U Rwanda ruza imbere mu kubahiriza imyanzuro y’i Malabo ku buhinzi

  • NTAWITONDA JEAN CLAUDE
  • Nzeri 8, 2022
  • Hashize imyaka 2
Image

Madamu Jeannette Kagame, yagaragaje ko Abanyarwanda bishimiye kuba mu myaka itatu ikurikiranye, Umuryango w’Afurika Yunze Ubumwe (AU) warashyize u Rwanda imbere mu bihugu byahize ibindi mu gushyira mu bikorwa imyanzuro ku buhinzi yafatiwe i Malabo muri Guinea Equatorial muri Kamena 2014.

Yabigarutseho ku wa Gatatu, mu Nama y’Ihuriro Mpuzamahanga ku iterambere ry’Ubuhinzi muri Afurika (AGRF) ikomeje kubera i Kigali kugeza kuri uyu wa Gatanu taliki ya 9 Nzeri 2022.

Madamu Jeannette Kagame yavuze ko u Rwanda rwiyemeje kwimakaza gahunda zo kwishakamo ibisubizo, haba mu rwego rwo gukemura ibibazo bijyanye n’imiterere n’ubuto bw’Igihugu no mu guharanira kubaka no kurinda ubuzima n’imibereho mu buryo burambye.

Yavuze ko ku bijyanye n’imirire, Leta y’u Rwanda yashyize imbaraga muri Politiki yo guhuza ubutaka, gahunda yo kongera umusaruro, gutunganya imbuto z’indobanure bifasha abahinzi kwigobotora gutumiza imbuto mu mahanga, aho kuri ubu hejuru ya 80% by’imbuto y’indobanure ikoreshwa mu Rwanda kuri ubu ituburirwa mu Gihugu.

Yagize ati: “Twizera ko ibyo bikorwa byose bijyanye na gahunda ya AU yo kongera umusaruro, kuwugeza kuri bose, ku giciro gito kandi ku buryo burambye mu ruhererekane rwacu rw’ibiribwa; kuko ari yo ndorerwamo ya Gahunda y’Igihugu cyacu yo kwihutisha Iterambere.”

Yakomeje agira ati: “Nk’Abanyarwanda twishimiye kwitwa, na Komisiyo y’Umuryango w’Afurika Yunze Ubumwe (AUC), Igihugu cyahize ibindi byose mu gushyira mu bikorwa Imyanzuro y’i Malabo ku Iterambere ry’Ubuhinzi mu myaka itatu ikurikiranye.”

Imyanzuro y’i Malabo yafatiwe mu Nama ya AU yabereye i Malabo ku ya 26-27 Kamena 2014, aho Abakuru b’Ibihugu na guverinoma biyemeje intego zifatika zikwiye kugerwaho mu buhinzi bitarenze mu mwaka wa 2025.

Ni intego zigamije guteza imbere ubuhinzi no kuzana impinduramatwara zigamije gusangira uburumbuke ku mugabane w’Afurika bugira uruhare mu kunoza imibereho y’abaturage. Inama y’i Malabo ni yo yemeje ko ubuhinzi bukwiye kuza imbere muri gahunda zose z’iterambere ry’Afurika bukaba n’inkingi ya mwamba y’iterambere ry’ubukungu no kurandura ubukene.

Mu ijambo yatambukije ku bigairo byitabiriwe n’abadamu b’Abakuru b’Ibihugu by’Afurika, Madamu Jeannette Kagame na we yashimangiye akamaro k’imirire iboneye kuri bose.

Yagize ati: “Imirire myiza, ni ishingiro ry’ubuzima bwiza, amahoro, imibereho myiza n’uburumbuke. Birazwi neza ko abantu bafata ifunguro mu buryo bw’akajagari cyangwa butaboneye bagira ikibazo cy’umubyibuho ukabije no kurwara indwara zitandura nk’umutima, diyabete na kanseri zimwe na zimwe. Bityo rero gufata iya mbere mu guteza imbere imirire iboneye ku Isi ni ingenzi ku buyobozi bwiza aho buva bukagera.”

Ku rundi ruhande, yanavuze ko mu gihe hari abicwa no kurya mu kajagari, hari n’abandi baba bicwa n’inzara ku Isi no muri Afurika by’umwihariko nkuko raporo ya 6 ku kibazo cy’ibiribwa ku Isi iherutse kubigaragaza.

Aha ni naho Madamu Jeannette Kagame yahereye asaba ibihugu by’Afurika gukemura impamvu zitera ibura ry’ibiribwa zirimo amakimbirane n’intambara, kuba hagikorwa ubuhinzi bwa gakondo budatanga umusaruro ungana n’ukenewe n’izindi.

Yakomeje agira ati: “Biteganyijwe ko ababarirwa muri miliyoni 660 bazahura n’ikibazo cy’inzara mu 2030 kandi abarenga kimwe cya kabiri bazaba ari abo ku mugabane wacu. Ibi rero birashimangira impamvu amahoro n’umutekano ari ikintu cy’ibanze kitagibwaho impaka. Imwe mu mpamvu nyamukuru zitera ikibazo cy’ibura ry’ibiribwa muri Afurika ni amakimbirane. Amakimbirane atuma habaho abimukira n’impunzi batabasha guhinga ngo babyaze umusaruro ubutaka bwabo…”

Komiseri ushinzwe iterambere ry’icyaro n’ubuhinzi muri Komisiyo y’Umuryango w’Afurika Yunze Ubumwe, Josefa Leonel Correia SACKO, na we yavuze ko mu 2021 habarurwaga miliyoni zisaga 270 z’abantu bafite ikibazo cy’ibiribwa muri Afurika, ni ukuvuga abasaga 20% by’abatuye uyu mugabane wose.

Yavuze ko bidakwiye kuba Afurika yabonekamo abugarijwe n’inzara kandi ari umugabane ufite amahiwe menshi yatuma buri wese uwutuye yihaza mu biribwa ndetse bagasagurira n’abo ku yindi migabane.

  • NTAWITONDA JEAN CLAUDE
  • Nzeri 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE