U Rwanda rushyigikiye Global Fund iri gusaba miliyari 18 z’amadolari y’Amerika

  • NTAWITONDA JEAN CLAUDE
  • Gashyantare 24, 2022
  • Hashize imyaka 2
Image

Ku wa Gatatu, Perezida wa Repubulika y’u Rwanda Paul Kagame yasabye Leta n’abandi bafatanyabikorwa barimo n’abikorera ku giti cyabo, gukusanya inkunga bashyira mu Umuryango Global Fund, utera inkunga gahunda zigamije gukumira no kuvura virusi itera SIDA, Igituntu na Malariya mu bihugu bitandukanye cyane cyane ibikiri mu nzira y’amajyambere.

Umukuru w’Igihugu cy’u Rwanda yabigarutseho mu nama itegura icyiciro cya 7 cyo gukusanya inkunga ya miliyari 18 z’amadolari y’Amerika zizafasha mu gutabara ubuzima bw’abaturage basaga miliyoni 20 mu bice bitandukanye by’Isi no gufasha bimwe mu bihugu kubaka inzego z’ubuzima ziteguye guhangana n’ibyorezo bishobora kuvuka mu gihe kizaza.

Inkunga Global Fund ikeneye igize 14% gusa by’umutungo wa miliyari 130.2 z’amadolari y’Amerika uteganyijwe gukoreshwa mu gukumira no kuvura virusi itera SIDA, Igituntu, na Malariya kuva mu 2024 kugeza 2026.

Izo miliyari 18 z’amadolari y’Amerika zikubiyemo inyongera ya miliyari 4 z’amadolari y’Amerika ikenewe, ugereranyije n’inkunga ya miliyari 14 z’amadolari y’Amerika uwo muryango wasabye mu mwaka wa 2019.

U Rwanda ni kimwe mu bihugu bitera inkunga Global Fund kandi bikanashyira mu bikorwa imishinga itandukanye y’uwo muryango. Mu cyiciro cya 6 cyo gukusanya inkunga u Rwanda rwiyemeje gutanga miliyoni 2.5 z’amadolari y’Amerika (miliyari zisaga 2.6 z’anmafaranga y’u Rwanda) uwo muryango wagombaga kwifashisha mu bikorwa by’umwaka wa 2020-2022.

Umuyobozi Nshingwabikorwa wa Global Fund Peter Sands, mu muhango wo gukusanya inkunga ku nshuro ya 6 wabereye mu Bufaransa mu mwaka wa 2019

Perezida Kagame wari umwe mu bayoboye iyo nama yo ku wa Gatatu, yashimiye ubuyobozi bwa Global Fund ubufatanye bw’igihe kirekire bufitanye n’Umugabane w’Afurika. Yavuze ko mu mwaka wa 2021 uwo muryango wizihije isabukuru y’imyaka 20 hishimirwa iterambere rimaze kugerwaho mu kurwanya SIDA, Igituntu ndetse na Malariya.

Yavuze ko iyo ntambwe yari imaze kugerwaho yavangiwe n’umwaduko w’icyorezo cya COVID-19 yahungabanyije bidasubirwaho inzego z’ubuzima. Ati: “Ubusobozi bw’ingenzi bwagombaga gukoreshwa  muri ziriya ndwara eshatu bwayobowe mu kurwanya COVID-19. Intambwe yari imaze guterwa mu guhashya HIV, Igituntu na Malariya yasubiye inyuma ndetse hamwe na hamwe ibyari iterambere byaradindiye.”

Yakomeje avuga ko kugira ngo Isi igaruke ku murongo ndetse habe n’imyiteguro ihagije yo guhangana n’ingorane z’ahazaza, hakenewe kongerwa ishoramari mu kubaka inzego z’ubuzima zikomeye kandi zishobora kwihanganira ibihe bigoye cyane.

Yavuze ko icyerekezo cya Global Fund ari ugufasha Isi kugera kuri iyo ntego mu myaka itatu iri imbere, ariko ngo ikeneye inkunga ihagije kandi itangwa mu buryo burambye. Yaboneyeho gushimangira ko u Rwanda rushyigikiye ko Global Fund yakusanyirizwa inkunga ku nshuro ya karindwi, anahamagarira abafatanyabikorwa bose gushyigikira iyo gahunda batizigama.

Yakomeje agira ati: “Ariko gutera inkunga imishinga yo hanze bikwiye kujyana no gushyigikira inzego z’ubuzima ku mugabane wacu. Ibi biri mu bikorwa byihutirwa Umuryango w’Afurika Yunze Ubumwe (AU) uhanze amaso, kandi iterambere ry’ibihugu bigize uyu muryango rikurikiranwa buri mwaka na Komisiyo ya AU. Ndashimira Global Fund, hamwe n’abandi bafatanyabikorwa b’ingenzi, bakomeje gushyigikira iki gikorwa cy’umugabane.”

Perezida Kagame yanagarutse ku gaciro ko kugenzura imikorere y’Inzego z’ubuzima kugira ngo ishoramari rya Global Fund ritange umusaruro mu buryo burambye, ari na yo mpamvu Umugabane w’Afurika washyizeho Ikigo gishinzwe Ubugenzuzi n’Ubuziranenge bw’Imiti (AMA) na cyo gikeneye gushyigikirwa by’umwihariko.

Yavuze ko icyo kigo AMA kizubakira ku bikorwa bya AUDA-NEPAD, Africa CDC mu gufasha Afurika kwikorera imiti n’inkingo byujuje ubuziranenge, cyane ko amwe mu masomo icyorezo cya COVID-19 cyasigiye uyu muganane harimo isano iri hagati y’ubuzima buzira umuze n’iterambere ry’ubukungu kuko bidasigana.

Iyi nama yari yitabiriwe na Perezida wa Senegal akaba n’Umuyobozi wa AU Macky Sall, Perezida wa Kenya Uhuru Kenyatta, Perezida w’Afurika y’Epfo Cyril Ramaphosa, Umuyobozi w’Inama y’Ubutegetsi ya Global Fund Dr Donald Kaberuka, Umuyobozi Mukuru w’uwo muryango Peter Sands n’abafatanyabikorwa bawo batandukanye.

  • NTAWITONDA JEAN CLAUDE
  • Gashyantare 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE