U Rwanda rufite ububiko bwa Gazi ishobora kumara iminsi 5 gusa

  • NTAWITONDA JEAN CLAUDE
  • Gicurasi 18, 2022
  • Hashize imyaka 2
Image

Kugeza ubu u Rwanda rufite ububiko bwa Gazi yo gutekesha ishobora kumara iminsi 5, hakaba hari gahunda yo kongera ibigega byayo byakwifashishwa mu gihe rwaba rwatumije nyinshi,  ibi bikaba ari n’urufunguzo rwo gukemura ikibazo cy’ibiciro  bikiri hejuru.

Byagarutsweho na Minisitiri w’Intebe Dr Ngirente Edouard mu kiganiro yagiranye n’abanyamakuru ku wa 18 Gicurasi 2022, asobanura ingamba  zihari zo gukemura iki kibazo cy’ibiciro bya Gazi yo gutekesha bihanitse.

Yagize ati: “Hari abashoramari turimo gukorana kugira ngo twihutishe gahunda yo kubaka ibigega byo kubikamo Gazi, burya iyo ibintu bihari ni bwo bigura makeya, ariko ubu ni nko kurangura ukaza ugurisha n’abaguzi udafite aho ubika”.

Minisitiri w’Intebe Dr Ngirente yavuze ko intego ari ukongera ububiko ku buryo hajya habikwa Gazi yamara amezi runaka nk’uko bikorwa kuri peteroli. Ibi bizajyana no gushyiraho amabwiriza agenga ubucuruzi bwa Gazi ku buryo bugira umurongo uhamye bugenderaho.

Yavuze ko mu bihe byashize ibijyanye na Gazi bitari bifite amabwiriza; bwari ubucuruzi bukorwa bisanzwe bitandukanye n’uko nko kuri Peteroli, lisansi na mazutu hariho amabwiriza, ariko ibyo ngo byaterwaga n’uko Abanyarwanda mu bihe byashize batayikoreshaga cyane.

Ati: “Ariko muri gahunda ya NST1 twavuze ko tugiye kugabanya ikoreshwa ry’amakara  tukazamura uburyo abaturage bagenda batera imbere bakoresha Gazi”.

Avuga ko hakozwe ubukangurambaga ngo abantu bayikoreshe habaho  kuyicuruza cyane ibikorwa remezo byifashishwa bitaratera imbere.

Ati: “Turimo kurwana no kugira ngo tubone aho dushobora kuyibika mu gihe twaba tuyizanye ari nyinshi. Igikomeye turimo gukora nka Leta ni uko uru rwego rwatera imbere, Gazi ikagira ububiko busobanutse, abacuruzi barimo bakamenyekana”.

Minisitiri w’Intebe Dr Ngirente Edouard yaboneyeho kubwira Abanyarwanda ko iki kibazo cy’ibiciro bya Gazi Leta itakibagiwe, hari icyo irimo kugikoraho ku buryo mu gihe cy’amezi atandatu hari intambwe igaragara izaba yatewe mu gushyira ubu bucuruzi ku murongo.

  • NTAWITONDA JEAN CLAUDE
  • Gicurasi 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE