U Rwanda rwakusanyije Toni 3 611 z’ibisigazwa by’ibikoresho by’ikoranabuhanga

  • NTAWITONDA JEAN CLAUDE
  • Gicurasi 13, 2022
  • Hashize imyaka 2
Image

Mu rwego rwo kurengera ibidukikije  no gukumira ibinyabutabire byagira ingaruka mbi ku buzima bw’abantu,  u Rwanda rwashyizeho uburyo bwo gucunga ibikoresho by’ikoranabuhanga byashaje cyangwa bitagikora, bigakusanywa bikabyazwa umusaruro mu rwego rw’ubukungu. 

Bimwe biravugururwa bikongera gukoreshwa ibindi bigakorwamo ibikoresho fatizo byifashishwa n’inganda.

Inzego zifite aho zihuriye no kubungabunga ibidukikije no guteza imbere ikoranabuhanga zivuga ko  kuba harashyizweho uburyo bwo gucunga biriya bikoresho bimaze gutanga umusaruro. 

Ubu  hamaze gukusanywa ibisigazwa bigera kuri Toni 3611, mudasobwa zavuguruwe zikongera gukoreshwa mu mashuri zigera kuri 7060, na ho umwuka wa karuboni wakumiriwe ni Toni 2145. Hamaze no guhangwa imirimo 600.

Iyi gahunda yo gucunga neza biriya bisigazwa ikomeje gutezwa imbere aho ubu mu Gihugu hamaze gushyirwaho amakusanyirizo 18. Abaturarwanda bakaba bakangurirwa kwitabira kujyanayo  ibyo bafite byashaje cyangwa batagikoresho. 

Ibikoresho bikusanywa birimo telefoni, mudasobwa, inyakiramajwi, insakazamajwi, inyakiramashusho n’insakazamashusho n’ibindi bikoresho bikoresha umuriro w’amashanyarazi cyangwa ingufu zikora nka wo. 

Ibigenda bikusanywa   bitunganywa  n’uruganda rwa sosiyete Enviroserve Rwanda ruri mu Karere ka Bugesera ku bufatanye na Guverinoma y’u Rwanda. 

Mu myaka itanu ishize, Guverinoma y’u Rwanda n’abafatanyabikorwa bateye intambwe igaragara mu kubungabunga ibisigazwa by’ibikoresho by’ikoranabuhanga hatezwa imbere ubukungu burengera ibidukikije kandi bwisubiranya. 

Mu rwego rwo gusobanurira abantu iyi gahunda no kubakangurira kuyitabira,  Minisiteri y’Ikoranabuhanga na Inovasiyo, Minisiteri y’Ibidukikije, hamwe n’Urwego Ngenzuramikorere (RURA) n’abafatanyabikorwa bari mu  bukangurambaga buzamara ukwezi.

Ibikoresho bimwe biravugururwa bikongera gukoreshwa

Minisitiri w’Ikoranabuhanga na Inovasiyo Ingabire Paula avuga ko uko ikoranabuhanga ryagiye ryiyongera by’umwihariko ikoreshwa ry’ibikoresho by’ikoranabuhanga, ni ko n’imyanda/ibisigazwa by’ibyo bikoresho byagiye biteza ibibazo ariko nanone aho bitangiriye gucungwa  neza byagiye bigabanya imyuka yangiza ikirere n’izindi ngaruka ku bidukikije. 

Agaragaza ko  ubu buryo burambye u Rwanda rwashyizeho bufasha no mu guhanga imirimo. 

Ati: “Tugomba kuzirikana ingaruka mbi z’iyi myanda ku hazaza ari na ko tubyaza amahirwe ubukungu n’iterambere ry’ikoranabuhanga, bikadufasha kwishakira ibisubizo duhereye ku bibazo bihari.” 

Minisitiri w’Ibidukikije Dr. Mujawamariya Jeanne d’Arc ati: “Mu  ntego z’Icyerekezo 2050, biteganyijwe ko u Rwanda ruzaba ruri mu bihugu bifite iterambere ritabangamiye ibidukikije kandi ryihanganira imihindagurikire y’ibihe. 

Kugira ngo ibyo bigerweho, kurengera ibidukikije bigomba gushyirwa imbere. Nidushyira ibisigazwa by’ibikoresho by’ikoranabuhanga ahabugenewe, tuzagabanya umubare w’ibijyanwa mu bimpoteri byakira indi myanda. 

Ibi bizafasha mu kubungabunga umutungo kamere, guhanga imirimo irengera ibidukikije, no kugabanya ingaruka ziterwa n’ibikoresho byangiza ubuzima bw’Abanyarwanda ndetse n’ibidukikije.” 

Umuyobozi Mukuru w’Agateganyo w’Urwego Ngenzuramikorere (RURA), Eng. Deo Muvunyi asanga Igihugu cyarerekanye  ubushake bukomeye bwo gufata neza ibisigazwa by’ibikoresho by’ikoranabuhanga no gushyiraho amategeko agenga imicungire yabyo, ikumira ry’ibinyabutabire byangiza ibidukikije kandi bikanagira ingaruka ku buzima bw’abantu. 

Ati: “Turashishikariza Abaturarwanda muri rusange kwitabira ubu bukangurambaga. Mu kunagura ibisigazwa by’ibikoresho by’ikoranabuhanga byawe uba utanze umusanzu mu ishyirwa mu mubikorwa ry’ingamba Leta yihaye zo kurengera ibidukikije kandi unirinda ubwawe ibinyabutabire  byagira ingaruka mbi ku buzima bwawe”.

Ubu bukangurambaga bukorwa kandi ku bufatanye n’ Ishami ry’Umuryango w’Abibumbye ryita ku Bidukikije (UNEP) n’Umuryango Mpuzamahanga w’Itumanaho (ITU), bwatangijwe muri uku kwezi buzageza mu mpera za Kamena 2022, hazashishikarizwa cyane abatuye Umujyi wa Kigali n’Akarere ka Musanze (ari naho hashyizwe ikusanyirizo ry’ibisigazwa by’ibikoresho by’ikoranabuhanga bwa mbere mu Rwanda). 

Utundi Turere tumaze kugira ikusanyirizo ni Rulindo, Gakenke, Gicumbi, Nyagatare, Nyarugenge, Kicukiro Gasabo, Kayonza, Rwamagana, Ngoma, Kirehe, Bugesera, Ruhango, Nyanza, Gisagara, Huye na Nyamagabe.

  • NTAWITONDA JEAN CLAUDE
  • Gicurasi 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE