U Rwanda rwerekanye uko rwiteguye gukoresha ingufu za Atomike

  • Imvaho Nshya
  • Ukwakira 5, 2023
  • Hashize amezi 8
Image

Ubuyobozi bw’Ikigo cy’u Rwanda gishinzwe Ingufu za Atomike (RAEB) bwagaragaje ko Guverinoma y’u Rwanda yiteguye gukoresha ingufu za Atomike zinazwi nk’iza nikereyeri mu kwihutisha iterambrere ry’Igihugu hagamijwe kugera ku Cyerekezo 2050.

Dr Fidele Ndahayo, Umuyobozi w’Ikigo cy’u Rwanda gishinzwe Ingufu za Atomike (RAEB), yabigarutseho mu Nama Rusange y’Ikigo Mpuzamahanga gishinzwe imikoreshereze itekanye y’ingufu za nikereyeri (IAEA), aho yanasobanuye uburyo u Rwanda rwiteguye gukoresha mu buryo butekanye ibisubizo bitangwa n’ikoranabuhanga ryifashishwa mu kubyaza umusaruro ingufu za Atomike.

Dr. Ndahayo yasobanuye ko Guverinoma y’u Rwanda yahisemo gukoresha ingufu za nikereyeri mu kongera ingufu z’amashanyarazi mu gihugu. Ashimangira kandi ko zizakoreshwa mu kwihutisha iterambere ry’inzego z’ubuhinzi n’ibiribwa, urw’ubuzima, imicungire y’umutungo kamere w’amazi, kubungabunga ibidukikije, n’iterambere ry’inganda.

Ati: “Ikoranabuhanga rigezweho ritanga ingufu z’amashanyarazi (SMR) ni ryo rizaba umusingi w’inganda zacu zitunganya ingufu za Atomike ndetse inyingo y’umushinga wo kubaka uruganda hifashishijwe iryo koranabuhanga izaba yarangiye bitarenze mu mpera z’uyu mwaka.”

Yakomeje agira ati: “Guverinoma y’u Rwanda isobanukiwe neza ko ikoranabuhanga rya SMR (Small Modular Nuclear Reactors) ari ryo rigezweho kandi rikomeje gutunganywa. Ni yo mpamvu u Rwanda rwatangiye kwimakaza ubufatanye bw’ingenzi n’ibigo birimo gukora iryo koranabuhanga hagamijwe ko ryaba kimwe mu bigize urugendo rw’ibirimo gukorwa mu Rwanda.”

Yashimangiye ko mu Rwanda harimo gushyirwa imbaraga mu rwego rushinzwe ubugenzuzi n’ubuziranenge bw’imikoreshereze y’ingufu za Atomike rukazahabwa ubushobozi bwose rukeneye mu gukurikirana itangizwa ry’ikoranabuhanga rigezweho mu kubyaza umusaruro izo ngufu.

Ati: “Twizera ko ubu buryo buzihutisha ihererekanya ry’ubumenyi n’ikoranabuhanga, ari na byo bizihutisha imishinga y’Igihugu ijyanye n’ingufu. Mu kugera kuri iyo ntego, twiyemeje gukorana bya hafi na IAEA mu guharanira ko ubuziranenge bw’ingufu za Atomike, umutekano n’amabwiriza bikurikizwa.”

Dr. Ndahayo yatangaje ko u Rwanda ruteganya kubyaza umusaruro iryo koranabuhanga mu nzego zihutisha iterambrere ry’ubukungu n’imibereho myiza y’abaturage hagamijwe kugera ku Cyerekezo 2050.

Yashimangiye ko ingufu za Atomike zitezweho kugaragaza impinduka mu mibereho y’abaturarwanda zinafasha kugera ku Ntego z’Iterambere Rirambye (SDGs).

Yagize ati: “Bijyanye n’imbaraga dushyira mu kugera ku Ntego z’Iterambere Rirambye (SDGs), twiyemeje kwimakaza siyansi mu mikoreshereze itekanye y’ingufu za nikereyeri hagamijwe iterambere rirambye ry’ubukungu n’imibereho myiza y’abaturage.”

Dr Fidele Ndahayo, Umuyobozi w’Ikigo cy’u Rwanda gishinzwe Ingufu za Atomike (RAEB)

Yakomeje asaba inkunga n’ubufatanye mpuzamahnga kugira ngo ibihugu bikiri mu nzira y’a,majyambere bibashe kubyaza umusaruro iryo koranabuhanga rigezweho mu birebana n’ingufu za nikereyeri.

Ati: “Turasaba IAEA gusuzuma icyemezo yafashe ikemerera ibihugu bikiri mu nzira y’amajyambere kugera ku bubiko bw’amakuru, amahugurwa no kongera ubumenyi.”

Yavuze ko kugeza ubu u Rwanda rwishimira ubufasha rukomeje guhabwa na IAEA binyuze mu mashami atandukanye no mu masezerano y’ubufatanye ku bushakashatsi, amahugurwa n’Iterambere birebana n’ubumenyi n’ikoranabuhanga ku ngufu za nikereyeri.

Ati: “U Rwanda rwiteguye gukorana bya hafi na Komisiyo Nyafurika ishinzwe iby’ngufu za Nikereyeri mu kwihutisha uguhuza imikoreshereze ya gisivili y’ingufu za gisivili muri Afurika. Umutekano n’amabwiriza y’ubwirinzi birakurikizwa ku rwego ruhanitse.”

Muri Nzeri, Guverinoma y’u Rwanda yasinyanye amasezerano n’Ikigo cyimakaza ikoranabuhanga mu kubyaza umusaruro ingufu za rikereyeri gifite inkomoko muri Canada n’u Budage, mu gushimangira ubufatanye bugamije gutangiza uruganda rw’ingufu za nikereyeri mu Rwanda.

Byitezwe ko ingufu za nikereyeri zizongera ingufu z’amashanyarazi zitunganywa kugeza ubu kuko zigeze ku kigero cya MW 332.6 ziva mu ngomero z’amazi, gazi metani, ingufu zikomoka ku mirasire y’izuba na nyiramugengeri.

U Rwanda rwishimira kandi no kuba ruza imbere mu bihugu by’Afurika mu gutangira kubyaza umusaruro ingufu za Atomike no gushyira mu bikorwa imishinga itegurwa na IAEA, rukabonera gushimira ubuyobozi bw’icyo kigo ubwitange bugaragaza mu kwimakaza ubumenyi n’ikoranabuhanga mu kubyaza umusaruro ingufu za Atomike.

NTAWITONDA JEAN CLAUDE

  • Imvaho Nshya
  • Ukwakira 5, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE