U Rwanda na Malawi mu nzira zo kwagura ubucuruzi

  • Imvaho Nshya
  • Gicurasi 26, 2022
  • Hashize imyaka 2
Image

Mu Nama ngarukamwaka y’Ihuriro Mpuzamahanga ry’Ubukungu (WEF) yateranye muri iki cyumweru, Perezida wa Repubulika y’u Rwanda Paul Kagame yahahuriye  n’Abakuru b’Ibihugu na Guverinoma, abayobozi b’ibigo n’Imiryango Mpuzamahanga bitandukanye, bagirana ibiganiro bigamije kwagura ubutwererane n’Afurika n’u Rwanda by’umwihariko.

Muri bo harimo Perezida wa Malawi Lazarus Chakwera bagiranye ibiganiro ku wa Kabiri taliki ya 24, byibanze ku mubano usanzwe uzira amakemwa hagati y’u Rwanda na Malawi.

Abayobozi bombi biyemeje gukorera hamwe mu kongera ubutwererane mu bucuruzi hagati y’u Rwanda na Malawi, mu rwego rwo kurushaho kubyaza umusaruro amahirwe y’uburyo butandukanye atangwa n’Isoko Rusange ry’Afurika (AfCFTA).

Abayobozi bombi bahuye nyuma yo kuyobora ibiganiro byabereye ahafatiwe amafungoro ya mugitondo byari bigamije kurarikira abahagarariye urwego rw’abikorera baturutse mu bice bitandukanye by’Isi kudacikanwa n’amahirwe ari mu Isoko Rusange ry’Afurika ari na ryo rya mbere rinini ku Isi.

Iri soko rihuriyemo abaturage basaga miliyari 1.3 batuye mu bihugu byose by’Afurika, umwihariko ukaba ari uko abo baturage biganjemo urubyiruko rufite imbaraga zo gukora rukaba rwiteguye no gufatanya n’abikorera guhanga udushya dutanga ibisubizo ku bibazo bitandukanye byibasiye Isi.

Perezida Chakwera wa Malawi, yavuze ko igihe kirenga umwaka gishize  AfCFTA itangiye gihamagarira ibihugu byose by’Afurika guhuza imbaraga mu kurushaho kuvumbura no kubyaza umusaruro amahirwe aboneka muri iryo soko binyuze mu bufatanye bwimakazwa hagati y’ibihugu ndetse n’ubufatanye rusange nk’umugabane.

Avuga ku biganiro yagiranye na Perezida Kagame, Chakwera yagize ati: “Ibiganiro byacu byari bishingiye ku ndangagaciro n’umurego by’Afurika. Kugira ngo ibyo bigerweho, njye na Perezida Kagame twemeye gufatanya mu kuzamura ubucuruzi hagati ya Malawi n’u Rwanda.”

Mu butumwa yanyujije ku mbuga nkoranyambaga, Chakwera yakomeje agira ati: “Twiyemeje guharanira ko Komisiyo ihoraho y’ubutwererane ihuriweho hagati ya Malawi n’u Rwanda itera imbere, nk’uko biteganyijwe mu kurangiza amasezerano atandukanye agamije gushimangira umubano mu bucuruzi, ubuhinzi, dipolomasi, umutekano n’iterambere.”

Yongeyeho ko Malawi nk’igihugu gikomeje guharanira iterambere no kubaka ahazaza heza, yiyemeje gukorana bya hafi na buri gihugu cyose bahuje icyerekezo cyo guharanira imibereho myiza n’ubukungu by’abaturage.

U Rwanda ni kimwe mu bihugu by’Afurika bifite icyerekezo cyo kuba mu bihugu byubatse ubukungu buteye imbere bitarenze mu 2050, ndetse rukaba rushyigikiye ishyirwa mu bikorwa ry’Isoko Rusange ry’Afurika rizaba umusingi ukomeye w’impinduramatwara ya kane y’ubukungu n’ikoranabuhanga ku mugabane.

Malawi na yo ni igihugu cyo mu cyo mu Burasirazuba bw’Amajyepfo y’Afurika kidakora ku nyanja, ariko gifite intumbero yo kubaka ubukungu n’iterambere birambye mu nyungu z’abaturage bacyo.

Ni igihugu cy’imisozi miremire kizwi cyane kubera Ikiyaga kinini cya Malawi giherwa n’isumo rinini mu majyepfo yacyo aho gihana imbibi na Pariki y’Igihugu ya Malawi. Muri iyo Pariki haboneka urusobe rw’ibinyabuzima bitandukanye birimo amafi y’amabara atandukanye.

Ubukungu bw’icyo gihugu bushingiye ahanini ku buhinzi n’ubworozi, aho bukorwa n’abari hejuru ya 80% nk’uko bimeze mu Rwanda. Umwihariko wacyo ni uko ari igihugu gihura n’ingaruka z’imihindagurikire y’Ikirere ikaze igatuma abahinzi badasarura uko bikwiye mu mwaka wose.

  • Imvaho Nshya
  • Gicurasi 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE