U Rwanda rwanyomoje ibivugwa ko Abanyarwanda bari kwimwa Visa za UAE

  • NTAWITONDA JEAN CLAUDE
  • Ukwakira 26, 2022
  • Hashize umwaka 1
Image

Mu minsi mike ishize, ibitangazamakuru bitandukanye byatangaje ko u Rwanda ruri mu bihugu 20 by’Afurika aho abaturage babyo batemerewe guhabwa Visa zibemerera kujya gutemberera muri Leta Zunze Ubumwe z’Abarabu (UAE).

Nyuma y’amasaha make byatangiye gukwirakwizwa ku mbuga nkoranyambaga, Umuvugizi wa Guverinoma Yolande Makolo ahita anyomoza ibyo bihuha byatangiye gukwirakwizwa mu cyumweru gishize.

Yagize ati: “Uko si ukuri. U Rwanda ntirwangiwe guhabwa Visa. Abanyarwanda baracyahabwa iz’ukwezi kumwe ndetse n’izo kumarayo amezi atatu.”

Ambasade y’u Rwanda muri UAE na yo yanyomoje ibyo bihuha yita ibiyobya, kuko nta Munyarwanda wakuriweho Visa zerekeza muri icyo gice cyo mu Burasirazuba bwo Hagati.

Yagize iti: “Abaturage b’u Rwanda bakomeje kuryoherwa no guhabwa amoko atandukanye ya Visa harimo n’iy’ubukerarugendo (visit visa).”

Ambasade y’u Rwanda muri UAE yaboneyeho kugira inama Abanyarwanda ku birebana n’amavugurura ari mu mitangire ya Visa za UAE yatangiye gushyirwa mu bikorwa taliki ya 3 Ukwakira 2022.

Yagize iti: “Mu mabwiriza mashya, nk’uko bimeze ku bandi banyamahanga, Abanyarwanda basaba Visa y’ubukerarugendo basabwa ibi bikurikira: Kugaragaza icyemezo cya hoteli yamwemereye kumucumbikira ndetse n’igihe ateganya kuhamara, itike y’urugendo rwo kugenda no gutaha ifite agaciro, igihe yaba azakirwa mu muryango agomba kuba afite urwandiko rw’ubutumire rw’umuryango azajyamo ndetse n’aderesi y’aho ubarizwa, nomero ya telefoni cyangwa Pasiporo.”

Ikindi asabwa kuba yujuje harimo no kuba afite ubushobozi buhagije bw’ibizamutunga, bikaba bivugwa ko akwiye kuba afite nibura ama-Dirham ya UAE (AED) 5000 ni ukuvuga nibura amafaranga y’u Rwanda akabakaba miliyoni imwe n’igice (1,438,987 Frw) .

Ibindi bihugu bivugwaho kuba abaturage babyo batemerewe guhabwa visa z’ubukerarugendo ni abo muri Uganda, Ghana, Sierra Leone, Sudani, Cameroon, Nigeria, Liberia, u Burundi, Guinea, Gambia, Togo, Repubulika Iharanira Demokarasi ya Congo, Senegal, Benin, Ivory Coast, Congo, Burkina Faso, Guinea Bissau, Comoros na Dominican Republic.

Bivugwa ko impamvu izo visa zahagaritswe ari uko Abanyafurika benshi bakunda gusaba Visa z’ubukerarugendo berekeje i Dubai, bafite umugambi wo gutorongera bagashakayo akazi cyangwa bakisanga mu ruhererekane rw’ibyaha birimo n’icuruzwa ry’abantu.

Abenshi mu baka visa z’ubukerarugendo ngo bagiye bakoresha ayo mahirwe yo gusura Igihugu mu kwaka imirimo, no gushakirayo imibereho kandi bitari mu byo bemerewe gukora mu Gihugu.

  • NTAWITONDA JEAN CLAUDE
  • Ukwakira 26, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE