U Rwanda rwakiriye abashoramari 100 bo mu bihugu bikoresha Igifaransa

  • NTAWITONDA JEAN CLAUDE
  • Nyakanga 11, 2022
  • Hashize imyaka 2
Image

Itsinda ry’abikorera bagera ku 100 bahagarariye ibigo by’ubucuruzi n’inzego z’ubukungu mu bihugu bihuriye mu Muryango w’Ibihugu Bikoresha Igifaransa (OIF) baje mu Rwanda mu ruzinduko rw’iminsi itatu guhera kuri uyu wa Mbere taliki ya 11 Nyakanga 2022.

Biteganyijwe ko kugeza ku wa Gatatu taliki ya 13 Nyakanga, iryo tsinda ryaturutse mu bihugu 25 bya OIF rizaba riri i Kigali aho rizahura n’abikorera bo mu Rwanda, bakaganira ku bufatanye mu guteza imbere inzego zitandukanye z’ubucuruzi n’ishoramari.

Umunyamabanga Mukuru wa OIF Louise Mushikiwabo, yavuze ko iryo tsinda rije rikurikira abakabakaba 300 bahuriye mu Rwanda mu gihe cy’iminsi itanu y’icyumweru gishize bahagarariye Inteko Zishinga Amategeko zo mu Bihugu bikoresha Igifaransa.

Inama yabahuje yagarutse ku ngingo zitandukanye zijyanye no kwimakaza politiki n’imiyoborere myiza mu bihugu bikoresha ururimi rw’Igifaransa (Francophonie).

Mushikiwabo yagize ati: “Naje iwacu mu ruzinduko rw’akazi; nabanje ibiganiro n’Abadepite ba Francophonie, ubu babisikanye n’abacuruzi bo mu bihugu 25 bya Francophonie bifuza gukorana n’Abanyarwanda no gushora imari mu Rwanda. Twikomereze imihigo rero.”

Ibiganiro byatangiye uyu munsi byibanze ku kugaragaza amahirwe y’ishoramari ari mu Rwanda mu nzego zitandukanye ndetse n’ibiganiro byahuje abahagarariye ibigo by’abikorera bitandukanye mu Rwanda n’abo bashyitsi.

Uretse mu Rwanda, biteganyijwe ko iri tsinda ry’abikorera bo mu bihugu bya Francophonie bazerekeza no muri Gabon, mu bihugu byombi bikaba byitezwe ko bazahahurira n’abikorera batari munsi ya 250.

Inzego zizibandwaho mu biganiro ni urw’ubuhinzi no kongerera agaciro umusaruro ubukomokaho, urwego rw’ingufu zisubira, n’urwego rwa serivisi zishingiye ku ikoranabuhanga.  

  • NTAWITONDA JEAN CLAUDE
  • Nyakanga 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE