U Rwanda n’u Budage byasinyanye amasezerano ya miliyari 63 Frw

  • NTAWITONDA JEAN CLAUDE
  • Werurwe 1, 2022
  • Hashize imyaka 2
Image

Kuri uyu wa Kabiri taliki ya 1 Werurwe 2022, Leta y’u Rwanda yasinyanye amasezerano na Repubulika y’u Budage y’ubufatanye mu iterambere no guhangana n’imihindagurikire y’ikirere hagamijwe gukaza ingamba zo gukumira ingaruka z’imihindagurikire y’ikirere, kujyana n’ibihe ndetse no kubaka iterambere rirambye ry’imijyi.

Amasezerano yashyizweho umukono na Minisitiri w’Imari n’Igenamigambi (MINECOFIN) Dr. Ndagijimana Uzziel ku ruhande rw’u Rwanda, na Minisitiri w’Ubukungu n’Iterambere w’u Budage Svenja Schulze uri mu ruzinduko rw’iminsi ine mu Rwanda.

MINECOFIN yatangaje ko ishyirwa mu bikorwa ry’imishinga y’ingenzi ishingiye kuri ubwo bufatanye bushya, rizatwara akayabo ka miliyari zisaga 63 z’amafaranga y’u Rwanda (miliyoni 56 z’amayero).

Ni amafaranga azakomeza kwifashishwa mu mishinga irimo uwo guteza imbere Umujyi wa Kigali utoshye kandi utangiza ibidukikije, no gushyigikira gahunda u Rwanda rwiyemeje mu guhangana n’imihindagurikire y’ikirere (NDCs).

Minisitiri Svenja Schulze yashyize umukono kuri ayo masezerano nyuma yo kwakirwa na Perezida wa Repubulika y’u Rwanda Paul Kagame muri Village Urugwiro kuri uyu wa Mbere, hamwe n’itsinda ryari rimuherekeje.

Nyuma yo kumwakira, Minisitiri Svenja Schulze yagize ati: “Ndashimira byimazeyo Nyakubahwa Paul Kagame ku bwo kunyakirana urugwiro no gutanga umusaruro mwiza mu bufatanye bwacu. Iterambere ry’u Rwanda rirashimishije! Tuzakomeza gufatanya mu kurwanya icyorezo no kurengera ikirere.”

Perezida Kagame yakiriye Minisitiri Svenja Schulze uri mu ruzinduko rw’iminsi ine mu Rwanda

Uyu muyobozi yanasuye Urwibutso Rukuru rwa Jenoside rwa Kigali, yunamira inzirakarengane zishwe muri Jenoside yakorewe Abatutsi. Mu butumwa yatanze ku Rwibutso, Minisitiri Svenja Schulze yavuze ko yashenguwe cyane kandi agahindurwa no gusura uru rwibutso.

Ati: “Twifatanyije n’abarokotse ariko nanone ntidushobora kwiyumvisha ububabare abishwe bagize ndetse n’ubw’ababuze ababo. Gusa icyubahiro cyanjye gikomeye ndagiha abantu, nyuma ya Jenoside yakorewe Abatutsi, bagize ubutwari bwo gukora umurimo w’ubwiyunge.”

U Budage n’u Rwanda ni ibihugu byishimira umubano wa hafi kandi ushyira mu gaciro; muri rusange u Rwanda rufata u Budage nk’umufatanyabikorwa udafite izindi nyungu zihishe inyuma zaba iz’ubukungu cyangwa iza politiki.

Icyo gitekerezo gifite inkomoko mu gihe cy’abakoloni cy’u Budage kuko ubu kiri mu bihugu bitakomeje guheranwa no kwikomeza gushingiye ku mateka ahubwo kikaba cyari yemeje gufatanya n’u Rwanda mu rugendo rw’iterambere.

Leta y’u Rwanda ntihwema kwishimira inkunga y’u Budage ihoraho mu rugendo rw’iterambere, by’umwihariko nyuma ya Jenoside yakorewe Abatutsi aho Igihugu cyari kiyikeneye cyane kurusha ibindi bihe cyigeze kunyuramo.

Ubufatanye bw’ibihugu byombi mu iterambere bwibanda ku kwegereza ubuyobozi abaturage, imiyoborere myiza, iterambere rirambye ry’ubukungu, harimo amahugurwa y’imyuga, ndetse n’imicungire y’imari ya Leta.

Byongeye kandi, Guverinoma y’u Budage itera inkunga u Rwanda mu bice birimo kubyaza ingufu no kuzikwirakwiza, kwemeza ubuziranenge bw’ibicuruzwa, kubaka amahoro n’ubwiyunge.

  • NTAWITONDA JEAN CLAUDE
  • Werurwe 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE