U Rwanda rwakiriye inama rwitezeho  kunguka abashoramari mu gukwirakwiza amashanyarazi

  • NTAWITONDA JEAN CLAUDE
  • Ukwakira 19, 2022
  • Hashize umwaka 1
Image

Mu Rwanda hateraniye Inama Mpuzamahanga  y’iminsi 3 yitezweho kongera abashoramari mu gukwirakwiza amashanyarazi, bikazagira uruhare mu kugera ku ntego Igihugu cyihaye y’uko muri 2024, ingo zose zizaba zicaniwe.

Ihuje  abarenga 1200 bo mu bihugu bitandukanye barimo abashoramari, inganda n’abandi bafatanyabikorwa mu gukwirakwiza amashanyarazi adafatiye ku miyoboro migari  arimo akomoka ku mirasire y’izuba (Off-Grid). 

Minisitiri w’Ibikorwa Remezo Dr Nsabimana Ernest, yavuze ko ubu  mu Rwanda hafi 24% bakoresha ingufu zituruka ku mirasire y’izuba, akaba ari intambwe nziza imaze guterwa. 

Yagize ati: “Ni ikintu cyo kwishimira cyane, nubwo tugiye dufite n’izindi ngufu zitandukanye zituruka ku mazi, kuri gazi n’ahandi hatandukanye, ariko iyo urebye aho isi igeze, ukareba n’ibibazo dufite by’imihindagurikire y’ikirere, amashanyarazi aturuka ku mirasire y’izuba ni ingufu zigenda zikoreshwa cyane ku isi n’u Rwanda ntabwo rwasigaye inyuma”.

Yakomeje avuga ko  Leta ifite gahunda yo gukomeza kongera amashanyarazi aturuka ku mirasire y’izuba, bityo hari byinshi byitezwe kuri iyi nama birimo kongera ishoramari ndetse no kunoza serivisi zitangwa mu gukwirakwiza ariya mashanyarazi.   

Yagaragaje  ko ari inama izanye ibisubizo aho hari n’abashoramari biyemeje gufungura ibiro mu Rwanda.

Ati: “Twaganiriye ku bijyanye n’ubuziranenge, hagiye habaho ibikoresho bitujuje ubuziranenge, mwabonye ko na hano hari abantu bashinzwe kugenzura ubuziranenge, hari n’abavuga bati twebwe mu mezi abiri turafungura ibiro hano  i Kigali tuze gufatanya n’abandi kureba ibikoresho byinjira ku isoko ry’u Rwanda kugira ngo niba ugiye gukoresha ibyo bikoresho umenye ko ari ibikoresho byujuje ubuziranenge. Ni ibintu tuganiraho n’abafatanyabikorwa batandukanye kugira ngo niba tugiye gukoresha iri koranabuhanga dukoreshe iridateza ibibazo ahubwo rikemura ibibazo”.

Minisitiri w’Ibikorwa Remezo Dr Nsabimana Ernest

Koen Peters  Umuyobozi Mukuru w’Ihuriro  Mpuzamahanga ry’Abashoramari mu  guteza imbere ikwirakwizwa ry’amashanyarazi y’imirasire y’izuba  n’ibikoresho biyifashisha (GOGLA) ari na ryo ryateguye iyi nama, yavuze ko u Rwanda rwakoze byinshi mu gukwirakwiza amashanyarazi ari yo mpamvu bahisemo kuhakorera iyi nama kuko runafite ubushobozi bwo kwakira abantu benshi.  

Ati: “ U Rwanda ni igihugu cy’intangarugero mu guhuza abikorera na Leta mu nyungu z’isoko ry’amashanyarazi, twishimira uburyo rwafashe ibyemezo biganisha ku cyerekezo cyiza aho  abikorera bafite icyerekezo kimwe; ibi byatanze umusaruro ugaragarira ku mubare w’abamaze kugerwaho n’amashanyarazi”.

Sameer Shukla Umuyobozi muri Banki y’Isi ushinzwe ingufu, agaragaza ko kugira ngo Isi igere ku ntego yihaye yo gucanira bose bitarenze muri 2030, bisaba kurushaho  gukorana n’abafatanyabikorwa.

Ati: “Intego dufite ni ukwegeranya ubushobozi mu buryo bwose haba mu nzego z’abikorera, Leta n’abandi bafatanyabikorwa mu birebana n’imihindagurikire y’ikirere”.

Iyi nama yahujwe n’imurikabikorwa ry’abashoramari mu bijyanye no gukwirakwiza amashanyarazi adafatiye ku miyoboro migari bakaba banamuritse bikoresho bitandukanye byifashisha aya mashanyarazi birimo ibikonjesha, ibyo mu gikoni, imashini zitandukanye n’ibindi. 

Bamwe mu bamuritse ibikorwa byabo bavuga ko hari byinshi bungutse birimo kugaragaza ibyo bakora ariko bakanigira ku bandi.

Ndagijimana Emmanuel ni Umuyobozi ushinzwe ibikorwa mu kigo gikwirakwiza amashanyarazi akomoka ku mirasire y’izuba (BUIM), yagize ati: “ Iri murikabikorwa rigamije kuduhuza n’abandi mu nguni natwe duherereyemo yo gucanira ingo, barimo abashoramari n’abaterankunga mu bikorwa turimo, harimo abantu bagiye bakora ibikorwa bikomeye ku Isi kuko ni mpuzamahanga, turyitezeho no kwiga ibyo abandi bakoze, natwe tubereke icyo twakoze, turebe n’icyo tubura kugira ngo twongerere ubushobozi ibikoresho dutanga, bigirire akamaro abaturage”.

Yongeyeho ati: “Icya mbere twabonye ni ikijyanye n’ikoranabuhanga. Hari ikoranabuhanga twari dusanzwe dukoresha ariko hari n’irindi twabonye ritandukanye n’iryo twari dusanzwe dukoresha, nk’urugero twatangaga ibijyanye no gucanira abaturage ariko twabonye ko dushobora no kubafasha gukonjesha ibinyobwa byabo kandi dukoresheje za ngufu ziturutse ku mirasire y’izuba”.

Iyi nama ibaye ku nshuro ya 7 ariko akaba ari ubwa mbere ibereye mu Rwanda.

Koen Peters Umuyobozi Mukuru wa GOGLA (iburyo) na Sameer Shukla Umuyobozi muri Banki y’Isi ushinzwe ingufu
Ndagijimana Emmanuel umwe mu bitabiriye imurikabikorwa
  • NTAWITONDA JEAN CLAUDE
  • Ukwakira 19, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE