U Rwanda rwabonye miliyari 18 Frw yo gusana umuhanda Nyacyonga-Mukoto

  • NTAWITONDA JEAN CLAUDE
  • Gicurasi 18, 2022
  • Hashize imyaka 2
Image

Guverinoma y’u Rwanda, ku wa Kabiri, yasinyanye amasezerano y’inguzanyo ya miliyoni 18 z’amadolari y’Amerika (asaga miliyari 18 z’amafaranga y’u Rwanda)n’Ikigega Gishinzwe Iterambere Mpuzamahanga (OFID) izifashishwa mu gusana ibilometero 36 by’umuhanda wa Nyacyonga-Mukoto uhuza Umujyi wa Kigali n’Intara y’Amajyaruguru.

Biteganyijwe ko uyu muhanda uzahuza imihanda ya kaburimbo ibiri y’ingenzi uvuye mu Majyaruguru y’Umujyi wa Kigali werekeza mu Ntara y’Amajyaruguru, ukaba ushamikiye ku muhanda munini uhuza Kigali n’Umupaka wa Gatuna/Katuna muri Uganda no ku muhanda Kigali-Musanze mu Karere ka Rulindo.

Minisiteri y’Imari n’Igenamigambi (MINECOFIN) itangaza ko uwo muhanda numara kuzura uzagira uruhare rukomeye mu kwimakaza umutekano wo mu muhanda, guteza imbere ubucuruzi buhuza Uturere, kongera urujya n’uruza no kugabanya ikiguzi cy’ibiciro by’ingendo.

Ni umuhanda witezweho nanone kugabanya umuvundo w’ibinyabiziga mu mihanda migari y’Igihugu by’umwihariko iyerekeza n’iva mu Ntara y’Amajyaruguru, Iburengerazuba, Repubulika Iharanrira Demokarasi ya Congo (RDC) no muri Uganda.

Ni umuhanda kandi witezweho koroshya ubuhahirane bw’abaturage basaga miliyoni 2.8 barimo abakora mu nzego z’ubukungu zirimo ubuhinzi, ubucukuzi bw’amabuye y’agaciro, ubucuruzi n’ubukerarugendo.

Aya masezerano y’inkunga yasinywe nyuma y’ibiganiro byahuje impande zombi, iyo nguzanyo ikaba izishyurwa ku nyungu ya 1.75 mu gihe cy’imyaka 20 izatangira nyuma y’imyaka itanu n’ubusonerwe.

Biteganyijwe ko umushinga wose wo kubaka uyu muhanda uzatwara miliyoni 41 z’amadolari y’Amerika, ni ukuvuga amafaranga y’u Rwanda saga miliyari 41.

Banki y’Abarabu Itsura Amajyambere y’Ubukungu muri Afurika (BADEA) ni yo yiyemeje gutanga miliyoni 18 z’Amadolari y’Amerika kuri uyu mushinga mu gihe Leta y’u Rwanda yo yitezweho kongeraho miliyari 5 z’amafaranga y’u Rwanda azifashishwa mu kwishyura imisoro no kwishyura ingurane.

Minisitiri wa MINECOFIN Dr. Uzziel Ndagijimana, yagize ati: “Gusana umuhanda wa Nyacyonga-Mukoto bizagira uruhare muri Gahunda y’Igihugu yo kwihutisha iterambere binyuze mu kunoza uburyo bwo gutwara abantu n’ibintu mu bice by’icyaro. Muri iyo gahunda hazashyirwaho imihanda ya bisi ingana na kilometero 14,100 mu gihugu hose. Turashimira OFID ku bufatanye burambye itugaragariza mu guteza imbere inzego z’ingenzi cyane mu bukungu bwacu.”

Umuyobozi Mukuru wa OFID Abdulhamid Alkhalifa, yagize ati: “Dutewe ishema no kuba twarakoranye n’u Rwanda mu myaka myinshi ishize, mu kwimakaza iterambere ry’ubukungu n’imibereho myiza y’abaturage no gushyigikira inzego z’ingenzi nk’urw’ibikorwa remezo, ubuhinzi ndetse n’Urwego rw’imari. Inguzanyo yacu nshya dutanze izagira uruhare rukomeye muri gahunda y’iterambere rirambye ry’u Rwanda no mu mbaraga rushyira mu kugera ku Cyerekezo 2050.”

Mu myaka itari mike ishize, Leta y’u Rwanda na OFID byubatse ubufatanye mu nzego zitandukanye zirimo urw’ingufu, ubwikorezi, ndetse n’urw’amazi n’isukura bifite agaciro ka miliyoni 165 z’amadolari y’Amerika. Icyo kigega kinafasha urwego rw’abikorera binyuze mu kuruhereza inguzanyo zihendutse.

  • NTAWITONDA JEAN CLAUDE
  • Gicurasi 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE