo kwagura Uruganda rw’amazi rwa Karenge uzakorerwa ku nkengero z’Ikiyaga cya Mugesera giherereye mu bilometero bigera kuri 50 uvuye mu Mujyi wa Kigali.

Urwo ruganda nirumara kugera ku rwego rwo gutanga mitero kibe 48,000 ku munsi, ruzaba rugeze ku bushobozi bwo guhaza abaturage kugeza mu mwaka wa 2050.

Kugeza uyu munsi, Ikigega OPEC Fund kimaze gutanga miliyoni 270 z’amadolari y’Amerika mu mishinga 30 yo mu nzego za Leta n’iz’abikorera mu Rwanda, by’umwihariko mu rwego rwa taransiporo, gukwirakwiza amazi, urw’ingufu n’urw’imari.

Byongeyeho kandi, u Rwanda rwabonye inkunga zigera kuri 25 zitandukanye zitangwa ku rwego rw’Igihugu n’urw’Akarere.

NTAWITONDA JEAN CLAUDE

  • Imvaho Nshya
  • Ugushyingo 10, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE